யோகா தினம்: ஐ.நா. தலைமையகத்தில் பிரம்மாண்ட ஏற்பாடு

சர்வதேச யோகா தினத்தையொட்டி, ஐ.நா. தலைமையகத்தில் நடைபெறவுள்ள பிரம்மாண்டமான விழாவில் இந்திய வெளியுறவுத் துறை அமைச்சர் சுஷ்மா ஸ்வராஜ் பங்கேற்கிறார்; 192 நாடுகளில் சுமார் 200 கோடி பேர், இந்தக் கொண்டாட்டத்தில் பங்கேற்பார்கள் என எதிர்பார்க்கப்படுகிறது என்று ஐ.நா.வுக்கான இந்திய தூதர் அசோக் முகர்ஜி தெரிவித்தார்.
-
இதுகுறித்து நியூயார்க்கில் செய்தியாளர்களிடம் புதன்கிழமை அவர் கூறியதாவது:
-
முதலாவது சர்வதேச யோகா தினம், வரும் 21-ஆம் தேதி கொண்டாடப்படவுள்ளது. அன்றைய தினம், ஐ.நா. தலைமையகத்தில் நடைபெறவுள்ள 2 மணி நேர பிரம்மாண்ட யோகா நிகழ்ச்சியில், இந்தியப் பள்ளி மாணவர்கள் மற்றும் ஐ.நா.வின் சர்வதேசப் பள்ளியைச் சேர்ந்த மாணவர்கள் நூற்றுக்கணக்கானோர் பங்கேற்கின்றனர். இந்த நிகழ்ச்சிக்கு தலைமைத் தாங்க, இந்திய வெளியுறவுத் துறை அமைச்சர் சுஷ்மா ஸ்வராஜ் சனிக்கிழமை நியூயார்க் வருகிறார். இதில், ஐ.நா. பொதுச் சபையின் தலைவர் ஷாம்குட்டேசா, ஐ.நா. பொதுச் செயலர் பான் கி-மூன், வாழும் கலை அமைப்பின் நிறுவனர் ஸ்ரீ ரவி சங்கர் உள்ளிட்டோரும் கலந்து கொள்கின்றனர்.
-
நியூயார்க் டைம்ஸ் சதுக்கத்தில் 30 ஆயிரம் பேர் வரை கலந்து கொள்ளவுள்ள யோகா விழாவிலும் சுஷ்மா ஸ்வராஜ் பங்கேற்கவுள்ளார். ஐ.நா சார்பில் அங்கு நடைபெறும் இந்த நிகழ்ச்சி, முன்னணி தொலைக்காட்சிகளில் நேரடி ஒளிபரப்பு செய்யப்படவுள்ளது.
-
இதை தவிர, நியூயார்க் நகரில் ஹிந்து கோயில்கள் அமைந்துள்ள ஸ்ரீ மகா வல்லப கணபதி தேவஸ்தானத்தில் நடைபெறும் நிகழ்ச்சியில், சுஷ்மா ஸ்வராஜ் யோகா குறித்து உரையாற்றுவார் எனவும், யோகா குறித்த செயல்முறை விளக்கத்தை அவர் அளிப்பார் என்றும் எதிர்பார்க்கப்படுகிறது.
மேலும், நியூயார்க்கில் லிங்கன் மையத்தில், வாழும் கலை அமைப்பின் நிறுவனர் ஸ்ரீ ரவி சங்கர் நடத்தும் யோகா நிகழ்ச்சியும் நடைபெறவுள்ளது என்று அசோக் முகர்ஜி தெரிவித்தார்.
-
சியாச்சினில் யோகா தினம்: இதனிடையே, இமயமலையில், கடல்மட்டத்திலிருந்து 12,000 அடி உயரத்தில் அமைந்துள்ள சியாச்சின் ராணுவ முகாம் உள்ளிட்ட நாட்டின் அனைத்து ராணுவ முகாம்களிலும் யோகா தினத்தைக் கொண்டாட திட்டமிடப்பட்டுள்ளது.
-
இந்திய பெருங்கடல், பசிபிக் பெருங்கடல், மத்திய தரைக்கடல் ஆகியவற்றில் அமைக்கப்பட்டுள்ள இந்திய கடற்படைப் பிரிவுகளிலும், போர்க் கப்பல்களிலும் சர்வதேச யோகா தினம் கொண்டாடப்படவுள்ளது.
=
தினமணி