ஜெயலலிதா சொத்து குவிப்பு வழக்கு: பவானி சிங் நியமனம் செல்லாது: உச்ச நீதிமன்றம் உத்தரவு

புதுடெல்லி,
-


ஜெயலலிதா சொத்து குவிப்பு மேல் முறையீட்டு வழக்கில் அரசு வழக்கறிஞர் பவானி சிங் நியமனம் செல்லாது என்று உச்ச நீதிமன்றம் தெரிவித்துள்ளது.

முன்னாள் முதல்–அமைச்சர் ஜெயலலிதா உள்ளிட்டோர் மீதான சொத்து குவிப்பு மேல்முறையீட்டு வழக்கிலும் கர்நாடக ஐகோர்ட்டில் அரசு வக்கீலாக பவானிசிங் ஆஜரானார். அவரது நியமனத்தை எதிர்த்து தி.மு.க. பொதுச் செயலாளர் அன்பழகன் சுப்ரீம் கோர்ட்டில் மனு தாக்கல் செய்தார்.அதை விசாரித்த நீதிபதிகள் மதன் பி.லோகுர் மற்றும் ஆர்.பானுமதி ஆகியோர் முரண்பட்ட தீர்ப்பு வழங்கியதால், மனு மீதான விசாரணை 3 நீதிபதிகள் அமர்வுக்கு பரிந்துரைக்கப்பட்டது. அதன்படி நீதிபதிகள் தீபக் மிஸ்ரா, ஆர்.கே.அகர்வால், பிரபுல்ல சி.பந்த் ஆகியோர் முன்னிலையான அமர்வில் இந்த விசாரணை நடைபெற்றது.

அன்பழகன் தரப்பில் மூத்த வக்கீல் அந்தியார்ஜூனாவும், ஜெயலலிதா சார்பில் வாதாடிய மூத்த வக்கீல் பாலி நாரிமனும் வாதாடினர்.இரு தரப்பு வாதத்தையும் கேட்ட நீதிபதிகள் இன்று தீர்ப்பை வழங்குவதாக அறிவித்து இருந்தனர். அதன் படி இந்த மனு மீதான தீர்ப்பு இன்று வழங்கப்பட்டது.

இதில், அரசு வழக்கறிஞராக பவானி சிங் நியமிக்கப்பட்டது தவறானது. எனவே அவருடைய நியமனம் செல்லாது. அரசு வழக்கறிஞரை நியமிக்க தமிழக அரசுக்கு அதிகாரமில்லை. கர்நாடக அரசுக்குதான் அதிகாரம் உள்ளது. எனினும் வழக்கு விசாரணை முடிவடைந்து உள்ள நிலையில், மறு விசராணை தேவையில்லை.  க.அன்பழகன் தரப்பும் , கர்நாடக அரசு தரப்பும் தங்கள் வாதத்தை எழுத்து மூலம் தாக்கல் செய்யலாம். பவானி சிங் எழுத்து மூலம் தாக்கல் செய்த வாதத்தை  நீதிபதி குமாரசாமி ஏற்க கூடாது என்று  நீதிபதிகள் தீபக் மிஸ்ரா, ஆர்.கே.அகர்வால், பிரபுல்ல பந்த ஆகியோ அடங்கிய அமர்வு தீர்ப்பளித்தது.
=
தினத்தந்தி