இந்தியச் சாமியாருக்கு 27 ஆண்டுகள் சிறை: அமெரிக்க நீதிமன்றம் தீர்ப்பு

by **ayyasamy ram** Thu Apr 16, 2015 6:32 am

நியூயார்க்
-
நிதி மோசடி, கருப்புப் பண முறைகேடு உள்ளிட்ட குற்றங்களுக்காக, இந்திய வம்சாவளியைச் சேர்ந்த சாமியார் அண்ணாமலைக்கு, அமெரிக்காவின் ஜார்ஜியா மாவட்ட நீதிமன்றம் 27 ஆண்டுகள் சிறைத் தண்டனை விதித்து தீர்ப்பளித்தது.

"ஒரு மதத்தின் புனிதமான நிலையத்தை தனது சொந்த லாபங்களுக்காக அண்ணாமலை தவறாகப் பயன்படுத்தியுள்ளார்' என்று அமெரிக்க அரசு வழக்குரைஞர் ஜான் ஏ ஹார்ன் தெரிவித்தார்.

யார் இந்த அண்ணாமலை?: "சுவாமிஜி ஸ்ரீ செல்வம் சித்தர்' என்று அழைக்கப்படும் அண்ணாமலைக்கு வயது 49.

இவர் அமெரிக்காவின் ஜார்ஜியா மாவட்டத்தில் ஹிந்து கோவில் ஒன்றை தனது தலைமையில் நிர்வகித்து வந்தார். பக்தர்களுக்கு வழங்கப்படும் ஆன்மீக சேவைகளுக்கு பணம் வசூலிப்பதை அண்ணாமலை வாடிக்கையாகக் கொண்டிருந்தார்.

கடன் அட்டை மோசடி: கோவிலுக்கு நேரடியாக வர முடியாத பக்தர்கள் சிலர், அண்ணாமலையை தொலைபேசியில் தொடர்பு கொண்டு ஆன்மீக ஆலோசனைகளை கேட்பதுடன், சில புனிதப் பொருள்களையும் விலைக்கு வாங்குவர்.

இதற்காக, அவர்களது கடன் அட்டை (கிரெடிட் கார்டு) எண்ணை கேட்டுப் பெற்று, அதில் இருந்து அண்ணாமலை பணம் எடுத்துக் கொள்வர்.

பக்தர்கள் ஒருமுறை தனது கடன் அட்டை விவரங்களைக் கூறி விட்டால் போதும். அடுத்தமுறை அவராகவே எந்தவித அனுமதியும் இன்றி பணம் எடுத்துவிடுவார்.

இது தொடர்பாக, சம்பந்தப்பட்ட வங்கிகளிடம் பக்தர்கள் முறையிடுவர். அப்போது கடன் அட்டையில் இருந்து எடுக்கப்பட்ட பணத்துக்கு போலியான கணக்குகளை அண்ணாமலை சமர்ப்பிப்பார்.

கருப்புப் பண மோசடி: கோவிலுக்கு வருவாயாகக் கிடைத்த பணத்திலும் அண்ணாமலை முறைகேடு செய்தது அம்பலமாகியுள்ளது. கோவிலுக்கு கிடைத்த உண்மையான வருவாய் விவரங்களை அமெரிக்க அரசுக்கு தெரிவிக்காமல், கோவிலின் கருவூலம் திவாலாகிவிட்டதாக பொய்யான ஆவணங்களை சமர்ப்பித்துள்ளார் அண்ணாமலை.

இதுபோன்று, அவர் மீது கூறப்பட்ட அடுக்கடுக்கான மோசடிப் புகார்கள் குறித்து ஜார்ஜியா மாவட்ட போலீஸார் விசாரணை நடத்தினர்.

இந்த வழக்கில் அண்ணமாலை குற்றவாளி என்பதை உறுதி செய்த நீதிமன்றம் அவருக்கு 27 ஆண்டுகள் சிறைத் தண்டனை விதித்து தீர்ப்பளித்தது.

மேலும், நேரடியாகவோ அல்லது இடைத்தரகர்கள் மூலமாகவோ, அண்ணாமலை இனி ஆன்மீகச் சேவையில் ஈடுபடுவதற்கு நீதிமன்றம் தடை விதித்துள்ளது.
=
தினமணி