தமிழக சட்டசபையில் 4 ஆண்டுகள் நடந்தது என்ன?

by **சிவா** Mon Mar 23, 2015 1:17 am

147 முறை எதிர்க்கட்சிகளின் வெளிநடப்பு:
கருணாநிதி 5; விஜயகாந்த் 27 நாள் வருகை

கோவை: அ.தி.மு.க., ஆட்சிக்கு வந்து, நான்கு ஆண்டுகள் நிறைவடைய போகின்றன; சட்டசபை எத்தனை முறை கூடியுள்ளன; 110 விதியின் கீழ் அறிவிக்கப்பட்ட அறிவிப்புகளின் எண்ணிக்கை எவ்வளவு; எம்.எல்.ஏ.,க்கள் பெறும் சலுகை என்னென்ன; எதிர்க்கட்சிகள் என்ன செய்தனர் என்ற விவரங்கள், தகவல் அறியும் உரிமைச் சட்டத்தின் வாயிலாக வெளியாகி உள்ளன.

கோவை வெள்ளலூரைச் சேர்ந்த, டேனியல் ஏசுதாஸ் என்பவர், கேட்டிருந்த தகவல்களும், கிடைத்த விவரங்களின் தொகுப்பும் வருமாறு:

பதவியேற்றதும் 'பிரீப்கேஸ்':

தேர்தலுக்குப் பின் எம்.எல்.ஏ., வாக பதவியேற்றதும், ஒவ்வொருவருக்கும், ஒரு சிறிய கைப்பெட்டி வழங்கப்படுகின்றன. அதில், இந்திய அரசியல் அமைப்பு சட்ட பிரதி - தமிழ் மற்றும் ஆங்கிலம், திருக்குறள் புத்தகம், எம்.எல்.ஏ., கையேடு, காமன்வெல்த் பாராளுமன்ற சங்கம் - தமிழ்நாடு கிளை குறித்த, சிறு கையேடு (தமிழ் மற்றும் ஆங்கிலம்) வழங்கப்படுகின்றன. தமிழ்நாடு சட்டப்பேரவை விதிகள், 1986ம் ஆண்டு சட்டப்பேரவை உறுப்பினர்களின் விதிகள் (கட்சி மாறுதல் காரணம் கொண்டு தகுதியின்மையாக்குதல்), எம்.எல்.ஏ.,க் களின் சொந்த விவரங்கள் மற்றும் போட்டோவுடன் கூடிய, 'யார் எவர்' எனும் வெளியீடு, எம்.எல்.ஏ., குறிப்பிடும், இரு வாகனங்களுக்குரிய, 'ஹாலோகிராம்' பதிக்கப்பட்ட வாகன அனுமதிச் சீட்டுகள், அதில் இடம்பெற்றிருக்கும். மேலும் சட்டசபை கூடும் நாட்களில், எம்.எல்.ஏ., விரும்பும் இரு நாளிதழ்கள், சென்னையில் உள்ள எம்.எல்.ஏ., குடியிருப்பில் வழங்கப்படும்; எம்.எல்.ஏ., ஆனதும் வழங்கப்படும்; 'பிரீப்கேஸ்'சில், 11 ஆவணங்கள் இருக்கும்.

110 விதி 150 முறை:

தமிழக சட்டசபை, முன்னாள் முதல்வர் ஜெயலலிதா தலைமையில், 2011 மே 23ம் தேதி, முதல் முறையாக கூடியது. அதன்பின், 2011 ஜூன் 8ல், தமிழக மீனவர்களை விடுவிப்பது தொடர்பாக, முதன் முறையாக, 110 விதியின் கீழ் முதல்வர் அறிவிப்பு வெளியானது. அதே நாளில், மொத்தம் நான்கு அறிவிப்புகள் வெளியாயின. கடந்த 2011ல், 21 முறை, 2012ல், 43 முறை, 2013ல், 45 முறை, 2014ல், 41 முறை, என, நான்கு ஆண்டுகளில், 110 விதியை பயன்படுத்தி, 150 அறிவிப்புகள் வெளியிடப்பட்டன. இவற்றில், எத்தனை அறிவிப்புக்கு அரசாணை வெளியிட்டு, செயல்வடிவம் கொடுக்கப்பட்டு உள்ளன என்ற தகவல்கள் வழங்கப்படவில்லை.

முக்கிய அறிவிப்புகள்:

