தமிழை வழக்காடு மொழியாக்க உயர் நீதிமன்ற நீதிபதிகளும் போராட வேண்டும்

சென்னை உயர் நீதிமன்றத்தில் தமிழை வழக்காடு மொழியாக்க நீதிபதிகளும் போராட்டம் நடத்த வேண்டும் என்று தமிழறிஞர் தமிழண்ணல் வேண்டுகோள் விடுத்தார்.

சென்னை உயர் நீதிமன்றத்தில் தமிழை வழக்காடு மொழியாக்க வேண்டும், மெட்ராஸ் உயர் நீதிமன்றம் என்கிற பெயரை தமிழ்நாடு உயர் நீதிமன்றம் என மாற்ற வேண்டும், மத்திய அரசுப் பணியாளர் தேர்வாணையத் தேர்வை தமிழில் நடத்த வேண்டும் ஆகிய கோரிக்கைகளை வலியுறுத்தி உயர் நீதிமன்ற மதுரை கிளையில் வழக்கறிஞர்கள் 24 மணி நேர உண்ணாவிரதப் போராட்டத்தை நேற்று தொடங்கினர். இப்போராட்டத்தை தமிழறிஞர் தமிழண்ணல் தொடங்கி வைத்து பேசியதாவது:

தாய் மொழிக்காக நடைபெறும் எந்தப் போராட்டமும் தோற்றது கிடையாது. இது மக்கள் போராட்டமாக, சமுதாயப் போராட்டமாக மாற வேண்டும். இதன் முக்கியத்துவத்தை தமிழர்கள் அனைவரும் உணர வேண்டும். உயர் நீதிமன்றங்களில் நடைபெறும் வழக்கு விசாரணைகளை அனைவரும் அறிய வேண்டும். இதற்கு தாய் மொழியில் விசாரணை நடைபெற வேண்டும். நீதிமன்றத்தில் நடைபெறும் விவாதங்கள் வழக்காளர்களுக்கு தெரியாமல் இருந்தால், பிழைப்பு ஓடும் என்பதற்காக பலர் இதை வலியுறுத்தாமல் உள்ளனர்.

இதன் காரணமாகவே தமிழகத்தில் தமிழை வழக்காடு மொழியாக்கப் போராட்டம் நடத்த வேண்டிய இழிவான நிலைக்குத் தள்ளப்பட்டுள்ளோம். தமிழர்களின் சுயநலப் போக்கு மாற, விழிப்புணர்வு ஏற்படுத்த வேண்டும். இதற்கான போராட்டம் மாநிலம் தழுவிய போராட்டமாக மாற வேண்டும். தமிழகத்தில் எந்த கட்சி ஆட்சியில் இருந்தாலும், மத்திய அரசின் அடிமையாக உள்ளனர். மத்திய அரசிடம் கெஞ்சிக் கூத்தாடி ஒவ்வொரு காரியத்தையும் சாதிக்க வேண்டிய நிலையில் தமிழக அரசு உள்ளது. இந்நிலை மாற வேண்டும்.

நமது உரிமை தானாகவே கிடைக்க வேண்டும். ஆனால் தற்போது அந்த நிலை இல்லை. தமிழக அரசை மத்திய அரசு மதிப்பது இல்லை. நாம் இந்தி, ஆங்கிலத்தை எதிர்க்கவில்லை. தாய் தமிழை பயன்படுத்த, தமிழ் ஆட்சி செய்வதற்கான உரிமையை கேட்கிறோம். இதில் தவறு இல்லை. இந்தி பேசும் இந்தியா என்றாக்க மத்திய அரசு முயற்சி செய்கிறது. மூன்றாயிரம் ஆண்டு தொன்மையான தமிழ் மொழி பெருமை மிக்கது.

இதை பொறுத்துக்கொள்ள முடியாதவர்கள் தமிழை அழிக்க நினைக்கின்றனர். தமிழகத்தில் உள்ள சில அரசியல் கட்சிகளும் தாய் மொழியை அழிக்க நினைப்பவர்களுக்கு துணை போகின்றன. இது வேதனை அளிக்கிறது. நீதிபதிகளும் போராட்டம் நடத்த வேண்டும் என்றார். thehindutamil

சொல்லவுங் கூடுவ தில்லை - அவை
சொல்லுந் திறமை தமிழ்மொழிக் கில்லை!
மெல்லத் தமிழினிச் சாகும் - அந்த
மேற்கு மொழிகள் புவிமிசை யோங்கும்!

