பாறைகள் போர்த்திய பூமி

பூமியின் மேற்பகுதி ஆசியா, ஆப்பிரிக்கா, அமெரிக்கா, ஆஸ்திரேலியா போன்ற கண்டங்களையும், கடல் படுகைகளையும் கொண்டது. இது பாறைகளால் ஆனது. இதனை பாறைக்கோளம் என்று அழைக்கிறார்கள். கண்டங்களில் உள்ள நிலம் சராசரியாக 40 கி.மீ. தடிமனுடையது. கடலில் இருக்கும் நிலமோ 10 முதல் 12 கி.மீ. தடிமன் கொண்டதாக உள்ளது.

இந்த பாறைகள் தூளாகி பொடியாகி, வானிலை, காலநிலை, ஈரப்பதம், பாறைகளின் இடுக்குகளில் வேர் நுழைத்துப் பரவும் தாவரங்களின் வளர்ச்சி போன்ற பல காரணங்களால் மணலாக மாறுகிறது. கோடை வெயிலில் சூடான பாறைகள் திடீர் மழையில் குளிர்விக்கப்படும் போது, வெடிப்புகள் ஏற்பட்டு கீறல்கள் விழுகின்றன. ஆயிரக்கணக்கான ஆண்டுகள் இது நீடிப்பதால் அவை நொறுங்கிச் சிறு துகள்களாகும்.

இதேபோல பாறைகளுக்கு நடுவில், இடுக்குகளில் தேங்கி நிற்கும் நீர், குளிர் காலத்தில் உறைந்து பாறைகளில் கீறல் வெடிப்பு ஏற்படும். இப்படி ஒன்றுக்கொன்று தொடர்ந்து ஏற்படும் சிதைவுகளால் மண் நிறைந்த நிலப்பரப்பு உருவானது.

பாறைகளை கனற்பாறை, படிவப்பாறை, உருமாற்றுப்பாறை என்று மூன்று வகைகளாக பிரிக்கிறார்கள். பூமியின் உள்பகுதியில் இருக்கும் ‘மாக்மா‘ பாறைக்குழம்புகள் வெளியாகி உறைவதால் பாறைகள் கனற்பாறைகள் ஏற்பட்டன. பூமியின் மேற்பகுதியில் காணப்படும் 95 சதவீத பாறைகள் இந்த வகையை சார்ந்தவைதான். கனற்பாறையையும் மூன்று வகையாக பிரிக்கிறார்கள். கிரானைட், பாசல்ட், எரிமலை பாறை என்பன. எல்லா கண்டங்களிலும் அதிகம் இருப்பது கிரானைட் என்ற கருங்கல் பாறைகள் தான். கடலின் அடித்தளத்தில் உள்ளவை பெரும்பாலும் பாசால்ட் என்ற மிருதுப்பாறைகளே ஆகும். கடல் அடித்தளங்களில் காணப்படும் படிவங்களே படிவப்பாறைகள் எனப்படுகின்றன.

நிலக்கரி, எண்ணை மற்றும் விலைமதிப்பற்ற கனிமங்கள் கிடைப்பது இந்த படிவப் பாறைகளில் தான். அழுத்தம், வேதியியல் வினையால் உருத்திரிந்து உண்டான பாறைகளை உருமாற்றப் பாறைகள் என்கிறார்கள். இந்த பாறைகளில் தான் சுண்ணாம்புக்கல் அதிக வெப்பத்தால் உருமாறி பளிங்குக் கல்லாக மாறுகிறது. இப்படியாக பூமியை மூடியிருப்பவை, பாறைகளே.

நன்று சிவா....நான் புவியியலில் Ph D வரை படித்தவன் என்பதால் இதை விருப்பத்துடன் படித்தேன்.