மே 20ம் தேதி கோடை விழா துவங்குகிறது: 5 நாட்கள் நடக்கிறது

**ayyasamy ram** · **ayyasamy ram** Wed 6 May 2015 - 11:04

கடலூர் வெள்ளிக் கடற்கரையில் மே-20 முதல் 24-ம் தேதி வரை 5 நாட்கள் கோடைவிழா நடைபெறும் என்று ஆட்சியர் தெரிவித்தார்.

கடலூரில் கோடை விடுமுறையை முன்னிட்டு ஆண்டுதோறும் மே மாதம் கோடை விழா நடைபெறும். கடந்தாண்டு தேர்தலை முன்னிட்டு இவ்விழா நடத்தப்படாததால் நடப்பாண்டில் கோடை விழாவை நடத்த வேண்டுமென கோரிக்கை எழுப்பப்பட்டது. இதனையடுத்து, கோடை விழா நடத்துவதற்கான ஏற்பாடுகளில் மாவட்ட நிர்வாகம் ஈடுபட்டது.

இதுதொடர்பாக கோடைவிழா நடத்தப்படும் கடலூர் தேவனாம்பட்டினத்திலுள்ள வெள்ளிக்கடற்கரையில் உள்ள மேடை, வண்டி நிறுத்தும் இடங்கள், பெரியார் கல்லூரி வளாகம், கடற்கரை பூங்காக்கள் மற்றும் படகுகள் நிற்கும் பகுதி முதலியவற்றை மாவட்ட ஆட்சியர் எஸ்.சுரேஷ்குமார் செவ்வாய்க்கிழமை பார்வையிட்டு ஆய்வு செய்தார்.

பின்னர் அவர் கூறுகையில், கடலூர் நகரில் கோடை விடுமுறையை முன்னிட்டு வெள்ளிக்கடற்கரையில் 2015-ம் ஆண்டிற்கான கோடை விழா கொண்டாட்டம் மே.20-ம் தேதி துவங்கி 24-ம் தேதி வரையில் 5 நாட்கள் மாலை 4 மணி முதல் இரவு 10 மணி வரை நடத்த மாவட்ட நிர்வாகத்தால் முடிவு செய்யப்பட்டுள்ளது. அதன்படி கோடைவிழா நிகழ்ச்சியில் பல்வேறு துறைகள் சார்பாக அரசு திட்டங்கள் குறித்த அரங்குகளும், பாரம்பரிய உணவு வகைகள் விற்பனை, ஒவ்வொரு நாளும் பள்ளி, கல்லூரி மாணவர்களின் கலைநிகழ்ச்சிகள், கலைஞர்கள் பங்கேற்கும் மெல்லிசை நிகழ்ச்சி, மந்திரக்காட்சி, கிராமியக் கலைகள் நடைபெறும்.

நடப்பாண்டு முதல் புத்தகக் கண்காட்சி பெரியார் கலைக்கல்லூரிக்குள் மே.20ம் தேதி முதல் 10 நாட்கள் நடைபெறும். இக்கண்காட்சியில் பெண் குழந்தையை போற்றுவோம் என்ற வகையில் பெண்களுக்கு சிறப்புத்தள்ளுபடி வழங்கப்படும்.

இவ்வாண்டு கோடைவிழாவில் புதிதாக பாராசெயிலிங், ஸ்கூபாடைவிங், கயாக், கனோயிங் போன்ற நீர்சாகச விளையாட்டுகளும் இடம்பெறுகிறது. தினமும் மணல் சிற்பக்காட்சி, பல்வேறு விளையாட்டு போட்டிகள் மற்றும் அலங்கார படகுகளின் அணிவகுப்பு வெள்ளிக்கடற்கரையில் நடைபெறவுள்ளன.

மேலும், விழாவினை முன்னிட்டு கடற்கரையிலுள்ள செயற்கை நீருற்று, பூங்காங்கள் பராமரிக்கப்பட்டு கடலூரின் சரித்திரப் பெருமையை விளக்கும்வகையில் காட்சிப்படங்கள் நிகழ்வுகளுடன் வடிவமைக்கப்படவுள்ளன.

5 நாட்கள் நடைபெறும் இந்த விழா பொதுமக்களுக்கு மிகவும் பயனுள்ள பொழுதுபோக்காக அமையும் என்றார்.

இந்த ஆய்வின் போது மாவட்ட வருவாய் அலுவலர் கோ.விஜயா, மாவட்ட ஊரக வளர்ச்சி முகமை திட்ட இயக்குநர் மகேந்திரன், கூட்டுறவு சங்கங்களின் மண்டல இணைப் பதிவாளர் பா.ரேணுகாம்பாள், கோட்டாட்சியர் மோ.ஷர்மிளா, சுற்றுலா அலுவலர் தமிழரசி, பொதுப்பணித்துறை செயற்பொறியாளர் கலையரசு உள்பட அனைத்துத்துறை அலுவலர்கள் பங்கேற்றனர்.
-
தினமணி

மே 20ம் தேதி கோடை விழா துவங்குகிறது: 5 நாட்கள் நடக்கிறது

மே 20ம் தேதி கோடை விழா துவங்குகிறது: 5 நாட்கள் நடக்கிறது

மறுமொழி எழுத நீங்கள் உறுப்பினராக இருக்க வேண்டும்..

உறுப்பினராக பதிவு செய்க

உள்நுழைக