என்றெந்தப் பேதை உரைத்தான் - ஆ!
இந்த வசையெனக் கெய்திட லாமோ!
சென்றிடுவீ ரெட்டுத் திக்கும் - கலைச்
செல்வங்கள் யாவுங் கொணர்ந் திங்கு சேர்ப்பீர்!

பாரதி பாடிசென்றான்..
அந்த கவிதை தொகுப்பில் " மறைவாக நமக்குள்ளே பழங்கதைகள் சொல்வதிலோர் மகிமை இல்லை
திறமான புலமையெனில் வெளிநாட்டோர் அதை வணக்கஞ் செய்தல் வேண்டும்"

நமது இந்திய தேசம் பலவிதமான மொழிகளை உள்ளடக்கியது.. பாரதியார்கூட "யாமறிந்த மொழிகளிலே தமிழ் மொழியை போல் இனிதவதொன்றையும் காணோம் " என்கிறார். அதனால் பல்வேறு மொழிகளை அறிந்தால்தான் சமூகத்தில் சிறப்பாக செயலாற்ற முடியும்.

கிழமை நீதிமன்றங்களில் பிராந்திய மொழிகளில் தான் விசாரணை நடத்தப்பட வேண்டும். தீர்ப்புகளும் பிராந்திய மொழிகளில் மட்டுமே வெளியிட வேண்டும்.
கீழமை நீதிமன்ற நீதிபதிகள் அந்தந்த மாநிலங்களால் பணியமர்த்தப் படுகின்றனர். அவர்கள் அந்தந்த மாநிலத்தில் மட்டுமே பணியாற்ற முடியும். ஆனால் உயர் நீதி மன்றத்தில் பணியமர்த்தப்படும் நீதியரசர்கள் இந்தியாவில் எந்த பகுதியில் பணியாற்றுபவர்களையும் வேறு மாநில உயர் நீதிமன்றத்துக்கு மாற்றம் செய்யப்படலாம். நம் நாடு பல்வேறு மொழிகளை கொண்டுள்ளதால் வேறு வழியின்றி ஆங்கிலத்தை தெரிந்திருக்க வேண்டிய அவசியம் ஏற்படுகிறது. ஆங்கிலம் வேண்டாம் என்றால் நாம் குண்டு சட்டிக்குள் குதிரை ஓட்ட வேண்டியத்துதான். ஒரு மனிதன் இரண்டு மொழிகளை கற்று வைத்திருந்தால் அவன் அறிவாளி. இரண்டுக்கு மேற்ப்பட்ட மொழிகளை ஒருவன் கற்றறிந்து வைத்திருந்தால் அவன் அறிஞர். தமிழ், ஹிந்தி , மலையாளம், கன்னடம், தெலுங்கு இந்த 5 மொழிகளை தெரிந்திருந்தால் அவனைத்தான் உலகம் மதிக்கும் போற்றும்.. ஆங்கிலம் தெரிந்திருந்தால் இந்தியாவில் மற்ற மொழிகள் அதிகமாக தேவை இருக்காது..

நான்கு மொழிகள் தெரிந்திருக்கும் ஒருவனை ஹோட்டலில் வரவேற்பாளர் வேலைக்கு உடனே சேர்த்து கொள்வார்கள்.

உண்மை என்னவென்றால்....
நீதிமன்றத்தில் நான் நன்றாக ஆங்கிலம் பேசினால் என் கட்ச்சிக்காரன் என்னை போற்றி புகழ்கிறான்.. கேட்காமலேயே பீஸ் அள்ளி தருகிறான். நான் தமிழில் வாதாடினால் என்னிடம் வழக்கு கொடுத்தவனே என்னை மதிக்க மாட்டேன்கிறான்..! பீஸ் கேட்டால்கூட நாளை தருகிறேன் என்று சொல்கிறான்...