சட்டபையில், 110 விதியின் கீழ் அறிவிக்கப்பட்ட, முக்கிய அறிவிப்புகள் வருமாறு: பள்ளிகள் தரம் உயர்த்துதல்; அரசு மருத்துவ காப்பீட்டு திட்டம்; காற்றாலை மின்சாரத்தை, உயரழுத்த தொழிற்சாலைகளுக்கு வழங்குதல்; ஓமந்தூரார் அரசினர் தோட்டம்; புதிய தலைமைச் செயலக, 'ஏ' பிளாக், பலதுறை உயர் சிறப்பு மருத்துவமனையாகவும், 'பி' பிளாக், அரசு மருத்துவக் கல்லூரியாகவும் மாற்றுதல் குறித்த அறிவிப்புகள் வெளியிடப்பட்டன. இதுதவிர, முன்னாள் பிரதமர் ராஜிவ் கொலை வழக்கு குற்றவாளிகளின் தூக்கு தண்டனையை ரத்து செய்தல்; தமிழ்நாடு சிறப்பு காவலர் இளைஞர் படை உருவாக்குதல்; சத்துணவுத் திட்டத்தில் புதிய உணவு வகை அறிமுகம். மதுரையில், 100 கோடி ரூபாய் மதிப்பீட்டில், தமிழ்த்தாய் சிலை அமைத்தல்; மலிவு விலை உணவகங்கள் அமைத்தல்; மக்கள் சேவை மையங்கள் அமைத்தல் போன்ற அறிவிப்புகள் குறிப்பிடத்தக்கவை.

159 நாட்கள்:

தமிழகத்தில் தற்போதுள்ளது, 14வது சட்டசபை; இந்த அரசின் முதல் சட்டசபைக் கூட்டம், 2011 மே 23ல் கூடியது; கவர்னர் உரையுடன் முதல் கூட்டத்தொடர், எட்டு நாட்கள் நடந்தன; முதல் கூட்டத்தொடரின் இரண்டாம் பாகம், 25 நாட்கள் நடந்தன. இரண்டாம் கூட்டத்தொடர் ஒருநாள் மட்டுமே நடந்தது; மூன்றாம் கூட்டத்தொடர், 2012 ஜன., 30ல், கவர்னர் உரையுடன் துவங்கி, ஆறு நாட்கள் நடந்தன. நான்காம் கூட்டத்தொடர், 32 நாட்களும், ஐந்தாம் கூட்டத்தொடர் ஐந்து நாட்களும், ஆறாம் கூட்டத்தொடர் கவர்னர் உரையுடன் துவங்கி, 41 நாட்களும், ஏழாம் கூட்டத்தொடர், ஏழு நாட்களும் நடந்தன. எட்டாம் கூட்டத்தொடர் கவர்னர் உரையுடன் துவங்கி, 31 நாட்கள் நடந்தன. முதல்வர் பன்னீர்செல்வம் தலைமையில், ஒன்பதாம் கூட்டத்தொடர் மூன்று நாட்கள் நடந்தன. கடந்தாண்டு டிசம்பர் வரை, ஒன்பது கூட்டத்தொடர், 159 நாட்கள் நடந்தன.

மாதம் ரூ.55 ஆயிரம்:

எம்.எல்.ஏ.,க்களுக்கு மாதச் சம்பளம், 8,000 ரூபாய்; ஈட்டுப்படியாக, 7,000 ரூபாய்; தொலைபேசி படியாக, 5,000; தொகுதிப்படியாக, 10 ஆயிரம்; அஞ்சல் படி, தொகுப்பு படியாக, தலா, 2,500 ரூபாய்; வாகனப் படியாக, 20 ஆயிரம் ரூபாய்; ஒரு எம்.எல்.ஏ.,வுக்கு மாதத்திற்கு மொத்தம், 55 ஆயிரம் ரூபாய் வழங்கப்படுகின்றன. இதுதவிர, சட்டசபைக் கூட்டத்தில் கலந்து கொண்டால், நாள் ஒன்றுக்கு, 500 ரூபாய் தினப்படியாக வழங்கப்படுகின்றன.

எல்லாம் இலவசம்:

மாநில அரசு போக்குவரத்துக் கழக பஸ்களில், எம்.எல்.ஏ.,க்கள் தனியாகவோ, குடும்பத்தினருடனோ பயணம் செய்ய, இலவச அனுமதிச் சீட்டு வழங்கப்படுகின்றன, (இதுவரை யாரும் பஸ் பயணம் சென்றதில்லையாம்). வெளியிடங்களுக்கு செல்ல, ரயில் பயணப்படியாக, ஆண்டுக்கு இரண்டு தவணையாக, 20 ஆயிரம் ரூபாய் வீதம் வழங்கப்படுகின்றன. சட்டசபை கூட்டத்தொடர் காலத்தில், எம்.எல்.ஏ., அவருடன் செல்லும் குடும்பத்தினருக்கான, ரயில் கட்டணத்தை திரும்ப பெற்றுக் கொள்ளலாம். எம்.எல்.ஏ., ஹாஸ்டல், வீட்டிற்கு இலவச தொலைபேசி இணைப்பு, அரசு மருத்துவமனையில் தனி அறை சிகிச்சை, வெளியில் வாங்கும் மருந்துகளும் இலவசம் போன்ற சலுகைகள் வழங்கப்படுகின்றன.

மருத்துவ சலுகை:

மேலும், மத்திய அரசு அல்லது அரசு அனுமதி பெற்ற தனியார் மருத்துவமனையில், இதயம், சிறுநீரகம், உடலின் வேறு ஏதாவது பாகம் தொடர்பான அறுவை சிகிச்சைக்கு, எம்.எல்.ஏ.,க்களுக்கு, அரசு நிதியுதவி பெற உரிமையுள்ளது. ஆண்டுக்கு, 1,500 பெரிய கடித தாள்கள்; 3,700 சிறிய கடித தாள்கள்; பெரிய கவர்கள், 750; சிறிய கவர்கள், 1,500; ஹீரோ பேனா ஒன்று; டைரி ஒன்று; காலண்டர் இரண்டு வழங்கப்படுகின்றன.

