சீனாவுக்கு 'இ - டூரிஸ்ட் விசா' வழங்க கடும் எதிர்ப்பு

புதுடில்லி:

சீனாவுக்கு 'இ - டூரிஸ்ட் விசா' வழங்க, வெளியுறவுத் துறைக்கு, இந்திய உளவு அமைப்பு கள் எதிர்ப்பு தெரிவித்து உள்ளன.

ஒரு நாட்டிலிருந்து இன்னொரு நாட்டிற்கு சுற்றுலா அல்லது வேலைக்கு செல்ல விரும்புகிறவர்களுக்கு, 'விசா' வழங்கப்படுகிறது. உதாரணமாக, இந்தியாவிலிருந்து, ரஷ்யா செல்ல விரும்புகிறவர்களுக்கு, ரஷ்யா, விசா வழங்குகிறது.இதன் மூலம், யார், யார் தன் நாட்டிற்கு வந்துள்ளனர்; அவர்கள் எண்ணிக்கை, விவரம் போன்றவற்றை, சம்பந்தப்பட்ட நாடுகள் பராமரிக்க முடியும்.அன்னியச் செலாவணியை அதிகரிக்கவும், சுற்றுலா துறையை மேம்படுத்தவும், விசா கட்டுப்பாடுகளை, மத்திய அரசு, சமீபத்தில் தளர்த்தியது. அதன்படி, 40க்கும் மேற்பட்ட நாடுகளைச் சேர்ந்தவர்கள், தங்கள் நாட்டில் இருந்த படியே, இணையம் மூலம், இ - டூரிஸ்ட் விசா கேட்டு விண்ணப்பித்து, அதற்கான தொகையை, இணையம் மூலமே செலுத்தி, விசா நகலை பெற்றுக் கொள்ள முடியும். இதன், 'பிரின்ட் - அவுட்'டை, இந்திய விமான நிலையங்களில் காண்பித்து, சுற்றுலா மேற்கொள்ளலாம்.
-
இந்த வசதி சமீபத்தில் அறிமுகம் செய்யப்பட்ட போது, சீனா, பிரிட்டன், பிரான்ஸ், இத்தாலி ஆகிய நாட்டினருக்கு, இந்த சிறப்பு சலுகை வழங்கப்படவில்லை.பிரதமர் மோடி, அடுத்த மாதம் சீனா செல்ல உள்ளதை அடுத்து, சீனர்களை மகிழ்விக்கும் விதமாக, இ - டூரிஸ்ட் விசா வசதியை சீனா உட்பட மேற்கண்ட நான்கு நாட்டினருக்கு வழங்க, வெளியுறவுத் துறை முன்வந்தது. அதை அறிந்த இந்திய உளவு அமைப்புகள், அருணாச்சல பிரதேச மாநில விவகாரத்தில், இந்தியாவுக்கு எதிரான நிலைப்பாட்டை கொண்டுள்ள சீனாவுக்கு, இந்த சிறப்பு சலுகை வழங்க வேண்டாம் என, கேட்டுக் கொண்டது.இதனால், இந்த விவகாரத்தில், மத்திய அரசு எந்த முடிவும் எடுக்காமல் உள்ளது.

விஷமச் செயல்:

தங்களின் மிக நெருக்கமான நட்பு நாட்டினர் அல்லது தன் நாட்டின் ஒரு பகுதி தான் என, கருதும் நாட்டினருக்கு, 'ஸ்டாப்பிள்ட் விசா' வழங்கப்படுகிறது.அருணாச்சல பிரதேசத்தை சேர்ந்தவர்களை, தனக்கு மிகவும் நெருக்கமானவர்களாக கருதும் சீனா, அந்த பகுதியினர், சீனாவுக்கு செல்லும் போது, பாஸ்போர்ட்டில் சீன முத்திரை குத்துவதற்குப் பதில், பாஸ்போர்ட் அட்டையில், விசா தாளை, ஸ்டாப்ளர் செய்து அனுப்பி விடுகிறது.இந்த மாநிலத்தைச் சேர்ந்தவர்கள், சீனாவுக்கு சென்றதற்கான அடையாளமே, அவரின் பாஸ்போர்ட்டில் இருக்காது. சீனாவின் இந்த விஷமச் செயலுக்கு, பல ஆண்டுகளாக இந்தியா எதிர்ப்பு தெரிவித்து வருகிறது.
=
தினமலர்