முதலீட்டில் தவிர்க்க வேண்டிய ஐந்து தவறுகள்!

முதலீடு செய்யும் போது என்ன தான் கவனமாக திட்டமிட்டு செயல்பட்டாலும் ஏதேனும் தவறுகள் ஏற்பட வாய்ப்பிருக்கிறது. இதனால் உண்டாகக்கூடிய பாதிப்புகளை குறைக்க, பெரும்பாலான முதலீட்டாளர்கள் செய்யக்கூடிய பொதுவான இந்த ஐந்து தவறுகளை தவிர்க்க வேண்டும் என, நிதி ஆலோசகர்கள் வலியுறுத்துகின்றனர்.

1. சோம்பல்: பணத்தை நிர்வகிப்பதில் உள்ள சோம்பல், அதிக ரொக்கத்தை கையில் வைத்திருக்க அல்லது முதலீட்டை தள்ளிப்போட வழிவகுக்கும். அதே போல எதிர்பார்த்த பலனை அளிக்காத முதலீடுகளில் இருந்து வெளியேறுவதையும் தாமதமாக்கும்.

2. விரிவாக்கம்: முதலீடு பல பிரிவுகளில் இருக்க வேண்டும். பங்குகள், பரஸ்பர நிதி, வைப்பு நிதி, பத்திரங்கள் என பல வகை திட்டங்களில் முதலீடுகளை பரவலாக்கி கொள்ள வேண்டும். ஆனால் இந்த விரிவாக்கம், அளவுக்கு அதிகமாகவும் இருக்கக் கூடாது; மிக குறைவாகவும் இருக்கக் கூடாது.

3. முதலீடு விலக்கல்: அவசர தேவைக்காக முதலீட்டின் ஒரு பகுதியை விலக்கிக் கொள்ளலாம் அல்லது முதலீட்டின் மீது கடன் பெறலாம். ஆனால், இப்படி விலக்கிக் கொள்ளும் முதலீட்டை, மீண்டும் ஈடு செய்ய பலரும் மறந்து விடுகின்றனர். எடுத்த தொகையை முதலீடு செய்வதில் உறுதி காட்ட வேண்டும்.

4. ஒரு பலன் போதுமா?: எந்த முதலீட்டிற்கும் பலவித அம்சங்கள் உண்டு. அவற்றில் ஒரு அம்சத்தை மட்டும் பார்த்து செயல்படக் கூடாது. பங்குகள் அதிக லாபத்தை தரலாம். ஆனால், அவற்றின் ஏற்ற, இறக்கங்கள் பற்றியும் கவனம் செலுத்த வேண்டும்.

5. முதலீடு மாற்றம்: ஒரு திட்டத்தில் முதலீடு செய்துள்ள பணத்தை அதிக பலன் தரும் இன்னொரு திட்டத்திற்கு மாற்றும் போது, நீண்ட கால பலனை மறந்துவிடக் கூடாது. மேலும் குறிப்பிட்ட அந்த திட்டத்தில் முதலீடு செய்த இலக்கையும், மனதில் கொள்ள வேண்டும். குறுகிய கால பலனை மட்டும் கருத்தில் கொள்ளக்கூடாது.

தினமலர் - நிதி