மீசை முட்கள்..!! -Mano Red

Mano Red · Mano Red Sat Apr 25, 2015 6:30 am

ஏன் என்று தெரியாத
உள்ளக் கிளர்ச்சியொன்று,
மனதின் மேடுபள்ளங்களை
அரைகுறையாய் அலசி
கிளறிவிட்டு சென்றது
பருவத்தின் மீசை முட்களை..!!

இச்சையின்
இளமை அனிச்சைக்கு
இசைந்த எல்லாம்
இன்னும் ஏனோ
அவமானத்தின் எச்சங்களாய்
ஏளனத்தின் விளிம்பில்
ஒருங்கே தலை குவிகின்றன..!!

திரும்பிய இடமெல்லாம்
சோகம் உறிஞ்சிய
நிமிட சந்தோசங்கள் எல்லாம்,
அந்த நிமிடங்களுக்காக
இன்னும் விரல்
சூப்பிக் கொண்டிருக்கின்றன..!!

உள்ளுணர்வொன்று
நாக்கை பிடுங்கி இழுத்து
கேள்வி கேட்டாலும்,
இன்று சரியெனப் பட்டதை
நாளையே
தவறாக்கி விட்டு
தலை சொறிதலுக்குள்
அடங்கிப் போகிறது எல்லாம். !!

நல்ல வேசமெல்லாம்
வெளிச்சத்தில்
உடுத்தி விட்டு,
இருட்டிய நேரத்தில்
இருள் உடை தறித்து
இரண்டும் கெட்ட மனதுடன்
இன்னும் தாடி கோதுகின்றன
மயிர் மழிக்காத முகங்கள் . !!

வெளிச்சம் வந்தும்
பொழுது விடியவில்லை ,
கடிகார அறிகுறியில்
நேர நிமிட முட்களின்
கையும் காலும்
சும்மா இருந்தால்
காலம் எப்படி
சரியான நேரம் சொல்லும்..??