டாக்டரை தொடர்பு கொள்ளும் ‘பேண்டேஜ்'

உடலில் ஏற்படும் காயம், புண்களுக்கு போடப்படும் பேண்டேஜ் அந்தக் காயம் அல்லது புண்ணை கிருமிகளிடம் இருந்து காத்து, குணப்படுத்தும் வேலையை மட்டும்தானே செய்யும்?

ஆனால் காயம் மோசமானால், தானாகவே டாக்டருக்குத் தெரியப்படுத்தி உடனடியாக அவரை எச்சரித்து சிகிச்சையளிக்கச் செய்யும் 'பேண்டேஜ்கள்' வரவிருக்கின்றன.

மசாசூசெட்ஸ் தொழில்நுட்பக் கல்விமையம் மற்றும் ஹார்வர்டு பல்கலைக்கழகம் இரண்டின் நிதி உதவியுடன் மேற்கொள்ளப்படும் இந்த ஆய்வு, அமெரிக்காவில் உள்ள ஆய்வுக்கூடத்தில் நடைபெற்று வருகிறது.

இன்றைய மருத்துவ சிகிச்சைமுறைகளின் செலவைக் குறைப்பது எப்படி என்பதும், தற்போதைய சிகிச்சையை எவ்வாறு மேம்படுத்துவது என்பதும்தான் இதில் ஈடுபட்டிருக்கும் ஆய்வாளர்களின் முக்கிய நோக்கம். அதன் ஒரு பகுதியாக அவர்கள் இந்த புத்திசாலித்தனமான பேண்டேஜ்களை வடிவமைப்பதில் ஈடுபட்டிருக்கிறார்கள்.

சரி, இந்த ஸ்மார்ட் பேண்டேஜ்களில் அப்படியென்ன தனிச்சிறப்பு அல்லது புத்திசாலித்தனம்?

இந்த பேண்டேஜ்களால் காயம் அல்லது புண்ணின் தன்மையை தொடர்ந்து கண்காணிக்க முடியும்.

அதாவது, இந்த பேண்டேஜில் இருக்கும் பல்வேறு சென்சார்களால், புண்ணில் இருக்கும் ஆக்சிஜனின் அளவு, அதன் அமிலத்தன்மையின் அளவு மற்றும் அதன் வெப்பநிலைமை ஆகிய மூன்று முக்கிய காரணிகளை தொடர்ந்து கண்காணிக்க முடியும்.

புண்கள் அல்லது காயங்கள் மோசமானால் இந்த பேண்டேஜ்களால் உடனடியாக செயல்பட முடியும்.

இந்த பேண்டேஜின் பின்புறத்தில் சிகிச்சைக்கான மருந்துகள் வைக்கப்பட்டிருக்கும். அந்த மருந்தை எந்த அளவுக்கு காயத்தில் அல்லது புண்ணில் செலுத்துவது என்பதை இந்த பேண்டேஜின் பின்புறத்தில் இருக்கும் சிறப்பு வெப்பமானி முடிவு செய்யும். அதாவது இந்த மருந்தைச் செலுத்தவேண்டும் என்று பேண்டேஜ் முடிவு செய்தால், பேண்டேஜின் பின்புறம் சூடாகும், மருந்துத் துகள்கள் சுருங்கும். அப்படி சுருங்கிய மருந்துத்துகள்கள் புண் அல்லது காயத்துக்குள் நேரடியாக செலுத்தப்படும்.

இந்த பேண்டேஜ் தேவைப்பட்டால் தானாகவே டாக்டரையும் தொடர்புகொள்ளும். ஆமாம். இந்த பேண்டேஜ் டாக்டரிடம் இருக்கும் தொலைத் தொடர்புக் கருவிக்கு தொடர்ந்து தகவல்களை அனுப்பக்கூடியது. எனவே, இந்த புண் அல்லது காயத்தில் ஏதாவது பிரச்சினை என்று இந்த பேண்டேஜ் கண்டறிந்தால் அதுகுறித்து உடனடியாக டாக்டரிடம் இருக்கும்.

தொலைத்தொடர்புக் கருவிக்கு தகவல்களை அனுப்பும். உதாரணமாக புண் அல்லது காயத்தில் பாக்டீரிய தொற்று ஏற்பட்டிருக்கிறது என்று இந்த பேண்டேஜ் கண்டுபிடித்து தகவல் அனுப்பினால், உடனடியாக டாக்டர், பேண்டேஜில் இருக்கும் மருந்தின் அளவை அதிகப்படுத்தவோ அல்லது மருந்திடும் கால இடைவெளியை குறைக்கவோ செய்வார். அதன்மூலம் அந்த காயம் அல்லது புண்ணைக் குணப்படுத்தும் சிகிச்சையை தொலைதூரத்தில் இருந்தபடியே டாக்டரால் செய்ய முடியும்.

இனிமேல் எதிர்காலத்தில் இந்த வகையான பேண்டேஜ்களே காயங்களுக்கான சிகிச்சையின் அடிப்படையாக அமையுமா என்று தற்போதைய நிலையில் உடனடியாக சொல்ல முடியாது. காரணம் இந்த பேண்டேஜை உருவாக்கி லாபகரமாக விற்பனை செய்ய முடியுமா என்பது இன்னமும் தெளிவாகவில்லை.

ஆனால், இந்த ஸ்மார்ட் பேண்டேஜ் உருவாக்குவதற்கான ஆய்வின் முடிவுகள் பரிசோதனைக்கூடத்தில் முழு வெற்றி பெற்றால், வர்த்தக ரீதியில் இவை இரண்டே ஆண்டுகளில் சந்தைக்கு வந்துவிடக் கூடும்.

மின்னணுத் தொழில்நுட்பத்தைப் பயன்படுத்தி காயம் மற்றும் புண்களைக் குணப்படுத்தும் மருத்துவ முறை வேகமாக வளர்ந்து வருகிறது. இதில் எதிர்பார்க்கப்படும் வெற்றி கிட்டுமானால் காயங்கள் மற்றும் புண்களை குணப்படுத்துவதில் இது மிகப்பெரிய திருப்பு முனையாக பார்க்கப்படும்.

காரணம், காயத்தைக் குணமாக்கும் தற்போதைய சிகிச்சை முறை காலதாமதமானதாகக் கருதப்படுகிறது. ஒவ்வொருமுறையும் இந்த காயத்தின் கட்டுகளை பிரித்துப்பார்த்து மருந்து போடும் முறையால் காயம் ஆறுவதற்கு நீண்டநாட்கள் பிடிக்கின்றன.

தற்போதைய சிகிச்சை முறையில் ஒவ்வொரு முறையும் காயத்தின் கட்டுகளைப் பிரித்து மீண்டும் புதியகட்டு போடும் சமயத்தில் புதிய தொற்றுகள் ஏற்படும் அபாயமும் இருக்கிறது.

அத்தகைய ஆபத்துக்களையும், காலதாமதத்தையும் இந்த ஸ்மார்ட் பேண்டேஜ்கள் குறைக்கும் என்று இவற்றை உருவாக்கும் மருத்துவ ஆய்வாளர்கள் நம்புகிறார்கள்.