மன்மோகனுக்கு சம்மன்: ஆடிப்போனாரா "அம்மன்'

புதுடில்லி: மழை விட்டாலும் தூவானம் விடாது என்பது போல், மத்தியில் ஆட்சி மாறிய பிறகும், ஊழல் குற்றச்சாட்டுகளும், வி.ஐ.பி.,கள் சிக்குவதும் தொடர்கதையாக இருக்கிறது. இதற்கு சமீபத்திய உதாரணம் முன்னாள் பிரதமர் மன்மோகன்சிங்.

நிலக்கரி சுரங்கங்கள் ஒதுக்கீட்டில் ஊழல் நடந்ததாகக் கூறி தொடரப்பட்ட வழக்கில், மன்மோகனுக்கு டில்லி சிறப்பு நீதிமன்றம் சம்மன் அனுப்பி உள்ளது. நாடு முழுவதும் இந்த விஷயம், பரபரப்பையும் ஆச்சரியத்தையும் ஏற்படுத்தி உள்ளது.

பொம்மை பிரதமர்?:

முந்தைய காங்., அரசின் "கைப்பாவை'யாக கருதப்பட்டவர் மன்மோகன். ""சுயமாக இவர் எந்த முடிவும் எடுத்ததில்லை. கட்சி மேலிட உத்தரவை அமல்படுத்திய வேலையை மட்டுமே இவர் செய்தார்'' என்று எப்போதுமே கூறப்பட்டது உண்டு. "உங்கள் பெயர் என்ன என்று கேட்டால், பொறுங்க சோனியாஜியைக் கேட்டு சொல்கிறேன்' என்பார் மன்மோகன்'' என்று கூட கிண்டலாக கூறப்பட்டது உண்டு.

மிஸ்டர் கிளீன் சர்ட்டிபிகேட் புஸ்ஸ்..:

ஸ்பெக்ட்ரம். நிலக்கரி சுரங்க ஊழல்கள் போன்றவை முதன்முதலில் வெளியே கசிந்தபோது, ""யாரை குறை சொன்னாலும் நிச்சயம் மன்மோகனுக்கு இதில் தொடர்பு இருக்காது. தனிப்பட்ட முறையில் அவர் அப்பழுக்கற்றவர்'' என பலர் கற்பூரம் அணைக்காத குறையாக சத்தியம் செய்தனர். இப்போது அவற்றை எல்லாம் மீறி, சம்மன் வரை வந்து நிற்கிறது. ஏற்கனவே தொடர் தேர்தல் தோல்விகளால் நைந்து போய் இருக்கும் காங்., கட்சி, இந்த சம்மனைக் கண்டு அதிர்ந்துபோய், அம்மனைத் தேடி, அதாவது சோனியாவிடம் போய் நிற்கிறது. இதை எதிர்பார்க்காத சோனியாவும், "எங்கள் ஆதரவு என்றும் உங்களுக்கு உண்டு' என்று காட்டுவதற்காகவே மன்மோகன் வீடு வரை கட்சியினருடன் ஊர்வலமாக சென்று, கூட்டம் நடத்தி உள்ளார்.

கறை படிந்த காங்., பிரதமர்கள்:

காங்கிரஸ் பிரதமர்களுக்கு குற்றச்சாட்டுகள் புதிது அல்ல. 1975ல் தேர்தல் முறைகேடுகளில் ஈடுபட்டதாக அப்போதைய பிரதமர் இந்திரா மீது அலாகாபாத் உயர்நீதிமன்றம் கண்டனம் தெரிவித்தது. இடைப்பட்ட காலத்தில் இந்திராவின் வீழ்ச்சிக்கு இதுவே காரணமாக அமைந்தது. பல ஆண்டுகளுக்கு புகைந்துகொண்டு இருந்து போபோர்ஸ் பீரங்கி ஊழலில் முன்னாள் பிரதமர் ராஜிவும் சம்மந்தப்பட்டுள்ளதாக சி.பி.ஐ,, குற்றம்சாட்டியது. அவர் இறந்த பிறகு தான், குற்றச்சாட்டு கைவிடப்பட்டது. ஜார்க்கண்ட் முக்தி மோர்ச்சா எம்.பி.,க்களை விலைக்கு வாங்கிய வழக்கில் மாஜி பிரதமர் நரசிம்மராவுக்கு 3 ஆண்டு சிறை தண்டனை விதித்தது சிறப்பு நீதிமன்றம். பின்னர் மேல்முறையீட்டில் தான் அவர் விடுவிக்கப்பட்டார். அதற்கு அடுத்து, தற்போது மன்மோகன் மீது குற்றம்சாட்டப்பட்டுள்ளது.

அடுத்தது சோனியாவா?:

ஆனால், ஸ்பெக்ட்ரம், காமன்வெல்த் போன்ற "புகழ்பெற்ற' ஊழல்களில், கட்சியினரையும் கூட்டணியினரையும் ஒட்டுமொத்தமாக ஆதரிக்காத காங்கிரஸ், முதன்முறையாக மன்மோகன் விஷயத்தில் ஒன்று திரண்டுள்ளனர். சோனியா கூறும்போது, "உலக அளவில் புகழ்பெற்றவர் மன்மோகன். நம்பகத்தன்மை கொண்டவர். நேர்மையானவர். அவருக்கு முழுமையாக ஆதரவாக இருப்போம். சட்டப்பூர்வமாக போராடி, பிரச்னையை முடிவுக்கு கொண்டு வருவோம்'' என்றார்.பா.ஜ., எம்.பி., ஒருவர் கூறும்போது, ""மன்மோகனின் பின்னால் காங்கிரஸ் அணிவகுத்து நிற்பதற்கு காரணம் இருக்கிறது. எங்கெங்கோ சுற்றிய ஊழல் சக்கரம் கடைசியில் மன்மோகனிடம் வந்து நிற்கிறது. இச்சக்கரம் அடுத்ததாக சோனியாவை சுட்டிக்காட்டிவிடுமோ என அக்கட்சியினர் அஞ்சுகின்றனர். இதனாலேயே மன்மோகனுக்கு அவர்கள் ஆதரவாக இருக்கின்றனர்'' என்றார். காங்கிரஸ் கட்சியினரோ, மன்மோகனுக்கு நன்னடத்தை சான்றிதழை கண்ணை மூடிக்கொண்டு கொடுக்கின்றனர். இவர்கள் எப்படி பேசினாலும், இப்பிரச்னைக்கு முடிவு என்னவோ நீதிமன்றத்தின் கைகளில் தான் உள்ளது!

தினமலர்

அட போங்க சிங் ஜி மகாத்மா காந்தி, அன்னை தெரெசா இவங்களையே விட்டு வைக்கல - நீங்க எம்மாத்திரம் - காங்கிரஸ் செய்யாத ஊழலை வேறு யாரும் செய்திருக்க முடியாது