இந்தியா-பிரான்ஸ் இடையே 17 ஒப்பந்தங்கள் கையெழுத்து

பாரிஸ்: பிரதமர் நரேந்திர மோடியின் பிரான்ஸ் சுற்றுப்பயணத்தில், இந்தியா-பிரான்ஸ் இடையே 17 ஒப்பந்தங்கள் கையெழுத்தாகின. 36 அதிநவீன ரபேல் போர் விமானங்களை பிரான்சிடமிருந்து இந்தியா வாங்க முடிவு செய்யப்பட்டுள்ளது. மேலும், மோடியின் வரவேற்பை ஏற்று, மேக் இன் இந்தியா திட்டத்தில் இந்தியாவிலேயே ஏர்பஸ் விமானங்களை தயாரிக்க ஏர்பஸ் நிறுவனமும் ஆதரவு தெரிவித்துள்ளது. பிரதமர் நரேந்திர மோடி பிரான்ஸ், ஜெர்மனி, கனடா நாடுகளுக்கு 9 நாள் சுற்றுப்பயணம் மேற்கொண்டுள்ளார். இதில் முதல் கட்டமாக, அவர் 4 நாள் பயணமாக பிரான்ஸ் சென்றுள்ளார். நேற்று முன்தினம் பிரான்ஸ் தலைநகர் பாரிசில் நடந்த பல்வேறு நிகழ்ச்சிகளில் அவர் பங்கேற்றார். யுனெஸ்கோ மையத்தில் வெளிநாடு வாழ் இந்தியர்கள் மத்தியில் உரையாற்றினார். பிரான்ஸ் அதிபர் பிரான்காய்ஸ் ஹோலண்டேயுடான முக்கிய சந்திப்பும் நடந்தது. சைனி நதியில் படகில் சென்று, பாரிசின் அழகை ரசித்தபடி இரு நாட்டு தலைவர்களும் பேச்சுவார்த்தை நடத்தினர். இதில், 17 ஒப்பந்தங்கள் கையெழுத்தாகின. நீண்ட காலமாக உடன்படிக்கை ஏற்படாமல் இருந்த ரபேல் போர் விமான ஒப்பந்தத்தில் முடிவு எட்டப்பட்டுள்ளது. முதற்கட்டமாக, பிரான்சிடமிருந்து இந்தியா 36 ரபேல் விமானங்களை வாங்க இரு நாட்டு தலைவர்களிடையே உடன்பாடு ஏற்பட்டுள்ளது. மேலும், டெல்லி-சண்டிகர் இடையே மணிக்கு 200 கி.மீ வேகத்தில் ரயில் இயக்கும் திட்டத்தில் இந்தியாவுடன் இணைந்து ஆய்வில் ஈடுபட பிரான்ஸ் ஒப்பந்தம் செய்துள்ளது.

மகாராஷ்டிரா மாநிலம் ஜெய்த்தாப்பூரில் 6 அணு உலைகளை அமைப்பது, இந்தியா-பிரான்சின் கூட்டுத் தயாரிப்பிலான செயற்கைக்கோளிடமிருந்து தகவல்களைப் பெறுதல், பொருளாதாரத் துறை மேம்பாடு, தகவல் பரிமாற்றம், ஆயுர்வேத மருத்துவம், சுற்றுலா, அறிவியல், தொழில்நுட்பம் உள்ளிட்ட பல துறைகளுக்கான ஒப்பந்தங்களும் கையெழுத்தாகின. இதைத்தொடர்ந்து, பிரதமர் மோடி நேற்று பிரான்சின் டவ்ளவுசில் உள்ள ஏர்பஸ் நிறுவனத்தின் விமான கட்டுமான தளத்திற்கு சென்று பார்வையிட்டார். அங்கு, மோடியை வரவேற்ற ஏர்பஸ் குழும நிர்வாக இயக்குனர் டாம் எண்டர்ஸ் கூறுகையில், ‘பிரதமர் மோடியின் மேக் இன் இந்தியா திட்டத்துக்கு முழு ஆதரவு அளிக்க தயாராக உள்ளோம். அதற்காக, இந்தியாவிலேயே ஏர்பஸ் விமான உற்பத்தியை தொடங்கவும் தயாராக இருக்கிறோம்’ என்று தெரிவித்தார். மோடியின் பிரான்ஸ் பயணம் இன்றுடன் நிறைவடைகிறது. அடுத்ததாக அவர் நாளை ஜெர்மனி சென்றடைகிறார்.