காங். எம்.எல்.ஏ.க்களை விலைக்கு வாங்க கெஜ்ரிவால் பேரம்: டேப்பில் இடம்பெற்ற உரையாடல் என்ன?

டெல்லி தேர்தலில் பெரும்பான்மையான தொகுதிகளை பிடிக்க முடியாததால் காங்கிரஸ் எம்.எல்.ஏ.க்களின் ஆதரவுடன் ஆம் ஆத்மி கட்சி ஆட்சியை அமைத்தது. காங்கிரசுடன் ஏற்பட்ட கருத்து வேறுபாடு காரணமாக 49 நாட்களில் முதல்-மந்திரி கெஜ்ரிவால் தலைமையிலான டெல்லி ஆட்சி கவிழ்ந்தது.

பின்னர், பா.ஜ.க. அங்கு ஆட்சியை பிடிப்பதை தடுக்கும் வகையில் காங்கிரஸ் எம்.எல்.ஏ.க்களில் சிலரை விலைக்கு வாங்க கெஜ்ரிவால் பேரம் நடத்தியதாக கடந்த ஆண்டில் செய்திகள் வெளியாகின. இதை ஆம் ஆத்மி கட்சி வன்மையாக மறுத்தது.

பின்னர், கடந்த பிப்ரவரி மாதம் நடைபெற்ற டெல்லி சட்டசபை தேர்தலில் அமோக வெற்றி பெற்ற ஆம் ஆத்மி மீண்டும் ஆட்சியை பிடித்தது. முதல்-மந்திரியாக பதவி ஏற்ற அரவிந்த கெஜ்ரிவால், தனக்கென எந்த துறையையும் வைத்துக்கொள்ளாமல் துணை முதல்-மந்திரி மணிஷ் சிசோடியாவிடம் அனைத்து பொறுப்புகளையும் ஒப்படைத்துவிட்டு தற்போது பெங்களூரில் இயற்கைவழி வைத்திய சிகிச்சை பெற்று வருகிறார்.

இந்நிலையில், முந்தைய ஆம் ஆத்மி ஆட்சி கவிழ்ந்தபோது, எப்படியாவது பதவியை பிடிக்க வேண்டும் என எண்ணிய அரவிந்த் கெஜ்ரிவால் இதற்காக காங்கிரஸ் எம்.எல்.ஏ.க்களில் சிலரை விலைக்கு வாங்க முயற்சித்தது தற்போது ஆடியோ ஆதாரமாக வெளியாகியுள்ளது.

அந்த ஆடியோவில் அரவிந்த் கெஜ்ரிவாலும் காங்கிரஸ் எம்.எல்.ஏ.வான ராஜேஷ் கார்க் என்பவரும் பேசியதாக வெளியான ஆடியோ பதிவு இதோ, எழுத்து வடிவில்...

அரவிந்த் கெஜ்ரிவால்: நாங்கள் ஆட்சியை அமைக்க தயாராக இருக்கிறோம். ஆனால், எங்களை ஆதரிக்க காங்கிரஸ் தயாராக இல்லை. மணிஷ் சிசோடியா காங்கிரசோடு தொடர்பில் உள்ளார். ஒன்று செய்யுங்கள். காங்கிரசை உடைத்து, 6 எம்.எல்.ஏ.க்களை வெளியே இழுத்து, புதிதாக ஒரு கட்சியை ஆரம்பிக்க சொல்லுங்கள். அந்த கட்சியின் எம்.எல்.ஏ.க்களாக எங்களது ஆட்சிக்கு ஆதரவு அளிக்க வையுங்கள்.

ராஜேஷ் கார்க்: ஆகட்டும் ஐயா.

அரவிந்த் கெஜ்ரிவால்: நாங்கள் ஒன்றரை மாதமாக முயற்சித்து வருகிறோம். காங்கிரஸ் எங்களை ஆதரிப்பதுபோல் இல்லை. இந்த 6 எம்.எல்.ஏ.க்களும் பா.ஜ.க.வை ஆதரித்து வந்துள்ளனர். இவர்களில் மூன்று பேர் முஸ்லிம்கள்.

ராஜேஷ் கார்க்: இது தொடர்பாக உரிய வகையில் திட்டமிட தொடங்குகிறேன்.

அரவிந்த் கெஜ்ரிவால்: அவர்கள் பா.ஜ.க.வை ஆதரிக்க மாட்டார்கள். அந்த ஆறு எம்.எல்.ஏ.க்களும் எங்களைதான் ஆதரிக்க வேண்டும்.

ராஜேஷ் கார்க்: ஆகட்டும் ஐயா, ஆகட்டும்.

இன்று வெளியான இந்த ஆடியோ ஆதாரம் டெல்லி அரசியல் வட்டாரத்தில் பெரும் புயலை கிளப்பும் விவாத பொருளாக மாறியுள்ளது. -maalaimalar