முதலாளி! - ஒரு நிமிடக் கதை !

by **krishnaamma** Sun Feb 22, 2015 11:02 am

டீக் கடையில் டீ குடித்தவாறு, பக்கத்து சைக்கிள் கடை வேலைக்காரச் சிறுவனைக் கவனித்தேன். வெளியே சென்று திரும்பிய முதலாளியிடம், அவர் இல்லாத நேரத்தில் பஞ்சர் ஒட்டியது, சக்கரத்துக்குக் காத்தடித்தது என்று கணக்குச் சொல்லி, 28 ரூபாயைக் கொடுத்தான்!

வேலை முடிந்து கிளம்பிய சிறுவனின் வாயைப் பிடுங்கினேன். ‘‘அந்த 28 ரூபாயை நீயே கைச் செலவுக்கு வெச்சுக்கலாமே... முதலாளிக்குத் தெரியவா போவுது?’’

‘‘தப்பு சார்! நாளைக்கு நானும் ஒரு கடைக்கு முதலாளி ஆவேன். அப்ப என் வேலைக்காரங்க எப்படி இருக்கணும்னு எதிர்பார்ப்பேனோ, அப்படி நான் இப்ப நடக்கிறதுதானே நியாயம்?’’ என்றான்.

அப்போதே அவன் முதலாளியாகத்தான் என் கண்களுக்குத் தெரிந்தான்!

- சி.நாச்சிமுத்து