‘சுக்கு நுாறானது’ பாக்., * வெ.இண்டீஸ் ‘சூப்பர்’ வெற்றி!

கிறைஸ்ட்சர்ச்: இந்தியாவிடம் சந்தித்த தோல்வியில் இருந்து மீளாத பாகிஸ்தான் அணி, மீண்டும் சொதப்பியது. நேற்றைய வெஸ்ட் இண்டீசுக்கு எதிரான உலக கோப்பை லீக் போட்டியில் 150 ரன்கள் வித்தியாசத்தில் வீழ்ந்தது. ஆன்ட்ரூ ரசல் ‘ஆல்–ரவுண்டராக’ அசத்தினார்.


நியூசிலாந்தின் கிறைஸ்ட்­சர்ச்சில் நடந்த உலக கோப்பை ‘பி’ பிரிவு லீக் போட்டியில் வெஸ்ட் இண்டீஸ், பாகிஸ்தான் அணிகள் மோதின. ‘டாஸ்’ வென்ற பாகிஸ்தான் கேப்டன் மிஸ்பா ‘பவுலிங்’ தேர்வு செய்தார்.

கெய்ல் ஏமாற்றம்:

வெஸ்ட் இண்டீஸ் அணிக்கு டுவைன் ஸ்மித் (23), கெய்ல் (4) சோபிக்­க­வில்லை. பின் பொறுப்பாக ஆடிய டேரன் பிராவோ (49), சாமுவேல்ஸ் (38), ராம்தின்(51), சிம்மன்ஸ்(50), சமி (30) நம்­பிக்கை தந்தனர்.

ரசல் அதிரடி:

கடைசி கட்டத்தில் ஆன்ட்ரி ரசல் அதிரடி காட்டினார். சோகைல் கான் பந்துவீச்சில் மூன்று சிக்சர் பறக்கவிட்டார். பின் வகாப் ரியாஸ் ஓவரில் இரண்டு பவுண்டரி, ஒரு சிக்சர் விளாசினார். வெஸ்ட் இண்டீஸ் அணி 50 ஓவரில் 6 விக்கெட்டுக்கு 310 ரன்கள் எடுத்தது. ரசல் (42 ரன், 3 பவுண்டரி, 4 சிக்சர்) அவுட்டாகாமல் இருந்தார்.

மூன்று ‘டக்’:

கடின இலக்கை துரத்திய பாகிஸ்தான் அணி, வெஸ்ட் இண்டீஸ் ‘வேகத்தில்’ சுக்கு நுாறானது. ஜெரோம் டெய்லர் வீசிய முதல் ஓவரிலேயே ஜாம்ஷெத்(0), அனுபவ யூனிஸ் கான்(0) நடையை கட்டினர். மீண்டும் பந்துவீச வந்த டெய்லர் இம்முறை ஹாரிஸ் சோகைலை(0) அவுட்டாக்கினார். ஹோல்டர் பந்தில் ஷேசாத்(1) வெளியேற, பாகிஸ்தான் அணி 4 ஓவரில் 4 விக்கெட்டுக்கு ஒரு ரன் மட்டும் எடுத்து தத்தளித்தது.

அக்மல் ஆறுதல்:

கேப்டன் மிஸ்பாவும் (7) அணியை கைவிட்டார். இதன் பின் மக்சூட், உமர் அக்மல் ஜோடி இணைந்து அணியை சரிவிலிருந்து மீட்க முயற்சித்தது. இருவரும் அரை சதம் அடித்தனர். மக்சூட் 50 ரன்கள் எடுத்தார். ‘சீனியர்’ வீரர் அப்ரிதி (28) தாக்குப்பிடிக்கவில்லை. அரை சதம் கடந்த உமர் அக்மல் (59) ரசல் பந்தில் ஆட்டமிழந்தார். வகாப் ரியாஸ் (3), சோகைல் கான் (1) சரணடைய, பாகிஸ்தான் அணி 39 ஓவரில் 160 ரன்களுக்கு சுருண்டு, படுதோல்வியடைந்தது.

வெஸ்ட் இண்டீஸ் சார்பில் ஜெரோம் டெய்லர், ஆன்ட்ரூ ரசல் தலா 3 விக்கெட் வீழ்த்தினர். ‘ஆல்–ரவுண்டராக’ அசத்திய ரசல், ஆட்ட நாயகன் விருது வென்றார்.

