வதேரா நில பேர விவகாரம்: எனது செயல்பாடுகள் சரியென சிஏஜி அறிக்கை நிரூபித்துவிட்டது: கெம்கா

-

காங்கிரஸ் தலைவர் சோனியா காந்தியின் மருமகன் ராபர்ட் வதேரா மீதான நில பேர முறைகேடுகள் விவகாரத்தில், எனது செயல்பாடுகள் சரியென்று தலைமைக் கணக்குத் தணிக்கை அதிகாரியின் (சிஏஜி) அறிக்கை நிரூபித்து விட்டது' என்று மூத்த ஐஏஎஸ் அதிகாரி அசோக் கெம்கா கூறினார்.

ஹரியாணா மாநிலத்தில் பூபிந்தர் சிங் ஹூடா தலைமையிலான முந்தைய காங்கிரஸ் ஆட்சியில், ராபர்ட் வதேராவுக்குச் சொந்தமான ஸ்கைலைட் ஹாஸ்பிடாலிட்டி நிறுவனத்தின் மூலம் மாநில அரசு நிலத்தை டி.எல்.எஃப். நிறுவனத்துக்கு விற்பனை செய்வது தொடர்பாக நடைபெற்ற நில பேர ஒப்பந்தம் சட்ட விரோதமானது என்று கூறி அதை ரத்து செய்ய உத்தரவிட்டவர் அசோக் கெம்கா. இதையடுத்து, அவர் பணியிடமாற்றம் செய்யப்பட்டார்.

இந்நிலையில், ஹரியாணா சட்டப்பேரவையில் புதன்கிழமை தாக்கல் செய்யப்பட்ட சிஏஜி அறிக்கையில், "ஸ்கைலைட் உள்ளிட்ட நிறுவனங்களுக்கு முறைகேடான வழிகளில் ஹரியாணா அரசு சலுகைகள் வழங்கியுள்ளது' என்று தெரிவிக்கப்பட்டுள்ளது.

இதுதொடர்பாக, அசோக் கெம்கா தனது சுட்டுரை (டுவிட்டர்) பக்கத்தில் வியாழக்கிழமை கூறியிருப்பதாவது:

ராபர்ட் வதேராவுக்கும், டி.எல்.எஃப். நிறுவனத்துக்கும் இடையேயான நில பேர விவகாரத்தில், எனது செயல்பாடுகள் சரியென்று சிஏஜி அறிக்கை மூலம் நிரூபணமாகிவிட்டது. எனினும், மாநில அரசு எனக்கு எதிராக அளித்த குற்றப்பத்திரிகையால் தொடர்ந்து களங்கத்தை சுமக்கிறேன் என்று பதிவு செய்துள்ளார்.

"உண்மையான குற்றவாளிகள் எனக்கு எதிராக நீதியை முடக்குகிறார்கள். என்னுடைய வலியும், வேதனையும் அரசியலை தூய்மைப்படுத்த உதவும்' என்று மற்றொரு பதவில் அவர் குறிப்பிட்டுள்ளார்.

"பொதுச் சொத்துகளை கொள்ளையடிப்பதற்காக, வேண்டியவர்களுக்கு கள்ளச் சந்தையில் உரிமங்களும், அனுமதியும் வழங்கப்படுகிறது. கள்ளச் சந்தையில் ஈடுபடுவர்களுக்கு எதிராக நடவடிக்கை எடுக்கப்படுமா?' என்று அடுத்த சுட்டுரைப் பதிவில் அசோக் கெம்கா கேள்வி எழுப்பியுள்ளார்.

ஹரியாணா மாநிலம், குர்கான் மாவட்டத்தில், அரசிடம் இருந்து 3.5 ஏக்கர் நிலத்தை ரூ.7.5 கோடி என குறைந்த விலைக்கு 2008ஆம் ஆண்டு வாங்கிய ஸ்கைலைட் நிறுவனம், அதை டி.எல்.எஃப் நிறுவனத்துக்கு ரூ.58 கோடிக்கு விற்பனை செய்தது.

அரசு நிலத்தை விற்பனை செய்து தருவதற்கான ஒப்பந்தத்தை மேற்கொள்ளும்போது, நிலத்தின் மதிப்பில் 15 சதவீதத்துக்கும் மேல் கிடைக்கும் நிகர லாபத்தை அரசுக் கருவூலத்தில் ஒப்படைக்க வேண்டும் என்ற விதிமுறை பின்பற்றப்படவில்லை என்று சிஏஜி அறிக்கையில் தெரிவிக்கப்பட்டிருந்தது குறிப்பிடத்தக்கது.
-
தினமணி