குக்கர் பராமரிப்பது எப்படி?

விபத்தின்றி குக்கர் பராமரிப்பது குறித்து எழுதத் தொடங்கினேன் இல்லையா? இந்த வாரம் அது பற்றி விரிவாகக் கவனிப்போம். சமையல் இன்று கஷ்டமில்லாமல் விரைவில் முடிகிறது என்றால் அதில் குக்கரின் பங்கு பிரதானம். பிரஷர் குக்கர் இல்லாத சமையல் அறையே இன்று இல்லாத நிலையில், அதன் பராமரிப்பு பற்றி அவசியம் தெரிந்துகொள்ள வேண்டும். குக்கர் பராமரிப்பு குக்கரின் ஆயுளை மட்டும் நீட்டிப்பதில்லை. குக்கர் வெடிக்காமல் இருந்தால் நம் ஆயுளும் நீடிக்கும் அல்லவா?

சமையல் முடிந்தவுடனேயே குக்கரின் மூடியைத் திறந்து ரப்பர் கேஸ்கட்டைக் கழற்றி அதை நன்கு சுத்தமாகக் கழுவி நன்கு இழுத்துவிட்டுப் பின்பு உரிய இடத்தில் மாட்டவேண்டும். இப்படிச் செய்தால் ரப்பர் கேஸ்கெட் 6 மாதங்களுக்குக்கூட வரும். சிலர் குக்கர் மூடியைத் திறந்தபின்பு கேஸ்கெட்டை எடுக்காமல் அப்படியே வைத்துவிடுவார்கள். சிலர் கேஸ்கெட்டை இரண்டு, மூன்று நாள்களுக்கு ஒரு முறைதான் சுத்தம் செய்வார்கள். இது மிகவும் தவறு. சூட்டோடு அப்படியே போடுவதால் ரப்பர் அப்படியே இறுகிப்போய்விடும். இதனால் கேஸ்கெட் அதிக நாள் உழைக்காது. முன்பு சொன்னதுபோல் செய்தால் அதன் ஒரிஜினல் சைஸில் இருக்கும். நீண்ட நாள் உழைக்கும்.

குக்கரின் உட்புறம் கறுப்பாக இருக்கும். எலுமிச்சைத் தோல் அல்லது வினிகர் கொஞ்சம் போட்டுப் பின்பு அதில் வைக்கக் கூடிய பாத்திரங்களை அடுக்கிவைப்பதால் அதன் உட்புறம் கறுப்பாகாமல் இருக்கும். கறுப்பாக இருந்தாலும் இந்த முறையின் மூலம் கறுப்பு நீங்கி விடும். தற்போது காப்பர் பாட்டம், நான் ஸ்டிக் சாண்ட்விட்ச் போன்ற வகைகளைப் பயன்படுத்துகிறார்கள். கேஸ் அடுப்பில் தீயை அதிகமாக வைத்து இவற்றைப் பயன்படுத்தக் கூடாது. தண்ணீர் அதிகம் இல்லாமல், தீயும் அதிகமாக இருந்தால் பாத்திரம் சீக்கிரம் கெட்டுவிடும். இவ்வகைப் பாத்திரங்களைப் பயன்படுத்தும்போது அடுப்பில் தீயை ரொம்பவும் குறைத்து "சிம்'மில் வைத்தாலே போதும். சமையலும் சீக்கிரம் முடியும், கேஸýம் மிச்சப்படும். டெஃப்லான், சாண்ட்விட்ச், காப்பர் பாட்டம் போன்ற பாத்திரங்களால் சமைப்பது ஆரோக்கியமானதும்கூட. இவைகளைப் பராமரிக்கும் விதத்தைப் புரிந்து கொண்டால் ஆரோக்கியமும் கிடைக்கும். சிக்கனமும் ஆகும்.

அடுத்து, நம் பராமரிப்பு விஷயத்தில் கவனம் செலுத்த வேண்டிய பொருள் ஃப்ரிட்ஜ். ஒரு காலத்தில் பெரிய பணக்கார வீடுகளில் மட்டும்தான் வாங்க முடியும் என்று கருதப்பட்ட ஃப்ரிட்ஜ் இன்று வீட்டுக்கு வீடு இருக்கிறது. காய்கறிகள், சமைத்த ஐட்டங்கள் ஆகியவற்றைக் கெடாமல் பாதுகாத்துத் தேவைப்படும்போது எடுத்துப் பயன்படுத்த அவசியமானது. இன்றைய வாழ்க்கையில் அனைத்துக் குடும்பத்துக்கும் அத்யாவசியமானது. இட்லி, தோசைக்கு மாவு அரைக்கும்போது ஒரு நாளைக்கு மட்டும் என்று அரைக்க முடியுமா? இரண்டு, மூன்று நாள்களுக்குத் தேவையான மாவை அரைத்துவைத்தால் புளித்துப் போகுமோ என்ற பயம் இல்லை. இப்படி ஃப்ரிட்ஜின் பயன்கள் பல.

இட்லி, தோசைக்கு மாவு அரைக்கும்போது ஒரு பெரிய பாத்திரத்தில் மொத்தமாக வைக்காமல் ஒரு நாளைக்குத் தேவையான அளவு கொள்ளும் சின்னச் சின்னப் பாத்திரங்களில் வைத்தால் அந்த ஒரு பாத்திரத்தை மட்டும் எடுத்து மாவு தீர்ந்த பிறகு "சிங்'கில் தேய்க்கப் போட்டுவிடலாம். பெரிய பாத்திரம் என்றால் தினமும் அதை வேறு பாத்திரத்தில் மாற்ற வேண்டும். தேவையில்லாமல் பெரிய பாத்திரங்களை ஃப்ரிட்ஜுக்குள் வைப்பதால் கரண்ட் செலவும் அதிகம். இதையும் நாம் கவனிக்க வேண்டுமே!

கோடைக்காலத்தில் வாரம் ஒரு முறையும், குளிர்காலத்தில் வாரம் இரண்டு முறையும் டி-ப்ராஸ்ட் செய்ய வேண்டும். மலை போல ஐஸ் கட்டுவதால் கரண்ட் செலவு கூடும். ப்ரிட்ஜ் கதவை அடிக்கடித் திறப்பதோ, திறந்துவைத்து விடுவதோ கூடாது. கதவை வேகமாக அடித்து சாத்தினால் சில சமயம் மூடாமல் போய்விடலாம்.

வாரம் ஒருமுறை அல்லது பத்து நாள்களுக்கு ஒரு தடவையாவது ஃப்ரிட்ஜின் உட்புறத்தை நன்றாகத் துடைக்க வேண்டும். வாங்கும்போதே நமக்குத் தேவையான அளவை நிர்ணயித்து வாங்க வேண்டும். வாங்கிய பின், "ஐயோ... இந்த மாடல் நம் கண்ணில் படவில்லையே' என்று வருந்தாமல், முதலிலேயே பார்த்துத் திட்டமிட வேண்டும். ஃப்ரிட்ஜை வருடத்துக்கு இரு முறையாவது சர்வீஸ் செய்ய வேண்டும்.