அழகிய கிணறு!

ஒரு கிணற்றை பார்த்தால், நாம் உடனே இரண்டு காரியங்களை செய்வோம். ஒன்று அதனை எட்டிப் பார்த்து எவ்வளவு ஆழம் என பார்ப்போம்; இரண்டாவது அதில் தண்ணீர் உள்ளதா என பார்ப்போம்!

இந்தியாவின் கிணறுகள் பொதுவாக குடிப்பதற்கும், குளிப்பதற்கும் மற்றும் பாசனத்திற்கு பயன்படும் வகையில் அமைக்கப்பட்டிருக்கும். இவற்றில் அபூர்வமாக வேலைபாடுகள் செய்யப் பட்டிருக்கும். அடியிலிருந்து மட்டம் வரை செங்கல்லால் கட்டி, மேலே பயன்படுத்தும் இடத்தில் சிமெண்ட் பூசியிருப்பர்.

ஆனால், "கிணறுகளுக்கெல்லாம் ராணி' என அழைக்கப்படும் சிறப்பு கிணறு ஒன்று அகமதாபாத்திலிருந்து சுமார் 120 கிலோ மீட்டரில் பதான் பகுதியில் அமைந்துள்ளது. இது கிட்டத்தட்ட ஆயிரம் ஆண்டு பழமை யான கிணறு. இன்றும் தண்ணீர் உள்ள கிணறு.

பதான் பகுதியை கி.பி.1000ம் ஆண்டு வாக்கில் சோலங்கி வம்சத்தினர் ஆள ஆரம்பித்தனர். உண்மையில் இந்த வம்சத்தை மூலராஜ் என்பவர் துவக்கி வைத்தார். அவருடைய மகன் "பீம்தேவ்!'

இந்த பீம்தேவ் மீது அபார அன்பு கொண்டவர் அவர் மனைவி உதயா மதி. (பீம்தேவ் 1022-1063ம் ஆண்டு காலகட்டங்களில் ஆண்டவர்) தன் கணவரின் நினைவாக இவருடைய மனைவி உதயா மதி ஒரு கிணற்றை கட்டினார். இதற்கு கரம்தேவ் மன்னரும் உதவினார்.

இந்த கிணறு பற்றிய குறிப்பு; ஜைன சன்யாசி எழுதிய ஒரு தொகுப்பில் உள்ளது. அவர் இந்த கிணற்றை 1304ல் கண்டதாக குறிப்பிட்டுள்ளார்.

ஆனால், ஒரு காலகட்டத்தில், இந்த பகுதியில் ஓடிக்கொண்டிருந்த சரஸ்வதி நதியின் வெள்ளத்தால் இந்த பகுதியே மண்மூடிப் போனது. இதில் கிணறும் காணாமல் போனது.

1980ல் இந்திய தொல்பொருள் இலாகா சிரமப்பட்டு இந்த கிணறை தேடி கண்டுபிடித்து, மண்ணை அகற்றி இதனை வெளிப்படுத்தியது.ஒரு கிணற்றுக்கு இப்படியொரு, கலையம்சமா என வியக்க வைத்தது.

இந்த கிணறு ஏழு அடுக்கு கொண்டது. உச்சியில் ஆகட்டும்... நடுநிலைகளில் ஆகட்டும், நடமாட ஏதுவாய் நீண்ட தாழ்வாரங்கள் தூண்களால் தாங்கப்பட்டு அமைக்கப்பட்டுள்ளது.
முதலில் செங்கற்களால் முழுமையாக கட்டப்பட்டு, பிறகு கற்களில் கலையம்சம் பொருந்திய சிலைகள் வடிக்கப்பட்டு அவை வழி நெடுக பொருத்தப்பட்டன.

இதில் விஷ்ணுவின் 10 அவதாரங்களையும் காணலாம். ராமாயண, மகாபாரத காட்சிகளும் உண்டு.

மேலும் புத்தர்... சாதுக்கள்... பிரபல பிராமணர்கள் மகிஷாசுரமர்தனி, வராகி, நாக கன்னிகைகள், யோகினிகள், 16 வித்தியாசமான போஸ்களில் அப்சரஸ்கள் என 800க்கும் அதிகமான சிற்பாய்களை இங்கு அழகு பிரதிபலிக்க வழிநெடுக காணலாம். கடைசியாக தண்ணிக்கு முன் விஷ்ணுவை, பலதலை பாம்பின் மீது பள்ளி கொண்ட நிலையில் காணலாம்.

இந்த அற்புத கிணறை "யுனெஸ்கோ' உலக பாரம்பரிய இடங்களில் ஒன்றாக 2014ம் ஆண்டு ஜூன் 22ம் தேதியன்று ஏற்றது.

இந்த கிணற்றை தற்போதுதான் பதான் மோகன் நகர் சொசைட்டி பராமரித்து வருகிறது. இதனை காலை 8மணி முதல் இரவு 7 மணி வரை காணலாம்.

இந்த தொன்மையான புனிதம்மிக்க கிணற்றின் நீளம் 64 மீட்டர் அகலம் 20 மீட்டர், ஆழம் 27 மீட்டர்... இந்த நீள அகலம் சுற்றுப் பகுதிகள் இணைந்தது.

இதன் மேற்பகுதி சற்று உடைந்திருப்பினும் பெரும்பாலானவை இன்றும் சிறப்பாக உள்ளதால், இதனை காண வேண்டியது மிக அவசியம். அப்சரஸ்களின் 17 போஸ்களை இன்று பூராவும் பார்த்துக் கொண்டே இருக்கலாம். பெரிய சிலைகள் தவிர்த்து, மிகச் சிறியவையும் கூட கொள்ளை அழகு...! செய்த சிற்பிகளுக்கு மகுடமே சூட்டலாம்!

ராஜி ராதா