இயலாமையின் மொழி அல்ல!

**ayyasamy ram** · **ayyasamy ram** Sun Mar 08, 2015 6:35 pm

-
கல்யாணக் கன்னியும்
கடை நாற்காலியும்
வேறுபாடுகளில்லாத
விற்பனை பொருட்கள்!

விவாகமும், விற்பனையும்
கணநேரத்தில்
காவு வாங்கிவிடும்
கடுமை மிக்கவை!

வரும் வரனையும்,
வாங்கும் நபரையும்
பொறுத்து அமைகிறது
இவற்றின் வாழ்க்கை!

நங்கையின் குமுறலும்
நாற்காலியின் அழுகையும்
ஊமைக்குரலாகவே
ஒடுங்கி விடுகின்றன!

தவிக்கும் பெண்ணும்
சுமக்கும் நாற்காலியும்
‘சும்மாடுகள்’
அவை
சுமை தாங்கிகளே ஒழிய
சுகம் நாடிகள் அல்ல!

கொண்டவன்
வாங்கும் லஞ்சமும்
செய்யும் சூழ்ச்சியும்
தடுக்கத் திறனில்லாமல்
தவிக்கவே செய்கின்றன!

ஞான தீட்சையோ
காம வேட்கையோ
அறிவுத் தேடலோ
அரசியல் சாடலோ
எல்லாவற்றுக்கும்
ஈடு கொடுக்க வேண்டியவை
இவை மட்டுமே!

எப்போதும்
ஏர்பிடித்தவனை விட்டுவிட்டு
உலகம்
பானை பிடித்தவளையே
பழி சொல்கிறது!

இவற்றின் சினம்
எல்லை மீறுகிற போது
சாதுமிரண்டால் நிலை
சந்திக்கு வருகிறது!

அப்போது, அவை
அலட்சியம் செய்தவனை
புரட்டி போட்டு விடுகின்றன!

மனிதருள் சிலருக்கு
சகதியில் விழுந்த பிறகே
இவற்றின்
சக்தி தெரிகிறது!

இரண்டும் இறுதியாய்
இதழ்திறவாமல்
எச்சரிக்கின்றன
மவுனம்…
இயலாமையின் மொழியல்ல;
எதிர்ப்பின் ஒரு துளி!

-

========================
— யாழினிஸ்ரீ, மேட்டுப்பாளையம்.

வாரமலர்

சிவனாசான் · சிவனாசான் Sun Mar 08, 2015 8:04 pm

நல்ல கவிதைநயம் அன்பரே.........

இயலாமையின் மொழி அல்ல!

இயலாமையின் மொழி அல்ல!

Re: இயலாமையின் மொழி அல்ல!

மறுமொழி எழுத நீங்கள் உறுப்பினராக இருக்க வேண்டும்..

உறுப்பினராக பதிவு செய்க

உள்நுழைக