புத்திசாலி நரி

வயதான நரி ஒன்று காட்டில் வசித்து வந்தது. அதற்கு முன்போல ஓடியாடி இரைதேட முடியவில்லை. சிறிது ஓடினாலே மூச்சு வாங்கியது. எனவே நிம்மதியாக பசியாற முடியாமல் தவித்து வந்தது.

அப்போது அது ஒரு புலியைக் கண்டது. கொழுத்த மான் ஒன்றை வேட்டையாடி புலி புசித்துக் கொண்டிருந்தது.

புலி தின்றதுபோக மிச்சத்தை உண்டு பசியாறுவதற்காக காத்திருந்தது நரி. திடீரென அதற்கு ஒரு யோசனை தோன்றியது.

‘புலி நல்ல இளமையாக இருக்கிறது. நன்கு வேட்டையாடி பசியாறு கிறது. இதனுடன் நாம் சேர்ந்து கொண்டால் நமக்கு தினமும் நல்ல விருந்து கிடைக்கும். ஆனால் பக்கத்தில் போனாலே ஒரேயடியில் நம்மை கொன்று விடுமே. இதனை வேறுவழியில்தான் நம் வழிக்கு கொண்டு வர வேண்டும்’ என எண்ணியது.

அதற்கு ஒரு தந்திரத்தை கையாள முடிவு செய்தது. உடனே, மான் இறைச்சியை சாப்பிட்டுக் கொண்டிருந்த புலியின் அருகே சென்றது.

‘ஏய், புலியே! எனக்கும் இறைச்சியில் பங்கு கொடு. இல்லாவிட்டால் நான் உன்னை கற்சிலையாக மாற்றிவிடுவேன். அதோ பார் எனக்கு இரை தர மறுத்த யானை ஒன்று கல்லாக மாறி நிற்பதை...’ என்ற நரி, பக்கத்தில் யானைவடிவில் இருந்த பாறையை காட்டி புலியை பயமுறுத்தியது.

இதைக் கேட்ட புலிக்கு ஆச்சரியமாக இருந்தது.

‘நீ நிஜமாகவே விலங்குகளை கல்லாக மாற்றிவிடுவாயா?’ என்றது புலி.

‘ஆமாம், உனக்கு நம்பிக்கை
இல்லாவிட்டால் என்னுடன் வா, மற்ற எல்லா விலங்குகளும் என்னைக் கண்டு அஞ்சுவதை நீயே பார்க்கலாம்’ என்றது நரி.

புலி நரியுடன் சென்றது.

புலி வருவதைக் கண்ட மற்ற மிருகங்கள் பயந்து ஓடின. ஆனால் புலியோ, நரியைப் பார்த்துதான் மற்ற மிருகங்கள் அஞ்சுவதாக நினைத்துக் கொண்டது.

இப்போது நரி பேசியது, ‘பார்த்தாயா, என் பலத்தை, நீ என்னோடு விருந்தை பகிர்ந்து கொள்வாயென்றால் உன்னை விட்டுவிடுகிறேன். இல்லாவிட்டால் நீ கல்லாக மாற்றப்படுவாய்’ என்றது.

மற்ற விலங்குகள் பயந்து ஓடியதையும், நரியின் கிலியூட்டும் பேச்சையும் கண்டு அஞ்சியது புலி. ‘பலமான நரியை நாம் பகைத்துக் கொள்ள வேண்டாம்’ என எண்ணியது.

உடனே அது, நரியுடன் உணவை பகிர்ந்து கொள்ள சம்மதம் தெரிவித்தது.

மான் இறைச்சியை இரண்டும் தின்று பசியாறின.

அத்துடன் ‘இன்னும் சில மாதங்களுக்கு நீ என்னுடன் உணவை பகிர்ந்து கொள்ள வேண்டும். இல்லாவிட்டால்...’ என்ற நரி, யானை வடிவ பாறையைக் காட்டியது.

புலியும் பயத்துடன் நரிக்கு தினமும் உணவு தர சம்மதித்து தலையாட்டியது.

வயதான நரியோ, புலியின் தயவில் நிம்மதியாக பசியாறி வாழ்வைக் கழித்தது.

மாமா அங்கள், என்னை நரியாக்கி இப்படி ஒரு கதையை தந்துவிட்டார் எங்கள் மாமா அங்கள். எங்க மாமா
அங்களுக்கு தெரியும், புலி வயசானும் புத்திசாலி தான்னு. சரி தானே மாமா அங்கள்?