மரத்தடி அதிகாரிகள்!

சுற்றிலும் வயல்வெளி, சில்லென்று மலையோரக்
காற்று, அரசமரத்தடியில் கரும்பலகையில் ஆசிரியர்
எழுதுவதை கவனமாகக் கேட்டு, அக்கறையாக
எழுதும் ஆயிரக்கணக்கானவர்கள்…

எல்லோருமே எம்.எஸ்.சி., எம்.ஃபில் படித்தவர்கள்.
இவர்கள்தான் நாளைய தமிழகத்தின் கிராமங்களை
நிர்வகிக்கப் போகிறவர்கள். காவல்துறையில்,
ஆசிரியப் பணியில், மற்ற பணிகளிலும் அதிகாரிகளாய்
பதவி வகிக்கப் போகிறவர்கள்.

ஆயக்குடியை அடுத்த அந்த இலவச மரத்தடி பயிற்சி
கூடத்தில் பயிற்சி எடுத்தவர்கள்தான் கடந்த முறை
நடந்த தேர்வில் தமிழகத்திலேயே அதிகளவில் வெற்றி
பெற்று கிராம நிர்வாக அலுவலர்கள் ஆனார்கள்.

அவர்களுக்குப் பாடம் நடத்திக் கொண்டிருந்த
ஆசிரியர்களை சந்தித்தபோது,

“கிராமங்களிலிருந்து சென்னைக்கு வரும் மாணவ,
மாணவியரை நாங்கள் பட்ட வேதனைகளை அனுபவிக்க
விடுவதில்லையென்று, நாங்கள் உறுதி எடுத்துக்
கொண்டோம்.

கிராமப்புறத்தைச் சேர்ந்தவர்களுக்கு அரசுத் தறைத்
தேர்வுகள் எழுத பயிற்சி தருவதென்று மையம்
தொடங்கினோம்.

இதுவரை 3300 பேர் எங்களிடம் பயிற்சி பெற்று அரசு
வேலையில் சேர்ந்துள்ளனர். அவர்கள் எல்லோருமே
கிராமங்களைச் சேர்ந்தவர்கள்தான். அதிலும்
பெரும்பாலானோர். முதுநிலை படிப்பு முடித்தவர்கள்’
என்றனர்.

இவர்களிடம் பயிற்சி பெற்று, தற்போது அரசுப் பள்ளியில்
ஆசிரியையாக இருக்கும் ராஜேஸ்வரி, “எங்கள் ஊர்
மாரப்ப கவுண்டன் வலசு. ஒரு சிறு கிராமம். இங்கு,
பெண்கள் உயர்கல்வி பெறுவதே அபூர்வம்.

நான் படித்தபோது எல்லோரும் ஆச்சர்யப்பட்டனர். அதிலும்
அரசு வேலையில் சேர்ந்தது. பெரிய திருப்பத்தையே
ஏற்படுத்தியது’ என்கிறார்.

இவரைப் போல் கிராமத்தில் – குடிசையில், வருங்காலம்
கேள்விக்குறியாய் இருந்தவர்களையும் அரசு வேலையில்
அமர வைத்து அழகு பார்க்கும் இந்த ஆயக்குடி மையத்தில்
சேர எந்தக் கட்டணமும் இல்லை

ஆனால் அவர்கள் பிரதிபலனாக கேட்பதெல்லாம்
ஒரேயொரு உறுதி மொழியைத்தான் “நான் அரசு
வேலையில் சேர்ந்த பிறகு, லஞ்சம் வாங்க மாட்டேன்’
என்பதே அது.
–
—————————————–

– வீரகேரளம் சரவணன் – கல்கி