வண்டுகளை நம் எண்ணப்படி இயக்கலாம்!

பறவைகள் வானில் பறந்து வசந்த கீதம் இசைக்கின்றன. வண்டுகள், பூச்சிகள் அந்தரத்தில் மிதந்து ஆனந்தத்தில் ரீங்காரமிடுகின்றன. அவைகள், நாம் இந்த உலகை காணாத கோணத்தில் கண்டு ரசிக்கின்றன. மனிதன் பறவைபோல பறக்க விரும்பியதன் விளைவாகவே விமானம் உருவாக்கினான். நாம் ஆறறிவுடன் மேம்பட்டு இருந்தாலும், இதுபோன்ற சின்னச்சின்ன உயிரினங்களின் பின்னால் பயணித்து அறிந்து கொண்ட விஷயங்கள்தாம் அதிகம்.

பெர்கிலி நகரில் இயங்கும் கலிபோர்னியா பல்கலைக் கழக கிளை மற்றும் சிங்கப்பூர் நான்யாங் தொழில்நுட்ப பல்கலைக்கழகம் ஆகியவற்றின் விஞ்ஞானிகள் குழு. தற்போது வண்டுகளை பின்தொடர்ந்து புதிய ஆராய்ச்சியில் ஈடுபடுகிறார்கள். அவர்கள் வண்டுகளின் எண்ணத்தை கட்டுப்படுத்தி அவற்றை தங்கள் விருப்பப்படி இயங்க வைக்கும் முயற்சியில் ஈடுபட்டு உள்ளனர். அதில் குறிப்பிடத்தக்க வெற்றியும் கண்டுள்ளனர்.

நுண்ணிய எலக்ட்ரானிக் கருவி ஒன்றை, பெரிய அளவுடைய வண்டுகளின் முதுகில் பொருத்தி இந்த ஆய்வை மேற்கொண்டனர். இதன் மூலம் அவை எங்கிருக்கிறது என்பதை அறிந்து கொள்ள முடியும். அத்துடன் அவற்றை நாம் இருக்கும் இடத்திற்கு வரவழைக்க இந்த எலக்ட்ரானிக் கருவியின் வழியே கட்டளை கொடுக்க முடியும்.

அந்த நுண்கருவியில் மைக்ரோ கண்ட்ரோலர், வயர் இணைப்பற்ற டிரான்ஸ்மிட்டர், ரிசீவர், 3.9 வோல்ட் மைக்ரோ பேட்டரி ஆகியவை இணைக்கப்பட்டு உள்ளன. 6 இழை வடிவிலான மின்கடத்திகள், வண்டின் உடலில் தசைப் பகுதியுடன் இணைக்கப்பட்டிருக்கும்.

இந்த கட்டுப்பாட்டுக் கருவிக்கு நாம் அனுப்பும் கட்டளைகள் மின்கடத்திகள் வழியாக வண்டுகளின் உடலுக்கு கடத்தப்பட்டு அவற்றை நமது கட்டளைக்கு கட்டுப்பட்டு செயல்பட வைக்கிறது. இதன் மூலம் பறக்கும் வண்டுகளை நிற்கச் செய்யவும், இடது- வலது என நாம் விரும்பும் திசையில் திரும்ப வைக்கவும், பறக்கச் செய்யவும் கட்டளை கொடுக்க முடியும்.

இந்த ஆராய்ச்சியில் குறிப்பிடத்தக்க வெற்றி கிடைத்துள்ளது. எனவே இதே தொழில்நுட்பத்தின் மூலம் பூச்சியியல் ஆராய்ச்சிகள் முன்னேற்றம் காணும். வண்டுகள் மற்றும் பிற உயிரினங்களின் வாழ்விடங்கள், வாழ்க்கை முறைகளை துல்லியமாக தெரிந்து கொள்ள முடியும்.

'இவை மட்டுமல்லாமல், நிலநடுக்கம், புயல் போன்ற பேரிடர் காலங்களில் மீட்பு பணிகளுக்கு இந்த தொழில்நுட்பம் பெரிதும் கைகொடுக்கும். சிறிய பிளவுகள், துளைகளின் வழியே வண்டுகளை அனுப்பி, விபத்தில் சிக்கியிருப்பவர் களின் நிலையை அறிந்து மீட்புப்பணி மேற்கொள்ள உதவும்' என்கிறார்கள் ஆராய்ச்சியாளர்கள்.

வேவு பார்த்தல் போன்ற எதிர்மறை பணிகளுக்கு வண்டு களை பயன்படுத்தாதவரை இது வரவேற்கப்பட வேண்டிய ஆராய்ச்சிதான்!

அட பாவிங்களா .... உங்க அட்டகாசத்துக்கு ஒரு அளவே இல்லையா.

ஒற்றன் வண்டாக இருக்குமோ என்ற சந்தேகத்தில் இனி எல்லை பகுதிகளில் ஒருத்தன் ஒருத்தன் மாற்றி பூச்சிகொல்லி spray க்களை பயன்படுத்தி இந்த அப்பாவி உயிரினங்களை பூண்டோடு அழித்துவிடுவான்.