உடற்பயிற்சியால் ஆயுள் நீளும்!

உடற்பயிற்சியால் ஆரோக்கிய வாழ்க்கை கிட்டும் என்பது உள்ளிட்ட விஷயங்கள் நமக்குத் தெரியும். இப்போது, உடற்பயிற்சியால் ஆயுள் அதிகரிக்கும் என்று ஆய்வாளர்கள் கூறுகின்றனர்.

வயோதிகக் காலங்களில் தொடர்ச்சியாக உடற்பயிற்சி செய்வதன் மூலம் ஒருவர் தமது ஆயுளை அதிகரித்துக்கொள்ள முடியும் என்று அவர்கள் தெரிவிக்கின்றனர்.

நார்வே நாட்டில், வயதான 5 ஆயிரத்து 700 ஆண்கள் மத்தியில் மேற்கொள்ளப்பட்ட ஆய்வில், வாரத்துக்கு மூன்று மணிநேரம் உடற்பயிற்சி மேற்கொள்பவர்கள், உடற்பயிற்சி செய்யாத முதியவர்களை விட, ஐந்து ஆண்டுகள் அதிகம் வாழ்வதாக தெரியவந்துள்ளது.

வயதானவர்கள் தங்கள் ஆரோக்கியத்தில் கவனம் செலுத்த வேண்டும் என்ற விழிப்புணர்வுப் பிரசாரம், இங்கிலாந்து போன்ற நாடுகளில் மேற்கொள்ளப்படுகிறது.

முதியவர்கள் மத்தியில் குறைந்துவரும் உடற்பயிற்சி குறித்து, தொண்டு நிறுவனம் ஒன்று எச்சரித்ததை அடுத்து, மேற்கண்ட ஆய்வு மேற்கொள்ளப்பட்டது.

நார்வேயின் ஆஸ்லோ பல்கலைக்கழக மருத்துவமனை மேற்கொண்ட ஆய்வில், மிதமான உடற்பயிற்சி, தீவிர உடற்பயிற்சி ஆகிய இரண்டுமே ஒருவரின் ஆயுட்காலத்தை நீடிப்பதாக தெரிவித்துள்ளது.

65 வயதுக்கு மேற்பட்ட வயோதிகர்கள், வாரத்தில் 150 நிமிடங்கள் மிதமான உடற்பயிற்சி செய்ய வேண்டும் என இங்கிலாந்து டாக்டர்கள் பரிந்துரைத்துள்ளனர்.

68 முதல் 77 வயதுக்கு உட்பட்டவர்கள், வாரம் ஒன்றுக்கு 60 நிமிடங்களுக்கும் குறைவான மிதமான உடற்பயிற்சியில் ஈடுபடுவதால் எந்தப் பலனும் இல்லை என்றும் கண்டறியப்பட்டுள்ளது.

11 ஆண்டுகள் மேற்கொள்ளப்பட்ட இந்த ஆய்வில், ஏதாவது ஒருவகை உடற்பயிற்சியை தொடர்ச்சியாக 30 நிமிடம் வாரத்துக்கு ஆறு முறை செய்யும்போது, அப்படிச் செய்வோர் மரணமடையும் வீதம் 40 சதவீதம் குறைவதாக தெரிவிக்கப்படுகிறது.

புகைபிடித்தலை நிறுத்துவதால் உயிரிழப்புக்கள் குறைவதைப் போல, உடற்பயிற்சி மேற்கொள்வதாலும் நன்மை ஏற்படுகிறது என்பதுடன், உடற்பயிற்சியை அதிகரிப்பதுடன், புகை பிடிக்கும் பழக்கத்தைக் குறைக்க முயற்சிக்க வேண்டும் என வயதான ஆண்களுக்கு அறிவுறுத்தப்படுகிறது.

வயோதிகர்கள் மீதான இந்த ஆய்வில், அவர்கள் முன்பு தமது வாழ்க்கையில் எவ்வளவு ஆரோக்கியமாக இருந்தார்கள் என்பதை கவனத்தில் எடுத்துக்கொள்ளவில்லை.

பொதுவாக மக்கள் மிகவும் குறைவான அளவு உடற்பயிற்சியை மேற்கொள்வதாக, இங்கிலாந்தை தளமாகக் கொண்டு செயல்படும் இங்கிலாந்து ஹார்ட் பவுண்டேஷன் அறிக்கை ஒன்றை வெளியிட்டிருக்கிறது. அதைத் தொடர்ந்து தற்போது இந்த ஆய்வும் வெளிவந்துள்ளது.

எந்தெந்த நாடுகளில், மிதமான அளவில்கூட உடற்பயிற்சி செய்வதில்லை என இங்கிலாந்து ஹார்ட் பவுண்டேஷன் வெளியிட்டிருக்கும் அறிக்கையில், போர்ச்சுக்கலில் 69 சதவீதத்தினரும், போலந்தில் 55, பிரான்சில் 46, இங்கிலாந்தில் 44, குரோசியாவில் 34, ஜெர்மனியில் 26, நெதர்லாந்தில் 14 சதவீதத்தினரும் மிதமான உடற்பயிற்சியைக் கூட செய்யாமல் இருக்கிறார்கள் என்று பட்டியலிடப்பட்டுள்ளது.

வயது பேதமின்றி, தொடர்ச்சியாக மேற்கொள்ளும் உடற்பயிற்சியானது, இதய ஆரோக்கியத்துக்கு நல்லது என்பதுடன், ஆயுளையும் நீடிக்கச் செய்யும் என ஆய்வை மேற்கொண்ட நிறுவனத்தின் சார்பாக பேசிய ஜூலி வாட் தெரிவித்தார்.

தமது புதிய புள்ளிவிவரத் தகவல்களின்படி, இங்கிலாந்து மக்கள்தொகையில் பாதிப் பேர், மிதமான உடற்பயிற்சியைக்கூட செய்வதில்லை என்றும், மற்ற பல ஐரோப்பிய நாடுகளுடன் ஒப்பிடும்போது, இது மிகவும் அதிகமான அளவு என்றும் அவர் கூறினார்.

உடற்பயிற்சியும், அதன் வாயிலாகப் பேணப்படும் ஆரோக்கியமான வாழ்வும் ஆயுளைக் கூட்டும் என்பதே மேற்கண்ட இரண்டு ஆய்வுகளின் ஒருமித்த முடிவாகும்.

உடற்பயிற்சியை ஒரு பழக்கமாக உருவாக்கிக் கொண்டால்தான் அது கடைசி வரை நம்மை விட்டு நீங்காதிருக்கும், உரிய நல்ல பலனையும் தரும்!

ஓகே தல , இனிமேல் தொடர்ந்து நடைபயிற்சியை அமுல்படுத்தவேண்டும்