எம்.ஆர்.ராதா பிறந்த தினம்! (பிப்.21, 1907)

**சிவா** · **சிவா** Sat Feb 21, 2015 1:11 am

தமிழ் திரையுலகின் முன்னணி நகைச்சுவை மற்றும் வில்லன் நடிகர் எம்.ஆர்.ராதா 1907-ஆம் ஆண்டு பிப்ரவரி மாதம் இதே நாளில் சென்னையில் பிறந்தார். ராணுவ வீரரான இவருடைய தந்தை ரஷ்யா எல்லையில் பஸ்ஸோலிவாய என்னுமிடத்தில் போரில் மரணமடைந்தார். சிறு வயதிலேயே தன்னுடைய தந்தையை இழந்து ராதா பள்ளிக்குப் போகாமல், பொறுப்பில்லாமல் ஊர் சுற்றி வந்தார். பிறகு தாயுடன் கோபித்துக் கொண்டு வீட்டை விட்டு வெளியேறி ஆலந்தூர் நாடகக் கம்பெனியில் இணைந்தார்.

நாடகத்தில் தன்னுடன் நடித்த பிரேமாவதி என்பவரை காதலித்து திருமணம் செய்து கொண்டார். சில ஆண்டுகளில் அவர் அம்மை நோயால் இறந்துவிட்டார். அதே நோய்க்கு அவரது மகன் தமிழரசனும் பலியானார். பின்னர் தனலெட்சுமி என்பவரை ராதா மறுமணம் செய்து கொண்டார். அதன்பின்னர் கீதா என்னும் இலங்கை பெண்ணையும் காதலித்து திருமணம் செய்து கொண்டார். இவருடைய மகன்களான எம்.ஆர்.ஆர்.வாசு, ராதாரவி, மகள்களான ராதிகா மற்றும் நிரோஷா ஆகியோர் திரைப்படத்துறையில் நடிகர்களாகவும், நடிகைகளாகவும் வலம் வருகின்றனர்.

ராதா நாடகத்துறையில் கொடிகட்டிப் பறந்த காலகட்டத்தில் சாமிநாதன் என்பவர் அவரை வைத்து ‘ராஜசேகரன் ஏமாந்த சோணகிரி’ என்னும் படத்தை 1937-ல் தயாரித்து வெளியிட்டார். அதன்பிறகு 1942 வரை ஐந்து படங்கள் நடித்த ராதா அதன்பிறகு சினிமாவிற்கு முழுக்கு போட்டுவிட்டு நாடகத்துறைக்கே திரும்பினார்.

பிறகு பன்னிரண்டு ஆண்டுகள் கழித்து, 1954ல் திருவாரூர் கே.தங்கராசு என்பவர் எழுதிய ‘ரத்தக்கண்ணீர்’ என்ற வெற்றி நாடகம் ‘ரத்தக்கண்ணீர்’ என்ற பெயரில் திரைப்படமாக வெளிவந்தபோது, அந்த படத்தின் மூலம் திரைப்படத் துறைக்குத் திரும்பினார் ராதா. கதாநாயகனாக திரைத்துறையில் நுழைந்த ராதா, அதன்பிறகு பெரும்பாலும் வில்லன் மற்றும் நகைச்சுவைப் பாத்திரங்கள் ஏற்று நடிக்கத் தொடங்கினார். 125 படங்கள் வரை நடித்திருந்தாலும் ராதா நாடகங்கள் நடத்துவதையும் நடிப்பதையுமே விரும்பினார். ராதாவின் நாடகங்களில் புகழ்பெற்றது 'இழந்த காதல்' என்னும் நாடகம். அதில் ஜெகதீஷ் என்னும் பாத்திரத்தில் ராதாவின் நடிப்புப் பலராலும் பாராட்டப்பட்டது. எம்.ஜி.ஆரைச் சுட்ட வழக்கிற்குப் பிறகு படங்களில் நடிப்பதைக் குறைத்துக்கொண்டார்.

