ஸ்ரீரங்கம் இடைத்தேர்தல் வேட்பாளர் வளர்மதியா, ஜெ.வா?

ஸ்ரீரங்கம்: ஸ்ரீரங்கம் இடைத்தேர்தல் வாக்கு எண்ணிக்கை காலையில் இருந்து தொடங்கி நடைபெற்று வருகின்ற நிலையில் இடைத்தேர்தல் வேட்பாளர் வளர்மதியா, ஜெயலலிதா என்று சந்தேகம் வரும் அளவுக்கு பார்ப்பவர்களை குழப்பி வருகின்றது ஜெயா டிவி.

காரணம் ஒரு முறை கூட வேட்பாளரின் முகத்தை அது காட்டவில்லை. மாறாக முன்னாள் எம்எல்ஏ ஜெயலலிதா படத்தையே காட்டிக் கொண்டிருக்கிறார்கள்.

காலையிலிருந்து வாக்கு முன்னணி நிலவரங்களை வெளியிட்டு வருகின்ற ஜெயா டிவி, வாக்கு நிலவரம் போடும் போது மருந்துக்கு கூட வளர்மதியின் புகைப்படத்தை காட்டவில்லை. ஒரு சிறிய ஸ்டாம்பு சைஸ் போட்டோ கூட எண்ணிக்கை குறித்த செய்திகளில் வெளியிடப்படவில்லை. வளர்மதியின் பெயரைக் கூட உச்சரிக்கவி்ல்லை யாரும்.

இதுகூட பரவாயில்லை பேசிக் கொண்டிருக்கும்போதே ஓரிடத்தில் வாக்கு எண்ணிக்கை நிலவரம் குறித்த நேரடித் தொகுப்பாளர் மக்கள் முதல்வர் ஜெயலலிதா இத்தனை வாக்குகள் முன்னணியில் உள்ளார்?! என்று உணர்ச்சி பெருக்கில் கூறி, வேட்பாளர் வளர்மதி என்பதையே மறந்து விட்டார்.

இரட்டை இலையும், பெரிய அளவில் "அம்மா" புகைப்படமும் மட்டுமே வாக்கு நிலவரம் குறித்த பகுதியில் இடம் பெற்று வருகின்றது. அதிமுகவிற்கு கிடைக்க உள்ள வெற்றி என்று கூறினாலும் பரவாயில்லை ஆள்மாற்றி ஆள் ஜெயலலிதாவிற்கு கிடைத்த வெற்றி என்றே கூறிக் கொண்டிருக்கின்றனர் மாற்றி மாற்றி.

பாவம் ஜெயலலிதா தொகுதியில் தைரியமாக தேர்தலில் நின்ற காரணத்திற்காக கொஞ்சம் பெரிய மனசுடன் வளர்மதி போட்டோவை சின்ன அளவிலாவது போடுங்க பாஸ்!

5000 ரூபாய் அதிமுகவுக்கு நல்ல பலனைக் கொடுத்துள்ளது... ஸ்ரீரங்கம் தேர்தல் முடிவு குறித்து ஸ்டாலின்

சென்னை: ஸ்ரீரங்கம் இடைத்தேர்தலில் அதிமுக வாக்காளர்களுக்கு கொடுத்த பணம் பலன் அளித்துள்ளது என திமுக பொருளாளர் ஸ்டாலின் கருத்துத் தெரிவித்துள்ளார்.

சொத்துக்குவிப்பு வழக்கில் சிறை தண்டனை பெற்றதைத் தொடர்ந்து தனது ஸ்ரீரங்கம் சட்டசபை உறுப்பினர் பதவி மற்றும் தமிழக முதலமைச்சர் பதவி ஆகியவற்றை இழந்தார் அதிமுக பொதுச்செயலாளர் ஜெயலலிதா.

