வசூலில் கவுன்சிலர்களை 'ஓவர் டேக்' செய்த போலீஸ்!

தமிழகத்தில், மக்களை மிரட்டி பணம் பறிப்பதில், கவுன்சிலர்களை, போலீசார், 'ஓவர் டேக்' செய்துவிட்டதாக குற்றச்சாட்டு எழுந்துள்ளது.

தமிழகத்தில், மாநகராட்சி உள்ளிட்ட உள்ளாட்சி அமைப்புகளில், அ.தி.மு.க.,வினர் அதிகளவில் பொறுப்பு வகிக்கின்றனர். அதிலும், 200 வார்டுகளை கொண்ட, சென்னை மாநகராட்சியில், கவுன்சிலர்கள் உள்ளனர்.வார்டு கவுன்சிலர் பதவி என்பது ஜனரஞ்சகமானது. மக்களோடு நெருங்கி பழகி, அவர்களின் தேவையை பூர்த்தி செய்து, இந்த பதவியில் முத்திரை பதிக்கலாம்.ஆனால், கவுன்சிலர்கள், மக்கள் சேவையை விட, பாக்கெட்டை நிரப்புவதிலேயே குறியாக உள்ளனர். அது பற்றி, முன்னாள் முதல்வர் ஜெயலலிதா, உளவு பிரிவு போலீசார் வாயிலாக, 'வசூலில் ஆட்டம் போடும் கவுன்சிலர்கள்' குறித்து பட்டியல் தயாரித்தார். அதில் ஒருவர் கூட தேரவில்லை. புதிதாக, வீடு கட்டுவோர் மிரட்டி பணம் பறித்தல், ரோட்டோர கடை, லாட்ஜ்களில் மாமூல் வசூலிப்பது, வீடு கட்ட பிளான் வாங்கி

கொடுப்பது, குடிநீர், கழிவு நீர் இணைப்புக்கு, ரோடு கட்டிங் என, வசூலில் ஈடுபட்டு வந்தது தெரிய வந்தது.

சென்னை, மயிலாப்பூரில், பெண் கவுன்சிலர் ஒருவர், பாலியல் தொழிலாளியிடம் பணம் கேட்டு மிரட்டியது உட்பட, பல்வேறு விஷயங்கள் அம்பலத்துக்கு வந்தது.இதையடுத்து, 169 கவுன்சிலர்களையும் நேரில் சந்தித்த ஜெயலலிதா, ஒவ்வொருவரும், எப்படி வசூல்ஈடுபட்டனர் என்பதை படித்து காட்டி எச்சரித்தார். சிலரை எழுந்து நிற்கச்சொல்லி, தவறை சுட்டிக் காட்டினார்.

அதன் பின், கவுன்சிலர்களின் ஆட்டம் சற்று குறையத் துவங்கியது.அதன் பின், கவுன்சிலர்கள் விட்ட பணியை, போலீசார் கையில் எடுக்க துவங்கினர். சென்னை போன்ற இடங்களில், வீடு கட்டுவதை விட, கப்பம் கட்டும் தொகை அதிகமாக இருப்பதாக கூறப்படுகிறது.மேலும், ஒரு நம்பர் லாட்டரி விற்பனை, கஞ்சா விற்பனையை கண்டுகொள்ளாமல் இருத்தல், சட்ட விரோத டாஸ்மாக் கடை, பாலியல் தொழிலுக்கு அனுமதி என, போலீசார் வசூலில் வெளுத்து வாங்குகின்றனர்.

சாட்டையை சுழற்றப்போவது யார்?

தமிழகத்தில், முதல்வர் மாற்றத்திற்கு பின், போலீசாரின் சட்ட விரோத நடவடிக்கை எல்லை மீறிவிட்டது. சென்னை, கீழ்பாக்கம், நட்டத்திர ஓட்டலில், போதைபொருள் வினியோகத்திற்கு அனுமதி அளித்து, உயர் போலீஸ் அதிகாரிகள் சிக்கி இருப்பதாக காவல் துறை வட்டாரத்தில் பேச்சு அடிபடுகிறது.இந்த விவகாரத்தில், இரண்டு போலீஸ் இன்ஸ்பெக்டர்கள், சென்னை கமிஷனர் அலுவலக உயர் போலீஸ் அதிகாரிகளின் கண்டிப்புக்கு ஆளாகி உள்ளனர்.கவுன்சிலர்களின் கொட்டத்தை அடக்க, உளவு போலீசார் தான், வசூல் பட்டியல் தயார் செய்தனர். தற்போது, போலீசாரே, இந்த குற்றச் செயலில் ஈடுபடுவதால், சாட்டையை சுழற்றப்போவது யார் என, கேள்வி எழுந்துள்ளது.

தினமலர்