மொபைல் மூலம் கர்ப்பிணி பெண்களுக்கு ஆலோசனை !

by **krishnaamma** Wed Mar 18, 2015 8:58 am

மொபைல் மூலம் கர்ப்பிணி பெண்களுக்கு ஆலோசனை: ஆகஸ்ட் 15 முதல் அமல்படுத்த மத்திய அரசு முடிவு !

மொபைல் மூலம் கர்ப்பிணி பெண்களுக்கு ஆலோசனை ! KoysnGqbQLGdmbXfUwiG+Tamil_News_large_1208543

புதுடில்லி: கிராமப்புற கர்ப்பிணி பெண்களுக்கு தேவையான மருத்துவ ஆலோசனைகளை, மொபைல் போன் மூலம் அளிக்க, மத்திய அரசு முடிவு செய்துள்ளது. இந்த புதிய முறை, வரும் ஆக., 15ல், சில மாநிலங்களில் அமலாகிறது.உலகிலேயே, அதிக டாக்டர்கள் பற்றாக்குறை நிலவும் நாடுகளில், இந்தியாவும் ஒன்று. இங்குள்ள கிரமாப்புற பெண்களுக்கு, போதிய மருத்துவ விழிப்புணர்வு இல்லாததால், பிரசவத்தின் போது ஏற்படும் மரணம் அதிகமாக உள்ளது.

போராடி...:

அது போல, பிறந்த குழந்தைகள் இறப்பு வீதமும், இந்தியாவில் அதிகம். இப்பிரச்னையை சரி செய்ய, இந்திய அரசு கடுமையாக போராடி வருகிறது. எனினும், எதிர்பார்த்த பலன்கள் கிடைக்காத நிலை காணப்படுகிறது. உலகிலேயே, அதிக எண்ணிக்கையில் மொபைல் போன்களை பயன்படுத்தும், இரண்டாவது பெரிய நாடாக இந்தியா விளங்குகிறது. சாதாரண, மலிவு விலை போன்களையே, பெரும்பாலான பெண்கள் பயன்படுத்துவதால், அந்த போன்கள் மூலம் பெண்களுக்கு தேவையான விழிப்புணர்வுகளை ஏற்படுத்த, மத்திய அரசு முடிவு செய்துள்ளது.

அந்த வகையில், கர்ப்பம் தரித்த காலத்திலிருந்து, பிரசவமாகும் வரை, ஒவ்வொரு மாதமும், எந்தெந்த நாட்களில் மருத்துவப் பரிசோதனை செய்துக் கொள்ள வேண்டும்; அதற்கு எந்த விதத்தில் தயாராக செல்ல வேண்டும்; எந்தெந்த பாதுகாப்பு முறைகளை பின்பற்ற வேண்டும் என்பன போன்ற, தகவல்களை இலவசமாக வழங்க, மத்திய அரசு முடிவு செய்துள்ளது.

செயல் திட்டங்கள்:

இதுகுறித்து, மத்திய சுகாதாரத் துறை அதிகாரி மனோஜ் ஜலானி என்பவர் கூறும் போது, ''முன்கூட்டியே பதிவு செய்யப்பட்ட அறிவுரை வாசகங்களை, பெண்கள் வைத்துள்ள மொபைல் போன் மூலம் வழங்க முடிவு செய்துள்ளோம்; இதற்காக, விரிவான செயல்திட்டங்கள் வகுக்கப்படுகின்றன; ஆக., 15ம் தேதி முதல், இந்த புதிய முறை அமலுக்கு வருகிறது,'' என்றார். மத்திய தகவல் தொடர்புத் துறையுடன், மருத்துவத் துறை இணைந்து, இந்த புதிய திட்டம் செயல்படுத்தப்பட உள்ளது.

பில்கேட்ஸ் உதவி:

'மைக்ரோசாப்ட்' கம்ப்யூட்டர் நிறுவனத்தின் அதிபர், பில் கேட்ஸ் மற்றும் அவர் மனைவி இணைந்து நடத்தும், மெலிண்டா கேட்ஸ் அறக்கட்டளை, இந்திய சுகாதாரத் துறையுடன் இணைந்து, 'கில்காரி' என்ற இந்த திட்டத்தை செயல்படுத்த உள்ளது. இதற்கு, பிரிட்டன் நாட்டின் செய்தி நிறுவனமான, பி.பி.சி.,யும் உதவி செய்கிறது.

இதுதான் நிலைமை:

* நோயாளிகளுக்கு ஏற்ற வீதத்தில் டாக்டர்கள் இல்லை.

* மருத்துவ ஆலோசனைகளுக்காக, மருத்துவமனைகளில் பெண்கள் நீண்ட நேரம் காத்திருக்க வேண்டியது அவசியம்.

* பெரும்பாலான கிராமங்களில், பெண்களுக்கு போதிய மருத்துவ வசதிகள் கிடைப்பதில்லை.

* கடந்த 2013ல், பிரசவத்தின் போது, 50 ஆயிரம் பெண்கள் இறந்துள்ளனர்.

* குழந்தைகளுக்கு, 5 வயதாகும் முன், 13 லட்சம் குழந்தைகள், 2013ல் இறந்துள்ளன.

* இந்த பாதிப்புக்கு, 'நிமோனியா' காய்ச்சல், சத்து குறைபாடு, சுத்தமான குடிநீர் இல்லாதது, சுகாதாரமான கழிப்பறை இல்லாதது போன்ற, பல காரணங்கள் கூறப்படுகின்றன.

* இந்தியாவின் சுகாதாரத் திட்டங்களுக்கு, போதிய நிதி ஒதுக்கீடு செய்யப்படாததால், மொபைல் போன் மூலம் விழிப்புணர்வு ஏற்படுத்துவது தான், சிக்கனமானதாக இருக்கும் என, கருதப்படுகிறது.

* சுகாதாரப் பணியாளர்களுக்கு, முறையாக சம்பளம் வழங்கப்படாததால், வீடு, வீடாகச் சென்று அவர்கள், பெண்களுக்கு தேவையான விழிப்புணர்வை ஏற்படுத்துவதில்லை.

குழந்தையின் சிரிப்பு:

இந்த புதிய விழிப்புணர்வு முறைக்கு, 'கில்காரி' என, பெயரிடப்பட உள்ளது; இதற்கு, குழந்தையின் சிரிப்பு என, பொருள் கொள்ளலாம். இந்த முறையில், ஒவ்வொரு பெண்ணுக்கும், அவரவருக்கு ஏற்ற தகவல்கள், மொபைல் போன்கள் மூலம், பதிவு செய்யப்பட்ட குரல் மூலம் வழங்கப்படும். மேலும், எந்தெந்த நேரத்தில் சாப்பிட வேண்டும்; என்னென்ன உணவு வகைகள் எடுத்துக் கொள்ள வேண்டும் என்பதில் துவங்கி, குழந்தை பிறந்த பின், குழந்தையின் உடல்நலத்திற்கான தகவல்களும் வழங்கப்படும். முதற்கட்டமாக, இந்தி மொழி பேசும் மாநிலங்களில், அதாவது, இந்தி மொழியில் மொபைல் போன்களில் விழிப்புணர்வு செய்திகள் வழங்கப்படும் போது, அதை கேட்கும் நிலையில் உள்ள மாநிலங்களில், இந்த திட்டம் அறிமுகப்படுத்தப்பட உள்ளது.