பிரதமரை புன்னகைக்க வைத்த யோகா !

* பட்ஜெட் தாக்கல் செய்ய வந்திருந்த நிதி அமைச்சர் அருண் ஜெட்லி, நீல நிற சட்டையும், கறுப்பு நிற பேன்டும் அணிந்திருந்தார். சட்டையின் மேல், நீல நிற நேரு கோட் அணிந்திருந்தார்.

* ஜெட்லியின் பட்ஜெட் தாக்கலை, அவரின் சகோதரி மது பர்கவா, உறவினர் புனிதா ஆகியோர், பார்வையாளர் மாடத்திலிருந்து பார்த்து ரசித்தனர்.


* அருண் ஜெட்லி, பட்ஜெட் உரையை வாசிக்க, 100 நிமிடங்கள் எடுத்துக் கொண்டார்.


* பட்ஜெட் உரையை துவங்கிய, 22வது நிமிடத்தில், சோர்வு ஏற்பட்டதால், சபாநாயகர் சுமித்ரா மகாஜனின் அனுமதியுடன், இருக்கையில் அமர்ந்தபடி உரையை தொடர்ந்தார்.


* பட்ஜெட் உரையை வாசிப்பதற்கு வசதியாக, மத்திய அமைச்சர் நிதின் கட்காரி அமரும் இருக்கையில் ஜெட்லி அமர்ந்தார்.


* முதல் வரிசையில் அமர்ந்திருந்த பிரதமர் நரேந்திர மோடி, தண்ணீர் டம்ளரை, ஜெட்லிக்கு அருகில் எடுத்து வைக்கும்படி, லோக்சபா ஊழியர்களுக்கு அறிவுறுத்தினார்.


* பட்ஜெட் உரையின்போது, இடையிடையே, தண்ணீரையும், பழரசத்தையும் ஜெட்லி அருந்தினார்.

* தன் உரையின்போது, கடந்த காங்., ஆட்சி காலத்தில் நடந்த முறைகேடுகள், தற்போது, பொருளாதார வளர்ச்சிக்கு முட்டுக்கட்டையாக இருப்பதாக ஜெட்லி, தாக்கி பேசினார்.


* பொருளாதார வளர்ச்சியை அதிகரிப்பதற்கான திட்டம் குறித்தும், பேரியல் பொருளாதாரத்தின் நிலைத்தன்மை குறித்தும் ஜெட்லி பேசியபோது, பிரதமர் நரேந்திர மோடி உள்ளிட்ட ஆளுங்கட்சி உறுப்பினர்கள் பலரும், மேஜையை தட்டி, பாராட்டு தெரிவித்தனர்.


* ''யோகா, அறக்கட்டளை வரம்பிற்குள் கொண்டு வரப்படும்,'' என, ஜெட்லி பேசியபோது, பிரதமர் மோடியின் முகத்தில் புன்னகையை காண முடிந்தது. அப்போது, மேஜையை பலமாக தட்டி, தன் மகிழ்ச்சியை பிரதமர் வெளிப்படுத்தினார்.


* மகாத்மா காந்தி தேசிய கிராமப்புற வேலை வாய்ப்பு திட்டம் பற்றி ஜெட்லி பேசும்போது, எதிர்க்கட்சி உறுப்பினர்களுக்கும், ஆளுங்கட்சி உறுப்பினர்களுக்கும் இடையே வாக்குவாதம் ஏற்பட்டது.


* பட்ஜெட் உரையின்போது, எதிர்க்கட்சி வரிசையில் அமர்ந்திருந்த சிலர், ஆழ்ந்த தூக்கத்தில் இருந்ததை காண முடிந்தது.


* ஜெட்லி, குறிப்பிட்ட சில விஷயங்களை பற்றி பேசும்போது, ஆங்கிலத்திலிருந்து இந்திக்கு தாவி, அந்த விஷயங்களை விளக்கினார்.


* பாரம்பரிய சின்னங்களை பாதுகாப்பது தொடர்பாக ஜெட்லி பேசியபோது, பீகார், தமிழகம் ஆகிய மாநிலங்களை சேர்ந்த எம்.பி.,க்கள், 'தங்கள் மாநிலத்தில் உள்ள பாரம்பரிய சின்னங்களுக்கும் அதுபோன்ற சலுகை வேண்டும்' என, கோஷம் எழுப்பினர்.


* பட்ஜெட் உரையின்போது, முதலீடு என்ற வார்த்தையை, 60 முறையும், வளர்ச்சி என்ற வார்த்தையை, 27 முறையும், ஜெட்லி பயன்படுத்தினார்.


* பட்ஜெட் உரையை முடிக்கும்போது, 'எல்லா மக்களும் மகிழ்ச்சியுடன் வாழட்டும்' என்ற அர்த்தம் பொதிந்த

'ஓம் சர்வே ஜனா சுகினோ பவந்து' என்ற உபநிஷத்தை மேற்கோள் காட்டினார்.

தினமலர்