இணைய தளத்தில் நாட்டிய தேவதை

-


இந்தி திரை உலகில் என்றும் மாறாத புகழோடு இருந்துகொண்டிருப்பவர், மாதுரி தீட்சித். நடிப்பையும் தாண்டி தனது நடனத் திறமைக்காக வெகுவாக பாராட்டப்படுபவர்.

நடனம் பற்றி அவரோடு பேசுவோம்:

இந்தி திரை உலகின் நாட்டியத் தேவதையாக இருப்பது பற்றி என்ன நினைக்கிறீர்கள்?

நாட்டியத் தேவதை என்ற அடையாளத்தை ஏற்படுத்திக்கொள்ள வேண்டும் என்று நான் ஒரு போதும் விரும்பியதில்லை. நான் எனது குழந்தைப் பருவம் முதலே ஆடிக் கொண்டிருக்கிறேன். யாரையும் கவருவதற்காக நான் ஆடவில்லை. எனக்கு டான்ஸ் பிடிக்கும். நான் ரொம்பவும் ரசித்து செய்யும் கலை இது. எல்லோராலும் நடனம் ஆட முடியும். ஆனால் அதன் மேல் உண்மையான பற்றுக் கொண்டு தீவிரமாக ஆடுபவர்களால்தான் தொழில்முறை நடனக்காரர்கள் ஆக முடியும். எனது நடனத்தை நேசித்ததற்காக திரையுலகுக்கும் எனது ரசிகர்களுக்கும் நான் நன்றிக்கடன் பட்டிருக்கிறேன். ஆனால் நான் ஒன்றை மட்டும் சொல்ல விரும்புகிறேன்– நாம் ஒன்றை உண்மையாக விரும்பினால் மட்டும்தான் அதில் நமது முழுத் திறமையையும் காட்ட முடியும்.

முப்பதாண்டுகளாக திரையுலகில் இருக்கும் உங்களால், இங்கே மாறிவரும் சூழலுக்கு ஏற்ப உங்களை எப்படி மாற்றிக்கொள்ள முடிகிறது?

எல்லா துறைகளிலும் மாற்றம் என்பது இயல்பாக நடந்துகொண்டேதான் இருக்கும். நடனமாகட்டும், திரைப்பட ஆக்கமாகட்டும் அல்லது வேறு எந்த கலை ஆகட்டும், சமூகத்தில் ஏற்படும் மாற்றம் அதில் பிரதிபலிக்கும். எனவே மாற்றத்துக்கு சினிமா மட்டும் விதிவிலக்கல்ல. இந்திய நடன பாணிகளும், மேற்கத்திய நடனமுறைகளும் கலந்த கலவைதான் சினிமா நடனம். புதிய நடன அமைப்பாளர்கள் புதிய முறைகளைக் கொண்டுவருகிறார்கள். பாடல்கள் புதுமையாகப் படம் பிடிக்கப்படுகின்றன. என்னைப் பொறுத்தவரை, நடனம் என்பது ஒரு கலை, நான் ரசிக்கும் விஷயம். எனவே, எல்லாவித நடனமுறைகளும் எனக்குப் பிடிக்கும்.

டி.வி.களில் நடன நிகழ்ச்சிகள் அதிகரித்து வருவது, இந்திய நடனங்கள் உலகப் புகழ் பெற உதவுகிறதா?

வெளிப்படையாகச் சொல்வதென்றால், நானே சில புதிய நடன முறைகளை டி.வி. நிகழ்ச்சிகள் மூலம்தான் அறிந்திருக்கிறேன். மக்கள் நிறைய நடனங்களை அறிந்துகொள்வது டி.வி. நடன நிகழ்ச்சிகள் வழியாகத்தான். இந்திய நடனங்களின் எல்லையை டி.வி. நடன நிகழ்ச்சிகள் விஸ்தரித்திருப்பது உண்மை. இந்த நிகழ்ச்சிகள் மூலம் புதிய திறமையாளர்களும் வெளிச்சத்துக்கு வருகிறார்கள்.

நீங்கள் சினிமாவில் நடன அமைப்பாளராகும் வாய்ப்பு இருக்கிறதா?

நடனம் அமைப்பதை விரும்புகிறேனா என்று எனக்கு உறுதியாக சொல்லத் தெரியவில்லை. ஆனால், கற்பிப்பது எனக்குப் பிடிக்கும். நான் எனது இணையதளம் மூலம் பல விஷயங்களைக் கற்பித்துள்ளேன். நடனத்தைப் பொறுத்தவரை, நான் அளிக்கும் நடனப் பயிற்சியால் மக்கள் பயன் பெற வேண்டும் என்று ஆசைப்படுகிறேன். எனவே ஆன்லைனில் அதற்கான ஒரு அமைப்பை உருவாக்கும் முயற்சியில் ஈடுபட்டுள்ளேன்.

முழுக்க முழுக்க நடனம் சார்ந்த சினிமா எதிலாவது நடிக்கும் எண்ணமிருக்கிறதா?

இப்போதைக்கு அப்படி எந்த யோசனையும் இல்லை. அதுவும் தவிர, அதற்கு திரைக்கதை பொருத்தமாக அமைய வேண்டும். நடனம் சார்ந்த படம் என்பதாலேயே உடனே சம்மதம் சொல்லிவிட மாட்டேன். எனக்கு ஆர்வமூட்டுவதாக ஒரு கதை அமைந்தால், நிச்சயம் நடிப்பேன். இதுவரை அப்படிப்பட்ட சினிமா எதற்கும் நான் ஒப்புதல் தெரிவிக்கவில்லை.
=
நன்றி- தினத்தந்தி