முதுமையில் மூளையின் திறன்

**சிவா** · **சிவா** Wed Apr 15, 2015 4:44 pm

மனிதனின் மூளை விசித்திரமானது. அதைப் பற்றிய கண்டுபிடிப்புகள் இன்றும் முடிவுக்கு வராமல் தொடர்ந்து கொண்டே இருக்கின்றன. மனித மூளை சுமார் 2 கோடி உயிரணுக்களை கொண்டது. மூளை வயது ஆக ஆக ஒரு நாளைக்கு 3 லட்சம் உயிரணுக்கள் இறந்து விடுவதாக விஞ்ஞானிகள் இதுவரை நம்பிக் கொண்டிருந்தனர்.

ஆனால் அது உண்மையல்ல என்பதை ஹெர்பெர்ட் ஹாக் என்ற பேராசிரியர் கண்டுபிடித்திருக்கிறார்.

இதுநாள் வரை மருத்துவ உலகம் நம்பி வந்த கருத்தை தற்போது அவர் மறுத்துள்ளார். மனிதன் சாகும் வரை மூளையில் உள்ள உயிரணுக்கள் வாழ்கின்றன என்று அவர் நிரூபித்துள்ளார். அனைவராலும் ஒப்புக்கொண்டுள்ள மனித மூளையிலுள்ள உயிரணுக்களுக்கு வயதாகி விடுகிறது என்ற கருத்தை பல ஆராய்ச்சியாளர்கள் நெடுங்காலமாகவே மறுத்து வருகின்றனர்.

வயதாகிக் கொண்டே போகும் போது மூளையின் கன அளவு குறைந்து கொண்டே வருகிறது என்பது தான் உண்மை. மூளையில் உள்ள உயிரணுக்களின் எண்ணிக்கை ஒரு போதும் குறைவதில்லை. மாறாக அந்த உயிரணுக்கள் அளவு தான் குறைகிறது என்கிறார், ஹெர்பெர்ட் ஹாக்.

இதுபற்றி அவர் மேலும் கூறுகையில், ‘வயதாகும் போது உடலில் இருக்கும் தண்ணீரின் அளவு குறைந்து கொண்டே வரும். அவ்வாறு குறைந்த நீரை உடல் வைத்திருப்பதால் 60 வயதில் இருந்து மூளையின் அளவு குறைய ஆரம்பிக்கிறது. 80 வயதில் மேலும் 8 சதவீதம் குறைந்து விடுகிறது. இப்படி குறைவதால் மூளையின் எந்த வேலையும் பாதிக்கப்படுவது இல்லை. வழக்கம் போல செயல்பட்டு கொண்டு தான் இருக்கிறது’ என்கிறார்.

மனிதனுக்கு 60 வயதுக்கு மேல் நினைவாற்றல் குறையத் தொடங்குகிறது. நேற்று, கடந்த வாரம் நடந்தவை நினைவில் நிற்பதில்லை. அதே வேளையில் நீண்ட கால நினைவாற்றல், சீரிய சிந்தனை ஆகியவை வயதாவதால் குறைவதில்லை என்பதும் ஆராய்ச்சியின் மூலம் தெரியவந்துள்ளது.

**T.N.Balasubramanian** · **T.N.Balasubramanian** Wed Apr 15, 2015 4:52 pm

விதிமுறைகளுக்கு அப்பாற்பட்டவர்கள் இருப்பது உண்டு .
நம் தமிழ்நாட்டிலும் இருந்தனர் ,இருக்கின்றனர் .
அமரர் ராஜாஜி ஒருவர் .
கலைஞர் கருணாநிதி மற்றவர் .

ரமணியன்

**ayyasamy ram** · **ayyasamy ram** Wed Apr 15, 2015 5:29 pm

அரசியலில் ஆட்சியில் இருப்பவர்கள்
பெரும்பான்மையினர் 60 வயதுக்கு மேற்பட்டவர்களே....!!
-
சாதாரண குமாஸ்தா வேலைக்கே மருத்துவ சான்று
கேட்கிறார்கள்....
-
இப்படி வயதாகியும் பதவியில் ஒட்டிக் கொண்டிருப்பவர்களின்
உடல் தகுதியை முதலில் ஆராய வேண்டும்...!!!!

**krishnaamma** · **krishnaamma** Thu Apr 16, 2015 12:06 am

//மனிதனுக்கு 60 வயதுக்கு மேல் நினைவாற்றல் குறையத் தொடங்குகிறது. நேற்று, கடந்த வாரம் நடந்தவை நினைவில் நிற்பதில்லை. அதே வேளையில் நீண்ட கால நினைவாற்றல், சீரிய சிந்தனை ஆகியவை வயதாவதால் குறைவதில்லை என்பதும் ஆராய்ச்சியின் மூலம் தெரியவந்துள்ளது.//

அதனால் தான் நோய் வந்து படுக்கை இல் கிடப்பவர்கள் பழைய சங்கதிகளை துல்லியாமாக
சொல்கிறார்களோ ? புன்னகை