எனக்குள் ஒருவன் - சினிமா விமர்சனம்

'வாவ்..! இப்படி ஒரு வாழ்க்கை வாழ்ந்தால் எப்படி இருக்கும்?’ என நம் எல்லோருக்குள்ளும் ஏங்குபவனே, இந்த 'எனக்குள் ஒருவன்’!

'க்ரௌவுட் ஃபண்டிங்’, 'பின்நவீனத்துவ சினிமா முயற்சி’ என்றெல்லாம் கன்னடத்தில் டிரெண்டிங் அடித்த 'லூசியா’ மாத்திரைக்கு தமிழ் புகட்டியிருக்கிறார்கள்!

அடாசு தியேட்டர் ஒன்றில் வேலைபார்க்கும் சித்தார்த், ரொம்பவே சுமார் மூஞ்சி குமார். இரவுகளில் தூக்கம் வராமல் தவிப்பவருக்கு லூசியா மாத்திரை கிடைக்கிறது. அந்த மாத்திரையைச் சாப்பிட்டால் தூக்கம் வரும்... கூடவே மனம் விரும்பும் கனவும் வரும். 'சுமார் மூஞ்சி’ சித்தார்த், கனவில் 'சூப்பர் ஹீரோ’வாக இருக்கிறார். நிஜத்தில் சித்தார்த் காதலிக்கும் தீபா சன்னிதியே, கனவிலும் காதலி. யதார்த்தக் காதலில், சில பிரச்னைகள்; கனவுக் காதலிலும் சில பிரச்னைகள். தொடர் சம்பவங்களில் கனவும் யதார்த்தமும் இணையும் புள்ளியில்... காத்திருக்கிறது செம ட்விஸ்ட்!

'இன்செப்ஷனின்’ கனவில் கரையும் காட்சிகள், 'அவதாரின்’ கண் உறங்கினால் வேறு ஓர் உலகம் என உலகத் தழுவல் இருந்தாலும்... 'லூசியா’ செம சினிமா. ஒரு சினிமா ஒரு புள்ளியில் தொடங்கி நேர்க்கோட்டில் பயணிக்கும் என்ற ஃபார்முலா தகர்த்து, புதுப்புது உத்திகளுடன் சுவாரஸ்யம் அளித்த படம். ஆரம்பத்திலேயே மருத்துவமனையில் உயிருக்குப் போராடும் ஹீரோ, இடைவேளையில் ஹீரோவைக் கொல்ல முயற்சிக்கும் ஹீரோயின் என முடிவை யூகிக்கும் முடிச்சுகளை முன்னரே அவிழ்த்துவிட்டு, 'அதுக்கும் மேல’ ஒரு புதிரை கடைசி வரை காப்பாற்றிய திரைக்கதையே படத்தின் ஹீரோ.

கறுப்பு-சிவப்பு மேக்கப்பும் லூஸு - பாஸான கெட்டப்களுமே போதும் என சித்தார்த் நினைத்துவிட்டாரோ... என்னவோ? ஆர்ப்பாட்டம் இல்லாத அழகுடன் 'ஆசம்’ நடிப்பில் கவனம் ஈர்க்கிறார் தீபா. சித்தார்த்தை வேறு இடத்தில் வேலைக்குச் சேர்க்க தீபா முயல்கிறார் எனத் தெரிந்துகொள்ளும்போது நரேனின் உணர்வுகள்... உருக்கம்!

'பிரபலமாகவே...’, 'ஏண்டி...’ பாடல்களில் துள்ளலும் துடிப்புமாக வெடிக்கிறது சந்தோஷ்நாராயணின் இசை. கனவு, நனவு ட்ரீட்மென்ட்டுக்கு கோபி அமர்நாத்தின் ஒளிப்பதிவு நச். நிழலுக்கும் நிஜத்துக்குமான இணைப்பைக் குழப்பம் இல்லாமல் பிணைக்கிறது லியோ ஜான்பாலின் படத்தொகுப்பு.

ஹீரோ சித்தார்த்தை ஏன் அந்தக் கும்பல் மிரட்டுகிறது, அதை விசாரிக்கும் போலீஸ் நடவடிக்கைகளில் ஏன் அத்தனை மெத்தனம், சித்தார்த் மனதில் ஏன் அத்தனை பெரிய வெற்றிடம்... இவற்றை இன்னும் அழுத்தமாக உணர்த்தியிருக்கலாம். அது என்ன பாஸ்... 'சுமார் மூஞ்சி குமார்’கள் கறுப்பாகத்தான் இருக்க வேண்டுமா? ஒருவர் முகத்தில் கரியை அப்பிவிட்டால், அவர் பாவப்பட்ட மனிதராகிவிடுவாரா? நியூவேவ் சினிமாவில் ஏன் இவ்ளோ பழங்கஞ்சி சிந்தனை?

பத்திரிகையாளர் சந்திப்பில் சித்தார்த்தின் கோபமும் குமுறலும்... நிஜத்துக்கும் நிழலுக்குமான லிங்க். அந்த அளவுக்கு சுவாரஸ்யமான பிணைப்பை, படத்தின் கனவு... நனவுக் காட்சிகளிலும் இணைத்திருக்கலாம்!

- விகடன் விமர்சனக் குழு