அதனைத் தொடர்ந்து காலியாக இருந்த ஸ்ரீரங்கம் சட்டசபைத் தொகுதிக்கு கடந்த 13ம் தேதி இடைத்தேர்தல் நடத்தப்பட்டது. தேர்தலில் பதிவான வாக்குக்கள் இன்று எண்ணப்பட்டு வருகிறது.

இதுவரை எண்ணப்பட்ட ஓட்டுகளின் அடிப்படையில் அதிமுக வெற்றி உறுதியாகியுள்ளது.

இந்நிலையில், சென்னை கோபாலபுரத்தில் உள்ள இல்லத்தில் திமுக தலைவரும், தனது தந்தையுமான கருணாநிதியைச் சந்தித்தார் அக்கட்சியின் பொருளாளர் ஸ்டாலின். அதனைத் தொடர்ந்து செய்தியாளர்களுக்கு அவர் பேட்டியளித்தார்.

அப்போது அவர், ‘ஸ்ரீரங்கம் தேர்தலில், ஒரு ஓட்டுக்கு ஆளும் கட்சி 5 ஆயிரம் ரூபாய் கொடுத்தது. ஆளும் கட்சி கொடுத்த பணத்திற்கு பலன் கிடைத்துள்ளது,' என்றார்.

ஸ்ரீரங்கம் இடைத்தேர்தலில் பணநாயகம் வெற்றி: சொல்கிறது பாஜக

புதுடெல்லி: ஸ்ரீரங்கம் இடைத் தேர்தலில் பணநாயகம் வெற்றி பெற்றுள்ளதாக பாஜகவின் தமிழ் மாநில பாஜக தலைவர் தமிழிசை சௌந்திரராஜன் தெரித்துள்ளார்.

டெல்லியில் செய்தியாளர்களைச் சந்தித்த தமிழிசை சௌந்தரராஜன், “ஸ்ரீரங்கம் இடைத்தேர்தலில் பணபலம் மூலம் அதிமுக வெற்றி பெற்றுள்ளது.

வாக்காளர்களுக்கு அதிக அளவில் பணப் பட்டுவாடா செய்ததன் எதிரொலியாகவே தற்போது அங்கு ஆளும் கட்சி தொடர்ந்து முன்னிலை வகித்து வருகிறது. இடைத்தேர்தலில் ஊழலுக்கு எதிரான பிரச்சாரத்தை பாஜக வலுவாக முன்வைத்தது. எதிர்க்கட்சிகள் இன்னும் வலுவாக போட்டியிட்டிருக்க வேண்டும்.

சில கட்சிகள், இடைத்தேர்தல் என்றாலே ஆளும் கட்சிக்கு சாதகமாகவே அமையும் என தேர்தலை புறக்கணித்துவிட்டனர். இப்படி புறமுதுகிட்டு ஓடுவது சரியல்ல” என்றார் தமிழிசை சௌந்தரராஜன்.

ஸ்ரீரங்கத்தில் பணபலமும், அதிகார பலமும் வெற்றி பெற்றுள்ளது என்று மார்க்சிஸ்ட் கம்யூனிஸ்ட் கட்சியின் மாநிலச் செயலாளர் ஜி.ராமகிருஷ்ணன் தெரிவித்துள்ளார்.

மக்கள் தெளிவானவர்கள் .
விஷயம் தெரிந்தவர்கள் .
ஆளும் கட்சி என்று ஒன்று இருக்க , எதிர் கட்சிக்கு என்றுமே ஓட்டுப் போடமாட்டார்கள் .
எதிர் கட்சிக்கு ஓட்டுப் போட்டு ஜெயிக்கவைப்பதால் , ஆளும் கட்சியின் கோபத்தைக் கிளறி ,
கிடைக்ககூடிய ஒரு சில திட்டங்களை இழக்க தயாராக இருக்க மாட்டார்கள் அந்த தொகுதி மக்கள் .
ஆகவேத்தான் எப்போதும் ஆளும் கட்சிதான் , இடைத் தேர்தலில் ஜெயிக்கும் ./ஜெயிக்கிறது .
ரமணியன்