தேவன் வாழும் ஆலயம்

மனிதர்களாகிய நமது இதயமானது தேவன் வாழ வேண்டிய ஆலயம். எனவே அதை பரிசுத்தமாக வைத்துக்கொள்ள வேண்டும். குளித்து நீராடி புறத்தூய்மை பேணலாம் அகத்தூய்மை பேணுவது எப்படி? இதற்கு இயேசு வழிகாட்டுகிறார். மனத்தின் மாசுக்களை நீக்க அவர் சொல்லும் வழிகளை நாமும் அறிந்து கொள்வோம்.....

இருதயம் தூய்மையாக இருக்க வேண்டும் என்று இயேசு வலியுறுத்திய சம்பவத்தை இன்று தியானிப்போம். இயேசுவின் சீடர்கள் போஜனம் பண்ணுவதற்காக அமரும் முன்னர் அவர்கள் கைகளை கழுவாமல் அமர்ந்தனர். இதைக்கண்ட மற்றவர்கள் அவர்கள் மீது குற்றம் சுமத்தும்படியாக இயேசுவிடம் வந்து, உமது சீடர்கள் பாரம்பரியத்தை மீறி விட்டனர் என்றார்கள்.

இயேசு அவர்களுக்கு பின்வருமாறு பதிலளித்தார். வாய்க்குள்ளே போகிறது மனுஷனை தீட்டுப் படுத்தாது, வாயிலிருந்து புறப்படுகிறதே தீட்டுப்படுத்தும் அதாவது வாய்க்குள்ளே போகிறதெல்லாம் ஆசன வாய் வழியாய் கழிந்து போகும், ஆனால் ஒருவனுடைய வாயிலிருந்து புறப்படுகிற வார்த்தைகள் அவை இருதயத்திலிருந்து புறப்பட்டு வரும். பொல்லாத சிந்தனைகள், கொலை பாதகங்கள், வேசித்தனங்கள், களவுகள், பொய் சாட்சிகள், தூஷனங்கள் போன்றவை எழும். இதிலுள்ள ஏதாவது ஒன்றை ஒருவன் செய்தால் அந்தப் பாவங்களே அவனை தீட்டுப்படுத்தும். மாறாக கை கழுவாமல் சாப்பிடு வது ஒருவனை தீட்டுப்படுத்தாது என்றார்.

நாமும் உள்ளத்தில் உள்ள தீயவற்றை விலக்கினால் போதும். நம் உள்ளத்திலும் தேவன் குடிகொள்ளுவார் என்பதில் சிறிதும் ஐயமில்லை.