ஒரே நாளில் 31 பேர் சாவு: பன்றிக் காய்ச்சல் பலி எண்ணிக்கை 774 ஆக உயர்ந்தது

by **சிவா** Sat Feb 21, 2015 11:27 pm

நாடு முழுவதும் வேகமாக பரவி வரும் பன்றிக் காய்ச்சலுக்கு ஒரே நாளில் 31 பேர் பலியானதையடுத்து இந்த ஆண்டில் இந்நோய்க்கு பலியானவர்களின் எண்ணிக்கை 774 ஆக உயர்ந்துள்ளது.

எச்1என்1 என்ற வைரஸ் மூலம் உலகின் பல நாடுகளின் வழியாக பன்றிகளிடம் இருந்து மனிதர்களுக்கு பரவும் இந்த நோய் இந்தியாவின் வட மாநிலங்களில் தற்போது வேகமாக பரவி வருகின்றது. குறிப்பாக, ராஜஸ்தான், டெல்லி, குஜராத், உத்தர பிரதேசம் உள்ளிட்ட மாநிலங்களில் பன்றிக் காய்ச்சல் மிக, மிக வேகமாக பரவியபடி உள்ளது.

இந்த ஆண்டு ஜனவரி மாதம் முதல் தேதியில் இருந்து பிப்ரவரி 20 வரை பன்றிக் காய்ச்சல் நோயால் நாடு முழுவதும் 12,963 பேர் பாதிக்கப்பட்டுள்ளதாகவும், நேற்று வரை இந்நோய்க்கு 774 பேர் பலியாகியுள்ளதாகவும் மத்திய சுகாதார துறை அமைச்சகம் இன்று அறிவித்துள்ளது.

பன்றிக் காய்ச்சலால் பாதிக்கப்பட்டுள்ள நோயாளிகளுக்கு சிகிச்சை அளிக்கும் சுகாதார துறை பணியாளர்களுக்கும் இந்நோய் தொற்றி விடாமல் தடுக்கும் வகையில் சுமார் 2 ஆயிரம் தடுப்பூசிகளை வாங்கவும் மத்திய சுகாதாரத் துறை உத்தரவிட்டுள்ளது.