சித்தார்த்தன்

கபிலவஸ்துவை ஆட்சி செய்து கொண்டிருந்த மன்னன் சுத்தோதனுக்கும், மாயாதேவிக்கும் உலுவ வனத்தில் மகனாய் பிறந்த சித்தார்த்தரே பின்னாளில் கவுதம புத்தர் ஆனார். இவர் யசோதாவை மணந்து ராகுலன் என்ற மகனை பெற்று இருந்தார். இளமையிலேயே துன்பம், துயரங்களை அறியாதவாறு இன்பமான வாழ்க்கையை நடத்தினார்.

இருப்பினும் நோய், மூப்பு, மரணம் போன்ற நிகழ்வுகளை அவர் காண நேரிட்டது. இதனால், மனவேதனை அடைந்த சித்தார்த்தர், உண்மையை அறிய தன் மனைவி, மகன், குடும்பத்தை துறந்து வெளியேறினார். இறுதியில் போதி மரத்தடியில் அமர்ந்து தியானம் செய்தார். அங்கு அவருக்கு ஞானம் பிறந்தது.

இதன்பின் புத்தர் என அழைக்கப்பட்டார். தமது முதல் போதனையை காசிக்கு அருகில் உள்ள சாரநாத்தில் செய்தார். அதன் பின்பு 45 ஆண்டுகள் பல்வேறு இடங்களில் போதனை செய்து கி.மு.487-ல் குஷி என்ற நகரில் நிர்வாணம் என்ற முக்தி நிலையை அடைந்தார். வேத சடங்குகளையும், வேள்விகளையும் புத்தர் கண்டித்தார்.

நான்கு உண்மைகளை வலியுறுத்தினார்.

பிறந்தவர்கள் அனுபவிப்பது துன்பமே. பிறப்புக்கு காரணம் ஆசையே. ஆசை இல்லாவிட்டால் பிறவியும் இல்லை. துன்பமும் இல்லை. இவை போக நன்னம்பிக்கை, நன்னோக்கம், நன்மொழி, நற்செயல், நல்வாழ்க்கை, நன்முயற்சி, நன்மனம், நல்ல தியானம் போன்றவை நிர்வாணம் என்ற பிறவா நெறியை அடையும் மார்க்கம் என்றார்.

புத்தர் தம்மை கடவுளின் அவதாரம் என்றோ, கடவுளின் தூதர் என்றோ, தீர்க்கதரிசி என்றோ கூறிக்கொள்ளவில்லை. கடவுள் இருக்கிறாரா? இல்லையா? என்பது பற்றி அவர் பெருந்தன்மையுடன் மவுனம் சாதித்தார். அவர் அற்புதம் எதையும் நிகழ்த்தவில்லை. சாதிப் பிரிவுகளை நம்பவில்லை.

உபாலி என்ற முடிவெட்டும் தொழிலாளியையும், சனிதா என்ற துப்புரவு தொழிலாளியையும் புத்த சங்கத்தில் சேர்த்துக் கொண்டார். பாமர மக்களுக்கும், பிட்சுகளுக்கும், பிக்குனிகளுக்கும் ஒரு உயர்ந்த நடத்தை தரத்தை வலியுறுத்தினார்.

ஆசியாவின் ஜோதி என்று புத்தரை மக்கள் போற்றினர். இதைத்தொடர்ந்து முதலில் மகத நாட்டு அரசன் பிம்பசாரனும், அஜாத சத்ருவும், கோசல நாட்டு அரசன் பிரசெனஜித்தும் பொதுமக்கள் பலரும் புத்த மதத்தை தழுவினர்.

இவ்வளவு சிறப்புகள் இருந்த போதும் இன்று இந்தியாவில் சமணர்கள் உள்ள அளவுக்கு பவுத்தர்கள் இல்லை. புத்த மதம் இந்தியாவில் இல்லை என்றாலும் உலக மதங்களில் ஒன்றாக திகழ்கிறது. திபெத், சீனா, மியான்மர், இலங்கை, ஜப்பான், சுமத்திர, ஜாவா, பாலித்தீவுகள் ஆகிய நாடுகளில் புத்த மதம் பரவியுள்ளது.