வியக்க வைத்த யானைப்படை

சுமார் ஆயிரம் ஆண்டுகளுக்கு முன்பு வடக்கில் இருந்து யாராவது இந்தியாவுக்குள் நுழைய வேண்டுமென்றால் விண்ணைத்தொட்டு நிற்கும் இமயமலை தொடரை கடந்து தான் வர வேண்டும். இல்லையென்றால், கரை புரண்டு ஓடும் ஆழமான சிந்து நதியை கடக்க வேண்டும். இவை இரண்டுமே சாதாரண காரியமில்லை.

இதனால் வடக்கில் இருந்து படை எடுத்து வந்த மன்னர்கள் நமது நாட்டுக்குள் நுழைய முடியாமல் திரும்பிச் சென்றனர்.

இதையும் மீறி இந்தியாவுக்குள் காலடி எடுத்து வைத்தவர்களின் வயிற்றில் புளியை கரைத்தது இந்தியர்களுக்கு மட்டுமே சொந்தமான யானைப் படைகள். இந்தியாவை ஆண்ட சிற்றரசர்கள் கூட பெரிய யானைப் படைகளை வைத்திருந்தனர்.

யானைகளை பார்த்தறியாத வெளிநாட்டு மன்னர்களுக்கு யானையின் பெரிய உருவமும், அவை கட்டுப்பட்டு, ஆவேசத்துடன் போர்களில் பங்கேற்றதையும் கண்டு வியந்து வெலவெலத்துப் போனார்கள்.

இந்தியாவுக்குள் நுழைய நினைத்த பல கிரேக்க, மங்கோலிய, ஆப்கான், துருக்கி நாட்டு மன்னர்களை விரட்டியடித்தது, யானைகளைப் பற்றிய பயம்தான். தங்களை நோக்கி ஆயிரக்கணக்கான யானைகள் பிளிறிக்கொண்டு புழுதிப் பறக்க ஓடிவருவதாக கற்பனை செய்து கொண்டே தங்கள் தூக்கத்தை தொலைத்தனர். அந்த அளவிற்கு அவர்களை யானைகள் ஆட்டிப் படைத்தன.

போர்க்களங்களில் முதலில் குதிரை படை, அதற்கு அடுத்து காலாட்படை, மூன்றாவதாக யானைப்படை என படைகள் அணிவகுத்து வரும். வெளிநாட்டு மன்னர்கள் ஒருவரை ஒருவர் ஏதாவது விழாக்களில் சந்திக்கும் போது அவர்கள் வியந்து பேசுவது இந்திய அரசர்களின் யானை படைகளை பற்றியதாகத் தான் இருக்கும்.

யானைகள் தங்களது பெரிய கனமான உடலை தூக்கிக்கொண்டு எப்படி இவ்வளவு வேகமாக ஓடுகிறது என்பது அவர்களின் தூக்கத்தைக் கெடுத்த மற்றொரு சந்தேகம். யானைப் படை என்பது இந்திய அரசர்களின் அசைக்க முடியாத மிகப்பெரிய நடமாடும் அரண். கிட்டத்தட்ட ஆயிரம் ஆண்டுகளுக்கு மேலாக இந்தியாவை பல படையெடுப்புகளில் இருந்து இந்த யானைகள் காப்பாற்றி இருக்கின்றன.

இந்த யானை படைகளையும் துவம்சம் செய்து இந்திய மன்னர்களை வெற்றி கொண்டு முதன் முதலாக இந்தியாவில் நுழைந்தவன் தைமூர் என்பது பின்னர் நடந்த கதை.