சினிமா பக்கம் தலை வைக்க மாட்டேன்!

-
இன்று சினிமாவில் கொடி கட்டிப் பறக்கும் பலரும் சின்னத்திரையில் தொகுப்பாளர்களாக அறிமுகமானவர்களே. இப்படி இருக்கு சினிமா என்றாலே ஓட்டம் பிடிக்கும் தொகுப்பாளர்களும் இருக்கத்தான் செய்கிறார்கள். அவர்களில் ஒருவர்தான் பிரியங்கா தேஷ் பாண்டே. விஜய் டி.வி., சன் மியூசிக், சுட்டி டி.வி. என பார்வையாளர்களை கலாய்ப்பதில் வல்லவர். அதுவும் சூப்பர் சிங்கர் நிகழ்ச்சியில் ம.கா.பாவுடன் சேர்ந்து விட்டால் அரங்கமே அதிரும். அவருடன் ஒரு ஜாலி பேட்டி.

உங்க பிறப்பு, வளர்ப்பு, ஜாதகம் சொல்லுங்க…
நான் பெங்களூர் பொண்ணு. அப்பா, அம்மா மகாராஷட்டிரா, கல்லூரி படிப்பு எல்லாமே சென்னையில்தான். தமிழ், ஆங்கிலம், இந்தி என பல மொழிகள் கலாய்க்கும் திறமை உண்டு. கல்லூரியில் படிக்கும் காலத்திலே தோழிகள் “ஏதாவது பேசுற வேலைதான்டி உனக்கு சரியா வரும்’னு சொல்லுவாங்க. இப்போது அதுவே நிஜமாகிவிட்டது. ஆரம்பத்தில் ஜீ தமிழ் டி.வி.யில் தொகுப்பாளினியாக அறிமுகமானேன். தொடர்ந்து விஜய் டி.வி., “சினிமா, காரம், காபி’ நிகழ்ச்சியை ம.கா.பா.வுடன் தொகுத்து வழங்கினேன். அதற்கு போதிய வரவேற்பு கிடைக்கவே ஏர்டெல் சூப்பர் சிங்கர் நிகழ்ச்சிக்கு மாறினேன்.

குழந்தைகள் நிகழ்ச்சிகள் என்றால் பிடிக்குமா?
சன் மியூசிக் தொகுப்பாளராக பணியாற்றிய என்னை சுட்டி டி.வி.யில் குழந்தைகள் நிகழ்ச்சியைத் தொகுத்து வழங்க கேட்டதால் அங்கும் பணியாற்றினேன். அப்போதுதான் குழந்தைகளின் சைக்காலஜி பற்றி பல விஷயங்களைத் தெரிந்து கொண்டேன். அதுவே எனக்கு சூப்பர் சிங்கர் நிகழ்ச்சியில் என்னுடைய திறமைகளை வெளிகாட்ட வசதியாக இருந்தது.

ஒரு சிறந்த தொகுப்பாளினிக்கு என்ன தகுதி மிகவும் அவசியம்?
விஷயம் இல்லாமலே பேச தெரியவேண்டும். ரோடே இல்லாத ஊரில் கார் ஓட்ட முடியுமா? முடியணும். அதுதான் சவால்! அது போன்று இந்த வேலையும். ஒவ்வொரு நிகழ்ச்சியை பொறுத்தும் நம்முடைய திறமைகளை வெளிகாட்ட வேண்டும். என்னுடைய களம் அனைத்து தளங்களிலும் பரவி உள்ளது. பாட்டு, இசை, குழந்தைகள், சினிமா என எப்போதும் குதூகலம் தான்.
சூப்பர் சிங்கர் நிகழ்ச்சி என்றாலே பாடல்கள் மற்றும் திரைத்துறை பிரபலங்கள் பற்றிய நன்கு தெரிந்திருக்க வேண்டும். குறிப்பாக நிகழ்ச்சியில் கலந்துகொள்ளும் போட்டியாளர்களின் உணர்வுகளை புரிந்து கொண்டு நிகழ்ச்சியைத் தொகுத்து வழங்குவது கூடுதல் சிறப்பு. தமிழானாலும் சரி, ஆங்கிலமானாலும் சரி உச்சரிப்பு தெளிவாக இருக்க வேண்டும்.

சினிமாவில் நடிக்க ஆசையில்லையா?
சினிமா பிரபலங்களைப் பேட்டி எடுத்தில் விருப்பம் உண்டு. நடிப்பதற்கு ஏராளமான வாய்ப்புகளும் வந்தது. ஆனால் நடிப்பு பற்றி எந்த ஐடியாவும் இல்லை. அதுவும் சினிமா பக்கம் தலைவைத்துகூட படுக்கமாட்டேன். ஒரு படத்தில் இயக்குநரை பேட்டி எடுக்க போகிறேன் என்றால், சமீபத்தில் அவர் இயக்கத்தில் வெளியான படங்கள், அவருடைய திரைப்படங்களின் பட்டியலை மனதில் பதிய வைத்துபிறகுதான் பேட்டி எடுக்க செல்வேன். அப்போதுதான அவர்களை கேள்வி கேட்டு கலாய்க்க வசதியாக இருக்கும்.

கலாய்ப்பு கூட்டணியாளர் ம.கா.பா.,?
டைமிங் நகைச்சுவையில் பின்னி எடுப்பார். அதுவும் சூப்பர் சிங்கர் பேட்டியில் கலந்துகொள்ளும் குழந்தைகள் என்றாலே ம.கா.பா., மீது கொள்ளை பிரியம். என்னைவிட அவரை மடக்குவதில்தான் குறியாக இருப்பார்கள். அவரை வெளுத்து வாங்கவே தனி கூட்டமுண்டு. சில சமயம் என்ன செய்வதென்று தெரியாமல் பாவம் திருதிருவென முழிப்பார். பதில் தெரியாமல் முழிக்கும்போது கூட நகைச்சுவையாக மற்றவர்களை சிரிக்க வைக்கவும் செய்வார். வெறும் வார்த்தையால் அரங்குகளை அதிர வைப்பது அத்தனை லேசான விஷயம் இல்லையே.

சமையல் பேட்டியும் விடுவதில்லையே?
அட போங்க சார் நீங்க என்னைய கலாய்க்காதீங்க. எங்களுக்கும் கொஞ்சம் சமையல் பண்ணத் தெரியும். நிறைய ரெசிபிகளை வீட்டில் தயார் பண்ணி பிராக்டீஸ் செய்தபிறகுதான் நிகழ்ச்சிகளை பங்கேற்க ஓகே சொன்னேன். அந்தப் போட்டிக்குப் பிறகுநிறைய ஐட்டிங்களை நானே செய்ய ஆரம்பித்துவிட்டேன்.

பொழுதுபோக்கு என்ன?
பொழுது போகலன்னா ஏதாவது செய்யலாம். இங்க ஒவ்வொரு நாளும் நொடி மாதிரி ஓடிபோயுடுது. என்னுடைய வேலை செய்யவே நேரம் சரியாக இருக்கு. பரபரப்பாக ஓடிட்டே இருக்கேன். சினிமால நடிக்காதபோதே இப்படி இருக்கு. நடிக்க ஆரம்பிச்சா ரெக்கை மாட்டிட்டு பறக்க ஆரம்பிச்சி நிறைய சந்தோஷங்களை இழக்க வேண்டியதா போயிடும்.

- வனராஜன்-கல்கி