குப்பையிலிருந்து மின்சாரம் தயாரிக்கும் திட்டம்: எரிபொருள் உற்பத்தி சோதனை தொடங்கியது

by **ayyasamy ram** Fri Jun 19, 2015 9:58 am

வண்டலூரை அடுத்த வேங்கடமங்கலத்தில் 50 ஏக்கர் பரப்பில் அமைக்கப்பட்டுள்ள பல்லாவரம், தாம்பரம் ஒருங்கிணைந்த நகராட்சி திடக்கழிவு மேலாண்மைத் திட்ட மையத்தில் குப்பையில் இருந்து மின்சாரம் தயாரிக்கப் பயன்படும் எரிபொருள் உற்பத்திக்கான சோதனை அண்மையில் தொடங்கப்பட்டது.
-
சென்னையை அடுத்த பல்லாவரம், தாம்பரம், செம்பாக்கம் ஆகிய நகராட்சிகள் உள்பட அருகில் உள்ள பேரூராட்சிகளில் இருந்து நாளொன்றுக்குப் பெறப்படும் சுமார் 300 டன் குப்பைகளில் இருந்து மின்சாரம் தயாரிக்கும் திட்டம் சில ஆண்டுகளுக்கு முன் தொடங்கப்பட்டது.
-
ஆரம்பத்தில் இந்தத் திட்டம் தாம்பரம், பல்லாவரம், ஆலந்தூர் ஆகிய நகராட்சிகளில் சேகரிக்கப்படும் குப்பைகளைச் சேமிக்கும் உரக் கிடங்காக வேங்கடமங்கலத்தில் தொடங்கப்பட்டது. பின்னர், பூனாவில் வெற்றிகரமாகச் செயல்படுத்தப்பட்டு வரும் குப்பையில் இருந்து மின்சாரம் தயாரிக்கும் திட்டமாக ரூ.100 கோடி மதிப்பீட்டில் மேம்படுத்தப்பட்டது.
-
இந்தத் திட்டத்தின் ஓர் அங்கமாக, குப்பைகளைத் தரம் பிரித்து லாரிகள் மூலம் எடுத்துச் செல்வதற்கென பல்லாவரத்தில் கணபதிபுரம், தாம்பரத்தில் கன்னடப்பாளையம் ஆகிய இடங்களில் குப்பைக் கையாளும் நவீன மையங்கள் அமைக்கப்பட்டன.
-
தற்போது வேங்கடமங்கலத்தில் குப்பைகளின் ஈரப்பதத்தை 800 டிகிரி வெப்பத்தில் உலர வைத்து, எரிபொருளாக்கும் முதல்கட்ட திட்டத்திற்கான இயந்திரங்கள் நிறுவும் பணிகள் நிறைவடைந்துள்ளன. குப்பைகளை எரிபொருளாக்கும் சோதனைகளும் நடத்தப்பட்டன.
-
தினமும் கொண்டு வரப்படும் சுமார் 200 டன் குப்பைகள் மூலம் தயாரிக்கப்படும் 60 டன் எரி பொருளைக் கொண்டு வெப்பசக்தி மூலம் மின்சாரம் தயாரிக்கும் இரண்டாம் கட்டத் திட்டத்துக்கான இயந்திரங்கள் நிறுவும் பணிகள் ஓரிரு மாதங்களில் நிறைவடையும்.
-
எரிபொருள் உற்பத்திக்கான சோதனை நடவடிக்கைக்கு கடந்த வாரம் பல்லாவரத்தில் இருந்து வேங்கடமங்கலத்திற்கு குப்பைகள் கொண்டு செல்லப்பட்டது. அங்குள்ள சோதனைக் கிடங்கில் ஈரப்பதமான குப்பைகளைக் கையாண்டபோது துர்நாற்றம் வீசியதால் அந்தப் பகுதி மக்கள் பெரிதும் அதிர்ச்சி அடைந்தனர்.
-
இதுதொடர்பாக பல்லாவரம் நகராட்சி ஆணையர் சிவசுப்ரமணியன் கூறும்போது, வேங்கடமங்கலத்திற்கு லாரிகள் மூலம் கொண்டு செல்லப்படும் குப்பைகள் பாதுகாப்பாகக் கொண்டு செல்லும் வகையில் ஏற்பாடு செய்யப்பட்டுள்ளது. அங்கு கொண்டு செல்லப்படும் குப்பைகள் துர்நாற்றம் வீசாத வகையில் கையாளுவதற்கான நடவடிக்கைகளும் மேற்கொள்ளப்பட்டுள்ளன. தற்போது சோதனைக்கட்டத்தில் இருப்பதால் நிகழும் அசெüகரியங்களை பொதுமக்கள் தயவுகூர்ந்து பொறுத்துக் கொள்ள வேண்டும். துர்நாற்றம் பிரச்னைகள் குறித்து ஆய்வு நடத்தி விரைவில் உரிய நடவடிக்கைகள் மேற்கொள்ளப்படும் என்றார்.
=
தினமணி