கண்ணீரையும் வெளியேற்றும் மூக்கு

நாம் உயிர் வாழத்தேவையான ஆக்சிஜனை உடலுக்குள் செலுத்தும் மிகப்பெரும் பொறுப்பை மூக்கே எடுத்துக் கொண்டிருக்கிறது. சுவாசத்திற்கு அடுத்தபடியாக வாசனை உணரும் திறன் ஒரு வியக்கத்தக்க செயல். மொத்தமே 2 சென்டிமீட்டர் அளவுக்குள் அடங்கி விடும். இந்த பகுதியில் 10 ஆயிரம் வகையான வாசனைகளை அறிந்து கொள்ள முடியும். சுவாசம் மற்றும் வாசனையை நுகரும் செயலை மட்டும் மூக்கு செய்வதில்லை. வெவ்வேறு விதமான பல செயல்களில் இது மறைமுகமான தோழமை தந்து நம்மை இயக்குகிறது.

பேச்சுக்கும், மூக்குக்கும் சம்பந்தம் இருக்கிறது. ஜலதோஷம் பிடித்து மூக்கு அடைத்துக்கொள்ளும் நேரங்களில் சரியாக பேசமுடியாமல் சிரமப்படுவது இதனால்தான். நாம் பேசும் ஒலிகளுக்கு சரியான வடிவம் கொடுக்க தொண்டையில் குரல்வளை மட்டும் போதாது. மூக்கும், அதில் உள்ள சைனஸ் அறைகளும் கூட முக்கியமானவை. இவையெல்லாம் ஒன்று சேர்ந்துதான் நாம் எழுப்பும் ஒலிக்கு சரியான அதிர்வுகள் தந்து இனிமையைச் சேர்க்கின்றன. மூக்கை அழுத்திப்பிடித்துக் கொண்டு ங, ஞ, ந, ம போன்ற எழுத்துக்களை உச்சரித்தால் அவற்றின் ஒலி வடிவம் சரியாகவே வெளிவராது. இங்கு மூக்கின் ஒத்துழைப்பு இல்லாததுதான் காரணம்.

மூக்கின் இனனொரு வேலை கண்ணீருக்கு கழிவு நீர் வாய்க்காலாக செயல்படுவது. தாங்க முடியாத வேதனையோ, துக்கமோ ஏற்படும்போது கண்ணீர் பெருக்கெடுக்கிறது. இந்த கண்ணீரின் ஒரு பகுதி மூக்கு வழியாகவும் வெளியேறும். விழியின் ஓரம் இருக்கும் ஒரு துளை மூக்கோடு தொடர்பு கொண்டிருக்கிறது. துக்க வீடுகளில் ஒன்று கூடி அழும் பெண்கள் அடிக்கடி மூக்கை சீந்துவார்கள். உண்மையில் அது சளி அல்ல, மூக்கின் வழியாக வெளியேறும் கண்ணீர்தான்.

மூக்கு வெளியே உள்ள ஆக்சிஜனை அப்படியே உடலுக்குள் செலுத்தி விடுவது இல்லை. முதலில் காற்றை தூய்மைப்படுத்தி கொஞ்சம் குளிர வைத்தபின்னரே உடலுக்குள் அனுப்புகிறது. இதற்கான செயல்களை மூக்கின் ஒவ்வொரு பகுதியில் பிரத்யேகமாக செய்கிறது. மூக்கின் முனைப்பகுதில் உள்ள மயிரிழைகள்கள்தான் இந்த சுவாசத்தை வடிகட்டும் முதல் பில்டர். இதற்கடுத்து உள்ளே காந்த நிலையில் இருக்கும் திரவம் சளி. இது காற்றை குளிர்வித்து ஒரு ஏர்கண்டிஷனர் போல செயல்பட்டு உடலுக்கு இதமான வெப்பநிலையை ஏற்படுத்துகிறது.

வெளியில் உள்ள காற்றில் வெப்பநிலை மிக அதிகமாக இருந்து அது அப்படியே உள்ளே போனால் நுரையீரல் பாதிக்கப்படும். இப்படி காற்றை குளிர்விப்பதற்காக மட்டும் ஒரு லிட்டர் சளி திரவம் சுரந்து கொண்டிருக்கிறது. இந்த திரவம் இன்னொரு நன்மையும் செய்கிறது. அதில் லைசோசைம் என்ற என்சைம் உள்ளது. இதற்கு கிருமிகளை கொல்லும் திறன் உண்டு. மூக்கு நுரையீரலுக்கு மட்டும் அல்ல, நமது உடலுக்கும் கூட கிருமியை அண்டவிடாமல் தடுத்து பாதுகாக்கும் ஒரு காவலனாக இருந்து செயல்படுகிறது.