தமிழில் தேசிய கீதம் பாட அனுமதிக்கும் இலங்கை அரசின் முடிவால் சர்ச்சை

இலங்கை தேசிய கீதத்தை தமிழிலும் பாட அனுமதிக்கும் அதிபர் சிறீசேனாவின் முடிவுக்கு, அவரது சொந்தக் கட்சியான இலங்கை சுதந்திரக் கட்சியில் இருந்தே எதிர்ப்பு எழுந்துள்ளது.

இதுதொடர்பாக, அந்நாட்டு நாடாளுமன்றத்தில் அக்கட்சி எம்.பி. சரத் வீரசேகரா பேசியதாவது:

இந்த முடிவு, ஒரு நம்பிக்கை துரோகமேயன்றி வேறொன்றுமில்லை. வெறும் 20 லட்சம் மக்களை (தமிழர்கள்) திருப்திப்படுத்த எடுக்கப்பட்ட முடிவு இது.

6.5 கோடி தமிழ் மக்கள் இருக்கும் இந்தியாவில்கூட, ஹிந்தியில்தான் தேசிய கீதம் பாடப்படுகிறது.

நமது தேசிய கீதம், தேசிய மொழியில்தான் (சிங்களம்) பாடப்பட வேண்டும் என்பது நமது அரசியலமைப்புச் சட்டத்தில் தெளிவாக குறிப்பிடப்பட்டுள்ளது என்று அவர் பேசினார்.

இந்நிலையில், இலங்கை சுதந்திரக் கட்சியின் செய்தித் தொடர்பாளரும், முன்னாள் அமைச்சருமான திலன் பெரேரா கூறியதாவது:

தேசிய கீதம் குறித்து சரத் வீரசேகரா கூறியிருப்பது, அவரது தனிப்பட்ட கருத்து. இது இலங்கை சுதந்திரக் கட்சியின் கருத்து அல்ல. தேசிய கீதத்தின் தமிழாக்கத்தை அரசியலமைப்புச் சட்டம் அனுமதிக்கிறது என்பதில் எங்களுக்கு நம்பிக்கை இருக்கிறது.

இதுபோன்ற இனவாத அணுமுறையால்தான், அதிபர் ராஜபட்ச தோற்கடிக்கப்பட்டார் என்று திலன் பெரேரா கூறினார்.

தேசிய மொழிகள் துறை முன்னாள் அமைச்சர் வாசுதேவ நாணயக்காராவும், "தேசிய கீதத்தை தமிழ் மொழியில் பாடுவதை அனுமதிப்பதால் பாதிப்பு எதுவும் இல்லை' என்று கூறியுள்ளார்.

இலங்கை தேசிய கீதத்தை தமிழில் பாடுவதற்கு எந்தத் தடையும் இல்லை என்பதை வலியுறுத்தி, அனைத்துக் கல்வி நிறுவனங்களுக்கும் விரைவில் சுற்றறிக்கை அனுப்ப உள்ளதாக, அதிபர் சிறீசேனா கடந்த வாரம் அறிவித்திருந்தார்.

முந்தைய அதிபர் ராஜபட்ச, கடந்த 2010ஆம் ஆண்டு முதல் தமிழில் தேசிய கீதம் பாடுவதற்கு அதிகாரப்பூர்வமற்ற தடையை விதித்திருந்தது குறிப்பிடத்தக்கது.
-
தினமணி