கொளுத்தும் வெயிலில் குளிர்பானம் குடிக்கலாமா?

கொளுத்தும் இந்தக் கோடை நாட்களில், குளிரான இடம் தேடி ஓடுவதும், குளிராக எதாவது பருக விரும்புவதும் எல்லோரது இயல்பு.

அதனால் கடைகளில் வண்ணவண்ணமாய் வசீகரிக்கும் குளிர் பானங்களை பலரும் போட்டிபோட்டு அருந்துகிறார்கள். தாகம் வாட்டும் வேளையில் 'ஜில்'லென்று ஏதாவது அருந்தினால் போதும் என்று நினைக் கிறார்கள். வீடுகளில் குளிர்பதனப் பெட்டிகளிலும் லிட்டர் கணக்கில் குளிர்பானங்களை வாங்கி அடுக்குகிறார்கள்.

ஆனால் வெயில் நேரத்தில் இந்த செயற்கைக் குளிர்பானங்களை அருந்துவது நல்லதா? இவற்றால் உடம்புக்கு ஏதும் நன்மை, சத்து கிடைக்கிறதா?

இதுதொடர்பாக மருத்துவர்களிடம் கேட்டால், இந்த வண்ணக் குளிர்பானங்களால் உடலில் தேவையற்ற கலோரிதான் சேருமே தவிர, வேறு எந்தவித பலனும் கிடையாது என்கிறார்கள். சமீபகாலமாக நம் நாட்டில் பிரபலமாகியுள்ள ஐஸ் காபி, ஐஸ் டீ ஆகியவற்றையும் பலரும் விரும்பி அருந்துகிறார்கள். இவற்றை தவிர்ப்பதும் நல்லது என்பது மருத்துவர்கள் கருத்து.

பழங்களையும் கூட சாறாக அல்லாமல் அப்படியே பழமாகச் சாப்பிடுவது தான் சிறப்பு.

பொதுவாக, கோடை காலத்தில் நாம் பருகும் பானங்கள், உண்ணும் உணவு ஆகியவற்றில் கவனமாக இருக்க வேண்டும். எண்ணெயில் பொரித்த உணவுகளை, குறிப்பாக அசைவ உணவு வகைகளை இந்த கோடையில் முடிந்தவரை தவிர்ப்பதே நல்லது. அதிலும் இரவு வேளையில் அசைவ உணவு அறவே வேண்டாம்.

கோடை வெயிலில் வெளியில் சென்றால் கையோடு ஒரு பாட்டிலில் சுத்தமான குடிநீரை எடுத்துச் செல்லுங்கள். காய்ச்சி ஆறவைத்த தண்ணீரே பாதுகாப்பானதுதான்.

தண்ணீர் தவிர பானம் எதுவும் அருந்த விரும்பினால், இயற்கை பானமான இளநீர், மோர், எலுமிச்சைப் பழச்சாறு, பானகம் போன்றவற்றை அருந்தலாம்.

அதேநேரம், அவற்றில் சேர்க்கப்படும் தண்ணீர் சுத்தமானதாக இருக்க வேண்டும். முடிந்தவரை, இந்தப் பானங்களை நீங்களே வீட்டில் தயார் செய்து அருந்துவது ஆரோக்கியமானது.