அமெரிக்காவில் துப்பாக்கித் தாக்குதல்: ஐ.எஸ். பயங்கரவாதிகள் பொறுப்பேற்பு

-
அமெரிக்காவில், சர்ச்சைக்குரிய கேலிச் சித்திரப் போட்டியிடையே ஞாயிற்றுக்கிழமை நிகழ்த்தப்பட்ட துப்பாக்கித் தாக்குதலுக்கு இஸ்லாமிய தேச (ஐ.எஸ்.) பயங்கரவாத அமைப்பு பொறுப்பேற்றுள்ளது.
அந்த நாட்டின் டெக்ஸாஸ் மாகாணம், கார்லண்ட் நகரில் முகமது நபியின் உருவத்தை கேலிச் சித்திரமாக வரையும் போட்டி ஞாயிற்றுக்கிழமை நடைபெற்றது.
-
கருத்துச் சுதந்திரத்தை வலியுறுத்தும் வகையில், சர்ச்சைக்குரிய இந்தப் போட்டியை "அமெரிக்க சுதந்திரப் பாதுகாப்பு இயக்கம்' என்ற அமைப்பு நடத்தியது.
-
அந்த நிகழ்ச்சி நடைபெற்ற கட்டடத்துக்கு வெளியே, நிகழ்ச்சி முடிவடைவதற்கு சற்று முன்னதாக காரில் வந்த இருவர், அங்கிருந்த பாதுகாவலரை நோக்கித் துப்பாக்கியால் சுட்டனர்.
-
இதில், அந்தப் பாதுகாவலர் காயமடைந்தார்.
அதனைத் தொடர்ந்து உடனடியாக அந்த இடத்தை சுற்றிவளைத்த கார்லண்ட் நகர காவல்துறையினர், துப்பாக்கிச் சூடு நடத்திய இருவரையும் சுட்டுக் கொன்றனர்.
-
இந்த நிலையில், சிரியாவில் இயங்கி வரும் ஐ.எஸ். அமைப்பின் வானொலியில் செவ்வாய்க்கிழமை ஒலிபரப்பிய அறிவிப்பில் அந்த அமைப்பினர் கூறியதாவது:
-
நமது மத அரசின் இரண்டு போர் வீரர்கள் அமெரிக்காவின் டெக்ஸாஸ் மாகாணத்திலுள்ள கார்லண்டில் தாக்குதல் நிகழ்த்தியுள்ளனர்.
இன்னும் இதைவிட பயங்கரமான, அதிக பாதிப்பை ஏற்படுத்தும் தாக்குதல்கள் அமெரிக்க மண்ணில் நிகழ்த்தப்படும்.
-
அமெரிக்காவிலுள்ள இஸ்லாமிய தேச வீரர்கள், வலி என்றால் என்ன என்பதை அமெரிக்கர்களுக்கு புரிய வைப்பார்கள் என்று அந்த வானொலியில் தெரிவிக்கப்பட்டுள்ளது.
உலகம் முழுவதிலும் மதப் பயங்கரவாதிகளின் நடவடிக்கைகளைக் கண்காணித்து வரும் "சைட்' அமைப்பு இந்தத் தகவலை வெளியிட்டுள்ளது.
-
எனினும், ஐ.எஸ். அமைப்புக்கும், தாக்குதல் நிகழ்த்திய இருவருக்கும் உள்ள நேரடித் தொடர்பு இதுவரை உறுதி செய்யப்படவில்லை.
-
அடையாளம் தெரிந்தது:-

இதற்கிடையே, இந்தத் தாக்குதலை நிகழ்த்திய இருவர் குறித்த விவரங்களையும் போலீஸார் திங்கள்கிழமை வெளியிட்டனர்.
எல்டன் சிம்ஸன் (31), நாதிர் சூஃபி (34) இருவரும் அந்தத் தாக்குதலை நிகழ்த்தியதாகவும், அவர்கள் இருவரும் சிறிது காலம் முன்பு ஒரே அறையில் வசித்து வந்ததாகவும் அவர்கள் தெரிவித்தனர்.
ஃபீனிக்ஸ் நகரைச் சேர்ந்த அந்த இருவரின் இருப்பிடங்களையும் போலீஸார் சோதனையிட்டு வருகின்றனர்.
-
இவர்களில், எல்டன் சிம்ஸன் பயங்கரவாதச் செயல்களில் ஈடுபடுவார் என்ற சந்தேகத்தின் பேரில், கடந்த 2006-ஆம் ஆண்டு முதலே போலீஸாரின் கண்காணிப்பில் இருந்த வந்தது குறிப்பிடத்தக்கது.
-
தினமணி