"கச்சத்தீவை மீட்பது மீனவர் பிரச்னைக்குத் தீர்வாகாது'

-

ராமேசுவர மீனவர்கள் பிரச்னைக்கு கச்சத்தீவை மீட்பது
தீர்வாகாது என சென்னை மேம்பாட்டுக் கல்வி
நிறுவனத்தின் இணைப் பேராசிரியர் அஜித் மேனன்
தெரிவித்தார்.

பாக் ஜலசந்தியில் அரசியல் சூழல் குறித்த கருத்தரங்கம்
சென்னை அடையாறில் உள்ள சென்னை மேம்பாட்டுக்
கல்வி நிறுவனத்தில் திங்கள்கிழமை நடைபெற்றது.

நிகழ்ச்சியில் அஜித் மேனன் பேசியது:

தனது வளங்களை இழந்து கொண்டிருக்கும் கச்சத்தீவை
மீட்பதால் இந்திய மீனவர்களின் வாழ்வாதாரத்துக்கு
போதுமான அளவு மீன்கள் கிடைக்காது.

ஏனென்றால் இந்திய மீனவர்கள் பல நேரங்களில்
இலங்கையின் மீன்பிடி எல்லையில் அதிக தொலைவுக்கு
ஊடுருவிச் செல்கின்றனர்.

மீனவர்களே கச்சத்தீவை மீட்பது தங்கள் பிரச்னைக்கு
தீர்வாகாது என்று கருதுகின்றனர். மேலும் 20 சதவீத
பிரச்னைகளை மட்டுமே கச்சத்தீவை மீட்பதன் மூலம்
தீர்க்க முடியும் என்றும் அவர்கள் தெரிவிக்கின்றனர்.

இந்தியா கச்சத்தீவை மீட்பது என்பதற்கான சாத்தியம்
மிகவும் குறைவு. அவ்வாறு கச்சத்தீவு இந்தியாவால்
மீட்கப்பட்டாலும் மீனவர்கள் பிரச்னை தீராது.

தடை செய்யப்பட்ட வலைகளைக் கொண்டு இந்திய
விசைப்படகு மீனவர்கள் இலங்கைப் பகுதியில் மீன்
பிடிப்பதைக் தடுக்கும் வகையில் கண்காணிப்பைத்
விரப்படுத்த வேண்டும் என்று அந்த நாட்டு அரசை
இலங்கை வடக்கு மாகாண மீனவர்கள் தொடர்ந்து
வலியுறுத்தி வருகின்றனர்.

இலங்கையிலும் போட்டி அரசியல் நடைபெற்று
வருவதால் புதிதாக அமைந்துள்ள அரசு, மீனவர்களின்
வாக்கு வங்கியைத் தக்க வைப்பதற்காக பிரச்னையை
அவர்களுக்குச் சாதகமாகத் தீர்க்கவே முயலும்.

மீனவர் பிரச்னையை தீர்ப்பதற்கு ஆழ்கடல் பகுதியில்
மீன்பிடிக்குமாறு இந்திய மீனவர்களை மத்திய அரசு
தொடர்ந்து வலியுறுத்தி வருகிறது. கடந்த பட்ஜெட்டில்
இதற்கான மானியம் குறைவாக அளிக்கப்பட்டதால்,
அந்த மாற்று நடவடிக்கையை இந்திய மீனவர்கள்
கடைப்பிடிக்கவில்லை. எனவே நிகழாண்டு பட்ஜெட்டில்
கூடுதல் தொகை ஒதுக்கப்பட்டுள்ளது.

இந்தப் பிரச்னையை தீர்ப்பதற்கு திரிகோண மலை
ப்பகுதியின் கிழக்குப் பகுதியில் உள்ள கடற்கரையில்
மீன் பிடிக்கலாம் என்பது மற்றொரு மாற்றுக்
கருத்தாகும் என்று அவர் தெரிவித்தார்.
-
------------------------------------------
தினமணி

தகவலுக்கு நன்றி........