- திருஷ்டி! - ஒரு பக்க கதை

**ayyasamy ram** · **ayyasamy ram** Fri Mar 06, 2015 8:03 pm

"ஏங்க! ஊரிலிருந்து வந்திருக்கிற உங்க தாத்தாவின்
பார்வையே சரியில்லை!' - கணவரிடம் புகார் செய்தாள்
கல்யாணி.

"ஏண்டி! அவருக்கு வயசு எழுபதுக்குமேல் ஆகுது...
அவரைப்போய்...'

"ஐயோ... நான் அந்த அர்த்தத்தில் சொல்லலைங்க!
போனவாரம், பக்கத்து வீட்டுக் குழந்தையைப் பார்த்து,
ரொம்ப அழகா இருக்குன்னு திரும்ப திரும்பச்
சொன்னார். இப்போ அந்த குழந்தைக்கு காய்ச்சல்
வந்திடுச்சு!'

"நாலு நாளைக்கு முன்னே அந்த குழந்தைக்கு, குச்சி
ஐஸ் வாங்கிக் கொடுத்தாங்களே... ஞாபகம் இருக்கா?
அதனால் வந்திருக்கலாம்' என்றான், கல்யாணியின்
கணவன்.

கல்யாணி ஏற்கவில்லை. "மூணு நாளைக்கு முன்னால்,
மேல்வீட்டுப் பொண்ணு பரதநாட்டியம் ஆடுறதைப்
பார்த்தார். பிரமாத ஆடுறான்னு சொன்னார். மறுநாளே
அவள் மாடிப்படியில் உருண்டு விழுந்துட்டா.. கால்
எலும்பு முறிஞ்சு போச்சு.'

"அவங்க வீட்டு மாடிப்படி வழுக்குதுன்னு ஏற்கெனவே
சொல்லி இருக்காங்களே? அது தான் காரணம்.'

கணவனின் பதிலை மறுத்தாள், கல்யாணி.
"நேத்துக் காலையில் எதிர்வீட்டு நாயைத் தடவிக்
கொடுத்துட்டு இருந்தார்... இன்னைக்குக் காலையில்
அது செத்துப் போச்சு.'

"கார் போகும்போது அது குறுக்கே போனதை நானே
பார்த்தேன்.'

"இல்லைங்க! தாத்தாவுக்கு மோசமான கண்ணு! அவர்
திருஷ்டி பட்டுதான் இப்படி எல்லாம் ஆகுது' என்றாள்
கல்யாணி.

மறுநாள், தாத்தா தெருபக்கம் போனார். "ரோடுபோட
கல் கொட்டியிருக்கு... பார்த்துப்போங்க...' என்று
எச்சரிப்பதற்குள், கல் தடுக்கி விழுந்து, கண்ணாடி
குத்தி, கண்ணிலிருந்து ரத்தம்...

"கல்யாணி... உன் கண்பட்டுதான் தாத்தாவுக்கு இப்படி
ஆயிடுச்சுன்னு சொல்லலாமா?' - கணவன் கேட்டதும்,
தலைகுனிந்து கொண்டாள், கல்யாணி.
-
--------------------------------------

- எஸ். குமாரகிருஷ்ணன்

குமுதம்[/b]