இட்லி மாவு மிஞ்சிப் போனால்

மீதமான உணவு வகைகளை வீணாக்காமல் மறுபடியும் எப்படிப் பயன்படுத்துவது என்பது பற்றிப் போனவாரம் சில உதாரணங்கள் சொல்லியிருந்தேன். இந்த வாரமும் உதாரணங்கள் தொடர்கின்றன. சாதாரணமாக மீந்து போவதை ப்ரிட்ஜில் வைத்து இரவில் சுடவைத்து மறுபடிப் பரிமாறினால் பலர் அதை விரும்பிச் சாப்பிட மாட்டார்கள். "என்னம்மா... கார்த்தால செய்ததேதானா? போர்...' என்று முனகுவார்கள்.

வீட்டில் பிரெட் வாங்கி வைத்து மிச்சமாகிப் போய்விடும். சில சமயம் வறட்டு வறட்டென்று சாப்பிட முடியாதபடி ஆகிவிடும். இதை அப்படியே வெய்யிலில் வைத்து நன்கு காய்ந்ததும் பொடியாக்கிக் கொண்டு வெஜிடபிள் கட்லெட் செய்யும்போது இந்த பிரெட் பவுடரைச் சேர்த்துக்கொள்ளலாம். ருசியாக இருக்கும்.

இப்படி மீதமான பிரெட்டின் ஓரங்களை வெட்டிவிட்டு வீட்டில் புளித்த மோர் இருந்தால் அதில் ஊறவையுங்கள். ஒரு ஆழாக்குப் புழுங்கல் அரிசியைத் தண்ணீரில் ஊறவைத்து அது நன்கு ஊறிய பின்பு புழுங்கல் அரிசியையும் மோரில் ஊறிய பிரெட்டையும் நன்கு அரைத்துத் தோசையாக வார்க்கலாம். இதைப் புளிக்க வைக்க வேண்டாம். இதனுடன் உளுத்தம்பருப்பு சேர்க்கத் தேவையில்லை.

இந்தக் காலத்தில் பெரும்பாலான வீடுகளில் ஃப்ரிட்ஜ் இருக்கிறது. எனவே இட்லி, தோசைக்கு மாவு அரைத்தால் ஒரு வாரம் வரைகூட ஃப்ரிட்ஜில் வைத்துப் புளிக்காமல் பாதுகாக்க முடிகிறது. ஆனால் இன்றும் ஃப்ரிட்ஜ் இல்லாத வீடுகள் இருக்கின்றன. இந்த மாதிரி வீடுகளில் மாவு மிஞ்சி விட்டால் என்ன செய்வது?

எங்கள் வீட்டில் ஒரு சமையல்கார அம்மாள் இருந்தார். அவர் இது போல மிஞ்சிய மாவை வித்யாசமாகப் பயன்படுத்திப் புதிய பண்டங்கள் செய்வார். மாவு அரைத்த மறுநாள் இட்லி செய்வார். அடுத்த நாள் மீதமுள்ள சற்றே புளித்த மாவுடன் பெருங்காயம், பச்சை மிளகாய், கடுகு தாளித்து ஊத்தப்பமாகச் செய்வார்.

இப்படிச் செய்த பின்னும் கொஞ்சமாக மீதியிருக்கும். அந்த மாவுடன் மறு நாள் கடலைப்பருப்பு, பயத்தம்பருப்பு இரண்டையும் ஊறவைத்து மிக்ஸியில் போட்டு அரைத்துக் கலந்து கொள்வார். இதை இட்லியாக ஊற்றலாம். இந்த இட்லி புளிப்பில்லாமல் புதுச்சுவையுடன் இருக்கும். அத்துடன் இதில் நிறைய புரதச் சத்து இருப்பதால் உடலுக்கும் ஆரோக்கியம் தரக் கூடியது.

இந்த மாவுடன் முருங்கைக் கீரையையும் சேர்த்து அடையாகச் சுடலாம். இந்த மாவுடன் கொஞ்சம் மசாலா சேர்த்து மசாலா இட்லியாகவும் செய்யலாம். மசாலா இட்லி என்பது கொஞ்சம் வித்யாசமான விஷயம் அல்லவா? இதுபோல் மீதமாகும் மாவில் வெங்காயம், தக்காளியை மிக்ஸியில் அரைத்து ஊற்றித் தாளித்து இட்லி அல்லது ஊத்தப்பமாகவும் வார்க்கலாம்.

ம்ம்... நல்ல போஸ்ட்.