துவக்கத்தில் பெரியாருடன் தொழில் அடிப்படையில் சில மோதல்கள் ஏற்பட்டாலும், பின்னாளில் அவரது கொள்கைகளால் பெரிதும் ஈர்க்கப்பட்டு திராவிடர் கழகத்தின் முன்னணி ஆதரவாளராக இருந்தார். காமராஜரின் தனிப்பட்ட நண்பராகவும் இருந்த இவர், பெரியார் காங்கிரசை ஆதரித்தபோது காமராஜருக்காக தேர்தலில் வாக்குசேகரித்தார். இவரது அரசியல் சாய்வினாலும் தொழிலிலும் எம்.ஜி.ஆருடன் கருத்து வேறுபாடு கொண்டிருந்தார்.

தனது சீர்திருத்தக் கருத்துக்களையும், பிராமணர் எதிர்ப்பு கருத்துக்களையும், திராவிட இயக்கக் கருத்துக்களையும் இவர் தனது நாடகங்களிலும் திரைப்படங்களிலும் வெகுவாகப் பரப்பினார். இருந்தும் இவரது எதிர்ப்பாளர்களும்கூட இவரது நடிப்பை ரசித்தனர்.

மு.க.முத்து நடிப்பில் வந்த சமையல்காரன் என்ற திரைப்படத்திலும் பின்னர் ஜெய்சங்கருடன் நான்கு படங்களிலும் ராதா நடித்தார். 1975-ல் இந்திரா காந்தி அரசின் நெருக்கடி நிலை அறிவிப்பின்பின் உள்நாட்டுப் பாதுகாப்புப் பேணல் சட்டம் மிசாவின்கீழ் மீண்டும் கைது செய்யப்பட்டார். பதினோரு மாத சிறை வாசத்துக்குப்பிறகு மத்திய அமைச்சர்களின் தலையீட்டின் பேரில் வெளியே வந்தார்.

அதன்பின் சிங்கப்பூரிலும் மலேசியாவிலும் வெற்றிகரமாக நாடகம் நடத்திவிட்டு மஞ்சள் காமாலை நோய் ஏற்பட்டதையடுத்து திருச்சி திரும்பினார். 1979-ம் ஆண்டு செப்டம்பர் 17-ம் தேதி இறந்தார். அப்போது முதல்வராக இருந்த எம்.ஜி.ஆர். இறுதிச் சடங்கில் கலந்துகொள்ள நினைத்தார். ஆனால், அவரது பாதுகாப்புக் கருதி ராதா குடும்பத்தினர் அவரை வர வேண்டாம் எனக் கூறிவிட்டனர். அரசு மரியாதையையும் ஏற்க மறுத்துவிட்டனர்.

**ayyasamy ram** · **ayyasamy ram** Sat Feb 21, 2015 5:00 am

எம்.ஆர்.ராதா பிறந்த தினம்! (பிப்.21, 1907) 103459460

-

‘கூத்தாடிக்கு மன்றம் வைக்காதே’ என்று முழக்கமிட்ட ராதாவின்
பெயரில் மன்றம் திறக்கப்போவதாகப் பெரியார் கூறியபோது
அதைக் கூச்சத்துடன் நிராகரித்தார் ராதா.

1963இல் பெரியார் திடலில் ராதா மன்றம் என்ற அரங்கத்தைத் திறந்து
வைத்துப் பேசியபோது “மற்ற நடிகர்களுக்குப் புத்தி வரட்டும்
என்பதற்காகத்தான் இம்மன்றத்தைத் திறந்து வைக்கிறேன்”
என்று பேசினாராம் பெரியார்.
அது இன்று நடிகர்களுக்கு மட்டுமா பொருந்துகிறது?
-

__________________________________

**krishnaamma** · **krishnaamma** Sat Feb 21, 2015 12:30 pm

நல்ல நடிகர் புன்னகை

....பகிர்வுக்கு நன்றி சிவா..........ராம் அண்ணா புன்னகை

**M.Saranya** · **M.Saranya** Sat Feb 21, 2015 3:55 pm

மிக அருமையான நடிகர் அவர் ..... அவருடைய முக நளினங்கள் யாருக்குமே வராது ..... சிறந்த நகைச்சுவை நடிகர்......

எம்.ஆர்.ராதா பிறந்த தினம்! (பிப்.21, 1907) 3838410834