'மாஜி'க்களின் சலுகைகள்:

எம்.எல்.ஏ., ஒருவர், தொகுதிக்கு வெளியே எதிர்பாராதவிதமாக இறக்க நேரிட்டால், சடலத்தை சொந்த ஊருக்கு கொண்டு செல்வதற்கான வாகனத்தின் வாடகை, அரசால் வழங்கப்படுகிறது. பதவிக்காலத்தில் இறந்த எம்.எல்.ஏ.,க்களின் குடும்பத்திற்கு, பதவிக்காலம் முழுமைக்கும், மாதத்துக்கு, 1,000 ரூபாய், குடும்ப படியாக வழங்கப்படுகிறது. அக்குடும்பத்திற்கு, ஒட்டுமொத்த படியாக இரண்டு லட்சம் ரூபாய் வழங்கப்படுகிறது. மரணமடைந்த எம்.எல்.ஏ.,க்களின் குடும்பத்திற்கு, ஓய்வூதியாக, மாதம், 6,000 ரூபாய் வீதம் வழங்கப்படுகிறது. முன்னாள் எம்.எல்.ஏ.,க்களுக்கு, மாதத்துக்கு, 12 ஆயிரம் ரூபாய் வீதம் ஓய்வூதியம் வழங்கப்படுகிறது. முன்னாள் எம்.எல்.ஏ., குடும்பத்தினருடன், அடையாள அட்டையை பயன்படுத்தி, அரசு பஸ்களில் இலவசமாக பயணிக்கலாம். அரசு மருத்துவமனையில், 'அ' அல்லது 'ஆ' பிரிவில் இலவசமாக தங்கி, சிகிச்சை பெறலாம். மேலும், ஆண்டுக்கு, 12 ஆயிரம் ரூபாய் மருத்துவப் படியாக வழங்கப்படுகிறது.

வெளிநடப்பு 147 முறை:

சட்டசபைக் கூட்டத்தில், தி.மு.க., உள்ளிட்ட, மற்ற அனைத்து கட்சிகளும் வெளிநடப்பு செய்துள்ளன; ஒரே நாளில், இருமுறை, நான்கு முறை கூட வெளிநடப்பு செய்துள்ளனர்.இதில், தி.மு.க., - எம்.எல்.ஏ.,க்கள், 43 முறை; தே.மு.தி.க., 25 முறை; புதிய தமிழகம், 24 முறை; பா.ம.க., ஏழு முறை; காங்., 12 முறை; இ.கம்யூ., எட்டு முறை, மார்க்.கம்யூ., 11 முறை; ம.ம.க., எட்டு முறை வெளிநடப்பு செய்துள்ளன. சட்டசபை பதிவில், மொத்தம், 147 முறை வெளிநடப்பு பதிவாகி உள்ளன.

234 எம்.எல்.ஏ.,:

மொத்தமுள்ள, 234 எம்.எல்.ஏ.,க் களில், முதல்வர், அமைச்சர்கள், சபாநாயகர், துணை சபாநாயகர், அரசு தலைமை கொறடா ஆகியோர், வருகைப் பதிவேட்டில் கையொப்பமிடும் வழக்கமில்லை. சட்டசபைக் கூட்டம் நடந்த, 159 நாட்களும், 45 எம்.எல்.ஏ.,க்கள் சபைக்கு தவறாது வந்துள்ளனர். முன்னாள் முதல்வர் கருணாநிதி ஐந்து நாட்கள்; தி.மு.க., பொருளாளர் ஸ்டாலின், 56 நாட்கள்; தே.மு.தி.க., தலைவர் விஜயகாந்த், 27 நாட்கள்; புதிய தமிழகம் கட்சி தலைவர் டாக்டர் கிருஷ்ணசாமி, 153 நாட்கள்; ச.ம.க., தலைவர் நடிகர் சரத்குமார், 75 நாட்கள்; ம.ம.க., ஜவாஹிருல்லா, 146 நாட்கள் வருகை புரிந்துள்ளனர். கடந்த, மே 2011 முதல், 2015 பிப்., 12ம் தேதி வரையிலும், சட்டசபை நடக்கும் போது பயன்படுத்தப்பட்ட ஜெனரேட்டருக்கு, 5 லட்சத்து 4,000 ரூபாய் வாடகையாக வழங்கப்பட்டு உள்ளது. சட்டசபைக் கூட்டத்தின் போது, எம்.எல்.ஏ.,க்களுக்கு வழங்கப்பட்ட மினரல் வாட்டருக்கு, 1 லட்சத்து 21 ஆயிரத்து 58 ரூபாய் செலவிடப்பட்டு உள்ளது. இவ்விவரங்கள், தகவலறியும் உரிமைச் சட்டத்தில் தெரியவந்து உள்ளன.

தினமலர்