டெல்லி சட்ட மந்திரியின் எல்.எல்.பி சான்றிதழ் போலி என அம்பலம்

**சிவா** · **சிவா** Tue Apr 28, 2015 5:40 pm

டெல்லியில் ஆம் ஆத்மி அரசில் சட்ட அமைச்சராக பதவி வகித்துவரும் ஜிதேந்தர் சிங் தோமரின் எல்.எல்.பி பட்டபடிப்பு சான்றிதழ் போலியானது என்று உயர் நீதிமன்றத்தில் தெரிவிக்கப்பட்டுள்ளதால் ஆம் ஆத்மி கட்சிக்கு கடும் நெருக்கடி ஏற்பட்டுள்ளது.

டெல்லியில் அரவிந்த் கெஜ்ரிவால் தலைமையிலான அரசில் முதல் முறையாக மந்திரியாக பதவி வகிக்கும் ஜிதேந்தர் சிங் தோமர் (48), எல்.எல்.பி பட்டப்படிப்பு சான்றிதழ் போலியானது என்று குற்றச்சாட்டு எழுந்தது. இது தொடர்பாக டெல்லி ஐகோர்ட்டில் தாக்கல் செய்யப்பட்ட மனு தொடர்பாக விளக்கம் அளிக்கு மாறு பீகார் திலக் மஞ்சி பகால்பூர் பல்கலைகழகத்திற்கு கோர்ட் நோட்டீஸ் அனுப்பியிருந்தது.

இந்த நிலையில், நேற்று பீகார் பல்கலைகழகம் டெல்லி ஐகோர்ட்டில் தாக்கல் செய்த பிரமாணப்பத்திரத்தில், தோமரின் பட்டப்படிப்பு சான்றிதழ் போலியானது என்றும் பல்கலைகழக பதிவுகளில் சான்றிதழ் எதுவும் இல்லை. சான்றிதழில் உள்ள வரிசை எண் மற்றொரு நபரின் சான்றிதழுக்குரியது என்று தெரிவித்துள்ளது. இதையடுத்து, தோமர் வரும் ஆகஸ்ட் 20 ஆம் தேதி தனது விளக்கத்தை அளிக்க வேண்டும் என்று நீதிமன்றம் உத்தரவிட்டுள்ளது. முன்னதாக, தோமரின் அறிவியல் பட்டப்படிப்பு தொடர்பாக எழுந்த குற்றச்சாட்டையடுத்து ராம் மனோகர் லோகியா அவாத் பல்கலைகழகத்திற்கு விளக்கம் கேட்டு நோட்டீஸ் அனுப்பியுள்ளது குறிப்பிடத்தக்கது.

டெல்லி சட்ட மந்திரியின் சட்டப்படிப்பு சான்றிதழ் போலி என தெரியவந்துள்ளது டெல்லி முதல் மந்திரி அரவிந்த் கெஜ்ரிவாலுக்கு கடும் நெருக்கடியை கொடுத்துள்ளது. இது தொடர்பாக டெல்லி மாநில காங்கிரஸ் தலைவர் அஜய் மக்கான் கூறியுள்ளதாவது:-பிரஷாந்த் பூஷன் ,மற்றும் ஏனைய தலைவர்கள் மூலம் இந்த விவகாரம் அரவிந்த் கெஜ்ரிவால் கவனத்துக்கு கொண்டு செல்லப்படும். அரவிந்த் கெஜ்ரிவால், தோமரை பதவி நீக்கம் செய்ய மறுத்தால் இதற்கான தார்மீக பொறுப்பை கெஜ்ரிவால் ஏற்க வேண்டும். டெல்லி தலைமை செயலகம் முன்பு நாங்கள் மிகப்பெரும் போராட்டத்தை நடத்துவோம் என்றார்.

அதேபோல், ஆம் ஆத்மி அரசை கடுமையாக விமர்சித்துள்ள பாஜக தலைவர்களில் ஒருவரான மீனாட்சி லேகி கூறியுள்ளதாவது:- “ இது போன்ற நபருக்கு எப்படி சட்ட அமைச்சர் பதவி வழங்கப்பட்டது அவர் தொடர்ந்து இன்னும் ஏன் பதவியில் இருக்கிறார் என்று நாங்கள் கேட்க விரும்புகிறோம் என்றார். ஆனால், இது தொடர்பாக பதிலளித்துள்ள ஆம் ஆத்மி கட்சி, தன் மீதான குற்றச்சாட்டுக்கு நீதிமன்றத்தில் தோமர் பதிலளிப்பார் என்று தெரிவித்துள்ளது.

தினத்தந்தி!