இப்போ ‘பெஸ்ட்’ இண்டீஸ்

உலக கோப்பை தொடரில் தனது முதல் லீக் போட்டியில், அயர்லாந்திடம் 4 விக்கெட் வித்தியாசத்தில் வீழ்ந்ததால், ‘வேஸ்ட்’ இண்டீஸ்’ என, அப்போது விமர்சிக்கப்பட்டது. இப்போது, பாகிஸ்தானுக்கு எதிராக 150 ரன்கள் வித்தியாசத்தில் வென்று ‘பெஸ்ட்’ இண்டீசாக ஜொலித்தது.

சொதப்பல் ‘பீல்டிங்’

பாகிஸ்தான் அணியின் ‘பேட்டிங்’, ‘பவுலிங்’ மட்­டு­மல்ல ‘பீல்டிங்கும்’ சொதப்பலாக இருந்தது. டுவைன் ஸ்மித் 11 ரன்கள் எடுத்த போது, தந்த ‘கேட்ச்’ வாய்ப்பை ஜாம்ஷெத் வீணடித்தார். இதே போல, ரியாஸ் பந்தில் சாமுவேல்ஸ் (2 ரன்கள்) கொடுத்த ‘கேட்ச்சை’ அப்ரிதி கோட்டைவிட்டார்.

பதம் பார்த்த பந்து

வெஸ்ட் இண்டீஸ் அணி ‘பேட்டிங்கின்’ போது, 24வது ஓவரில் 4வது பந்தை ரியாஸ் வீசினார். இதை அடித்த சாமுவேல்ஸ், ஒரு ரன்னுக்கு ஓடினார். மறுமுனையில், டேரன் பிராவோ ஓடி வந்தார். அந்த நேரத்தில், பாகிஸ்தானின் யூனிஸ் கான் எறிந்த பந்து, பிராவோ ‘ஹெல்மெட்டின்’ இடதுபுறத்தில் தாக்கியது. இதனால், சில நிமிடங்கள் பிராவோ வலியால் அவதிப்பட்டார்.
* 32வது ஓவரில் டேரன் பிராவோ (தொடையின் பின்பகுதி) காயத்தால் வெளியேறினார்.

3.1ஓவர், 1 ரன், 4 விக்.,

பாகிஸ்தான் அணியின் ‘டாப்–­ஆர்டர்’ அப்படியே சரிந்தது.3.1 ஓவரில் ஒரு ரன்னில் 4 விக்கெட்டை இழந்தது. இதன் மூலம், ஒரு நாள் அரங்கில் குறைந்த ரன்னில் 4 விக்கெட்டை இழந்த அணிகளின் பட்டியலில் கனடாவை பின்தள்ளி முதலிடம் பிடித்தது. கனடா அணி (எதிர்– ஜிம்பாப்வே) 4 ரன்களுக்கு 4 விக்கெட்டை பறிகொடுத்தது.

* பாகிஸ்தான் அணியின் ‘டாப்–4’ வீரர்கள் சேர்ந்து ஒரு ரன்தான் எடுத்தனர். இது, ஒரு நாள் அரங்கில் ஒரு இன்னிங்சில் ‘டாப்–4’ வீரர்கள் எடுத்த குறைந்தபட்ச ரன்னாக அமைந்தது. இதற்கு முன், அயர்லாந்து அணி வீரர்கள் (2007, எதிர்–ஆஸி.,) 2 ரன் எடுத்தனர்.

150
ஒரு நாள் அரங்கில் வெஸ்ட் இண்டீஸ் அணி, பாகிஸ்தானுக்கு எதிராக அதிக ரன்(150) வித்தியாசத்தில் வெற்றியை பதிவு செய்தது. இதற்கு முன் கடந்த 1992ல், சிட்னியில் நடந்த போட்டியில் 133 ரன்கள் வித்தியாசத்தில் வென்றது.

2
வெஸ்ட் இண்டீசின் டேரன் பிராவோ 49 ரன்களில் ‘ரிட்டையர்டு ஹர்ட்’ முறையில் வெளியேறினார். இதன் மூலம், உலக கோப்பை அரங்கில் காயத்தால் வெளியேறி, மீண்டும் பேட்டிங்கிற்கு திரும்பாத, இரண்டாவது வெஸ்ட் இண்டீஸ் வீரரானார். முதலிடத்தில் லாரா (1992, எதிர்–பாக்., 88 ரன்) உள்ளார்.