ஆந்திர பிரதேசத்தின் புதிய தலைநகர் 'அமராவதி'

ஆந்திர பிரதேசத்தின் புதிய தலைநகருக்கு 'அமராவதி' என பெயர் சூட்ட முடிவு செய்யப்பட்டுள்ளது.

ஆந்திர மாநிலத்தில் இருந்து தெலங்கானா தனி மாநிலம் பிரிக்கப்பட்டது. அதன் பிறகு, ஹைதராபாத் நகரம் தெலங்கானாவின் தலைநகராக மாறியது. இதனால் ஆந்திராவுக்கு புதிய தலைநகரை உருவாக்க வேண்டிய சூழ்நிலை ஏற்பட்டது.

இதைத் தொடர்ந்து, ஆந்திராவில் புதிதாக பதவியேற்ற மாநில அரசு, தலைநகர் உருவாக்குவதை முக்கிய பணியாக கொண்டது. மேலும் புதிய தலைநகர் உருவாக்கத்துக்காக சிவராம கிருஷ்ணன் தலைமையிலான கமிட்டி ஒன்றும் அமைக்கப்பட்டது.

இந்த குழு தனது அறிக்கையை உள்துறை அமைச்சகத்திடம் அளித்தது. இந்த அறிக்கையை முதலமைச்சர் சந்திரபாபு நாயுடு தலைமையில் மாநில அமைச்சரவை குழுவினர், தொடர்ந்து ஆய்வு செய்து வந்தனர்.

அதன் அடிப்படையில், 'ஆந்திராவின் புதிய தலைநகரம் விஜயவாடாவுக்கு அருகே அமைக்கப்படும்' என்று முதலமைச்சர் சந்திரபாபு நாயுடு மாநில சட்டமன்றத்தில் அறிவித்தார். மாநிலத்தின் அனைத்து பகுதி மக்களுக்கும் வசதிகளை ஏற்படுத்தி கொடுக்கும் வகையிலும், மாநிலத்தின் வேகமான வளர்ச்சிக்காவும் இந்த முடிவு எடுக்கப்பட்டதாக அவர் கூறினார்.

ஆந்திராவில் கிருஷ்ணா நதியின் ஓரத்தில் குண்டூர் மாவட்டம் தூளூரு பகுதியில் உள்ள 29 மண்டலங்கள் புதிய தலைநகருக்கான இடமாக தேர்வு செய்யப்பட்டுள்ளன.

ஆந்திராவின் புதிய தலைநகருக்காக இதுவரையில், 33 ஆயிரம் ஏக்கர் விவசாய நிலம் கையகப் படுத்தப்பட்டுள்ளது. இப்பகுதியில் அரசு மற்றும் வனத்துறைக்குச் சொந்தமான 15 ஏக்கர் பரப்பளவு நிலம் உள்ளது. இதில், 8,000 ஏக்கரில் புதிய தலைநகருக்கான கட்டிடங்கள் கட்டப்பட உள்ளன.

ஆந்திராவின் புதியதலைநகர் குறிப்பிட்ட நகரின் மாதிரியாக இல்லாமல், அனைத்து சிறந்த நகரங்களின் கூட்டுக் கலவையாக இருக்கவேண்டும் என முடிவு செய்யப்பட்டுள்ளது. புதிய தலைநகருக்கு பல்வேறு பெயர்கள் பரிந்துரை செய்யப்பட்டது.

தற்போது 'அமராவதி' நகரின் பெயரையே புதிய நகருக்கு வைக்க முடிவு செய்யப்பட்டுள்ளது என்று தகவல்கள் தெரிவித்து உள்ளன.

தூளூருக்கு 20 கி.மீ. தொலைவில் உள்ளது சரித்திரப் புகழ்பெற்ற அமராவதி நகர். அமராவதி என்ற பெயரையே புதிய தலைநகரத்திற்கு வைக்க வேண்டும் என்று முதலமைச்சர் சந்திரபாபு நாயுடுவும் விரும்புகிறார் என்று கூறப்படுகிறது.

இதுதொடர்பாக அதிகாரப்பூர்வ அறிவிப்பை ஆந்திர முதலமைச்சர் சந்திரபாபு நாயுடு ஓரிரு நாட்களில் அறிவிப்பை வெளியிடுவார் என்று கூறப்படுகிறது.