'லாக்கர்' எனப்படும் 'பாதுகாப்புப் பெட்டகம்' குறித்த விவரங்களை அறிவோம்...

இன்றைய வங்கிகள், தங்களின் பல கிளைகளில் 'லாக்கர்' எனப்படும் பாதுகாப்புப் பெட்டக வசதியை அளிக்கின்றன. லாக்கரை பொறுத்தவரை வங்கி- வாடிக்கையாளர் இடையே, ஒரு வீட்டுச் சொந்தக்காரருக்கும், வாடகைக்குக் குடியிருப்பவருக்கும் உள்ள அதே தொடர்புதான் இருக்கிறது.

வங்கிக் கிளைகள் தங்களுடைய பண இருப்பையும், விலை மதிப்புள்ள ஆவணங்களையும் பாதுகாக்க தகுந்த கட்டமைப்பை ஏற்படுத்தியே ஆக வேண்டும். அதனால், அதே அமைப்பைக் கொண்டு வாடிக்கையாளர்களின் விலைமதிப்புமிக்க பொருட்களையும் பாதுகாப்பாக வைக்க வசதி செய்து தர முடிகிறது.

வங்கிகள் லாக்கர் பெட்டியை வாடிக்கையாளருக்கு நீண்ட கால வாடகைக்குத் தருகின்றன. பொதுவாக வாடிக்கையாளர்கள் லாக்கர்களில் விலைமதிப்புள்ள நகைகள், முக்கியமான ஆவணங்கள் போன்றவற்றை வைக்கின்றனர். வாடகை கட்டவில்லை என்றால் நோட்டீஸ் கொடுத்துவிட்டு லாக்கர் பெட்டியை உடைத்துக் காலி செய்யும் அதிகாரம் வங்கிக்கு உள்ளது.

இந்தச் செலவு ஏற்படலாம் என்பதால் வங்கிகள் ஒரு குறிப்பிட்ட தொகையை லாக்கர் எடுப்பவர்களிடம் வைப்புத்தொகையாக வசூலிக்கின்றன. லாக்கர் பொருட்களை நம் காலத்துக்குப் பிறகு அதை நிர்வாகம் செய்யக்கூடிய தக்க நபருக்கு சென்றடையச் செய்ய 'நாமினேஷன்' வசதி உள்ளது.

தற்போது, வாடிக்கையாளர்கள் பலரும், பாதுகாப்பு கருதி பாதுகாப்புப் பெட்டக வசதியை நாடுகின்றனர். தங்களின் விலைமதிப்புமிக்க நகை போன்ற பொருட்களை லாக்கரில் வைத்தால், கொள்ளை பயமின்றி நிம்மதியாக இருக்கலாம் என்று எண்ணுகிறார்கள்.

வாடிக்கையாளர்களின் இத்தகைய மனப்போக்கு, தேவை காரணமாகத்தான் சிறுநகரங்களில் உள்ள வங்கிகளில் கூட 'லாக்கர்' வசதி ஏற்படுத்தப்பட்டிருக்கிறது.

வங்கிகள் மட்டுமின்றி, தனியார் சிலரும் பாதுகாப்புப் பெட்டக வசதியை ஏற்படுத்தியிருக்கிறார்கள். ஆனால் அவர்களின் நம்பகத்தன்மை, பாதுகாப்புத் திறன் ஆகியவற்றை அறிந்து தனியார் லாக்கரை பொதுமக்கள் பயன்படுத்திக்கொள்ளலாம்.