வாய்ப்புகளைத் தேடிப் போவதில்லை: சதா

-
ஷங்கர், விக்ரம் என்று பிரம்மாண்டக் கூட்டணியில் கைகோர்த்த சதாவுக்கு, ரொம்ப நாட்களாகத் தமிழில் வாய்ப்புகள் இல்லை. இப்போது வடிவேலுவின் ‘எலி’ படத்தில் ஒரு பாடலுக்கு ஆட்டம் போடுகிறார் என்றதும் பலருக்கும் ஆச்சரியமோ, ஆச்சரியம்! என்னதான் ஆச்சு இந்த சதாவுக்கு. தமிழ்ச் சினிமாவில் ஆறேழு ஆண்டுகளாக ஆளையே காணோமே? “அவ்வளவு இடைவெளி ஏற்படவில்லை. ‘உன்னாலே உன்னாலே’ படம் வெளியானதைக் கணக்கு பண்ணி ஆறேழு வருடம்னு சொல்லிட்டீங்க போல?அடுத்து ஆர்.கே ஜோடியா ‘புலிவேஷம்’ படத்துல நடிச்சேன். மாதவன் ஜோடியா ‘நான் அவள் அது’ படத்துல நடிச்சேன். ஆனால் அந்தப் படம் வெளியாகவில்லை. அதுக்கு நான் என்ன பண்ண முடியும்? “இந்த இடைவெளியில சினிமா ரொம்ப மாறிடுச்சு.

என்னைத் தேடி வந்தவங்க எல்லோருமே புதுமுக இயக்குநர், புதுமுக தயாரிப்பாளர், புதுமுக நடிகர்கள். இப்படியே வந்தாங்க. ‘ஏதோ ஒரு படம். நடிச்சா போதும்’னு ரிஸ்க் எடுக்க நான் விரும்பலை. தவிர, நான் யார்கிட்டேயும் வாய்ப்புக்காக நிற்க மாட்டேன். என்னுடைய முதல் பட வாய்ப்பே தன்னால் என்னைத் தேடித்தான் வந்தது.

சுருக்கமா சொல்லணும்னா, நான் எப்பவும் திரையில் தெரிஞ்சுக்கிட்டே இருக்கணும்னு விரும்புற நடிகை கிடையாது. கிடைக்கிற வாய்ப்புகளைப் பயன்படுத்த நான் நானாக இருந்தா போதும்.”

அப்புறம் ஏன் ‘மதகஜராஜா’ படத்துல ஒரு பாட்டுக்கு நடனம், இப்போ ‘எலி’யில… இனி இப்படித்தான்னு முடிவெடுத்துட்டீங்களோ?” “அப்படியில்லை… ‘மதகஜராஜா’வுல ஒரு பாட்டுக்கு ஆடினேன், சரி. ‘எலி’ படத்துல நான் முக்கியமான பாத்திரத்தில் நடிச்சிருக்கேன். 1960களில் நடக்கும் கதை. இதுவரை இந்த மாதிரி படத்துல நான் நடிச்சதே இல்லை. அதனால, சில நிபந்தனைகளோடு நடிக்க சம்மதிச்சேன்.”