தலைமறைவு குற்றவாளிக்கு அடைக்கலமா? மத்திய ராணுவ மந்திரி வீட்டை சோதனையிட கோர்ட்டு தடை

பனாஜி

தலைமறைவு குற்றவாளிக்கு அடைக்கலம் கொடுத்ததாக கூறப்படும் வழக்கில், மத்திய ராணுவ மந்திரி வீட்டை சோதனையிட கோவா கோர்ட்டு தடை விதித்து உள்ளது.

தலைமறைவு குற்றவாளி
கோவா மாநிலத்தில் உள்ளாட்சித்துறை மந்திரியாக இருந்தவர் பிரான்சிஸ்கோ மிக்கி பச்சேகோ. கோவா விகாஸ் கட்சியின் தலைவர். பாரதீய ஜனதா ஆட்சி செய்யும் கோவாவில் கூட்டணி கட்சியாக உள்ளார்.

கடந்த 2006–ம் ஆண்டு மின்வாரிய என்ஜினீயரை பிரான்சிஸ்கோ மிக்கி பச்சேகோ தாக்கியதாக புகார் எழுந்தது.

இந்த வழக்கை விசாரித்த கோவா நீதிமன்றம், மந்திரிக்கு 6 மாதம் சிறை தண்டனை விதித்து பரபரப்பு தீர்ப்பு கூறியது. மேலும் அவரை கைது செய்ய வாரண்டு பிறப்பிக்கப்பட்டது. உடனே மந்திரி பதவியை ராஜினாமா செய்த பிரான்சிஸ்கோ மிக்கி பச்சேகோ, திடீரென தலைமறைவாகி விட்டார். அவரை தேடும்பணியில் போலீசார் ஈடுபட்டனர்.

மந்திரி வீட்டில் சோதனை நடத்த உத்தரவு
இதற்கிடையே தலைமறைவானவரை தேடும் பணியில் கோவா போலீசார் மெத்தனமாக செயல்படுவதாகக்கூறி சமூக ஆர்வலரும், வழக்கறிஞருமான எயர்ஸ் ரோட்ரிக்ஸ் என்பவர் பனாஜி கோர்ட்டில் மனுதாக்கல் செய்தார். அதில், டெல்லி அக்பர் சாலையில் உள்ள மத்திய ராணுவ மந்திரி மனோகர் பாரிக்கர் வீட்டில் பச்சேகோ பதுங்கி இருப்பதாக குறிப்பிட்டு இருந்தார்.

இதனையடுத்து மத்திய மந்திரி வீட்டை சோதனையிடுவதற்கான உத்தரவை நீதிபதி பிறப்பித்தார். மேலும், பச்சேகோவை கண்டுபிடிப்பது குறித்து காவல்துறை அறிவிப்பு வெளியிட அனுமதி மறுத்த நீதிபதி, அவரை கைது செய்வதற்கான வாரண்டை வருகிற 27–ந்தேதி வரை நீட்டித்து உத்தரவிட்டார்.

உத்தரவுக்கு தடை
மத்திய மந்திரி வீட்டில் சோதனையிட கோர்ட்டு உத்தரவிட்டதால் அரசியல் வட்டாரத்தில் பெரும்பரபரப்பு ஏற்பட்டது. இதனை எதிர்த்து கோவா அரசு மாவட்ட நீதிமன்றத்தில் மேல்முறையீடு செய்தது.

இந்த மனுவை விசாரித்த நீதிபதி பி.வி.சவாய்க்கர், மத்திய மந்திரி பாரிக்கர் வீட்டை சோதனையிடுவதற்கு தடை விதித்து தீர்ப்பு கூறினார்.
-
தினத்தந்தி